سولتۇستىك قازاقستان وبلىسىنداعى سۋ تاسقىنى زاردابىن جويۋ, قاۋىپتىڭ بەتىن قايتارۋ ماقساتىندا ۇيىمداستىرىلعان جۇمىستارعا بەلسەندى قاتىسقان ۇلتتىق ۇلان اكادەمياسىنىڭ كۋرسانتتارى مەملەكەت باسشىسىنىڭ اتىنان قولساعاتتارمەن ماراپاتتالدى.
پەتروپاۆل قالاسىنىڭ شاعىن اۋداندارى مەن ىرگەسىندە ورنالاسقان ەلدى مەكەندەردى سۋدان قورعاۋ جۇمىستارىندا بەلسەندى قىزمەت اتقارعان ۇلتتىق ۇلان اكادەمياسىنىڭ 4-وقۋ باتالونىنا قاراستى 3-بولىمشەسىنىڭ كومانديرى, سەرجانت ايان قالي, 1-وقۋ باتالونى 4-بولىمشەسىنىڭ كۋرسانتى اسقار جالەلوۆ, 1-وقۋ باتالونى 3-بولىمشەسىنىڭ كۋرسانتى رومان موركوۆينگە پرەزيدەنت قاسىم-جومارت توقاەۆتىڭ اتىنان ارنايى سىيلىق تابىستالدى.
– ءبىز ناۋرىز ايىنىڭ سوڭىندا باستالعان تابيعي اپاتتان تۇرعىنداردى, ولاردىڭ باسپانالارىن قورعاۋعا اتسالىسىپ كەلەمىز. تاسقىن سۋدى تەجەۋ ءۇشىن بوگەتتەر تۇرعىزدىق. مەملەكەتتىك ماڭىزدى نىساندى سۋدان امان الىپ قالدىق. ءبىزدىڭ ماقساتىمىز – سۋ تاسقىنىنان زارداپ شەككەن تۇرعىندارعا كومەكتەسۋ. مەملەكەت باسشىسى, قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ وسى قىزمەتىمىزدى باعالاپ جاتقانى ءبىزدى قۋانتىپ وتىر, – دەدى سەرجانت ا.قالي.
ايتا كەتەيىك, ءدال وسىنداي قۇرمەتكە پەتروپاۆل قالاسىندا ورنالاسقان 6637 اسكەري ءبولىمىنىڭ 7 جاۋىنگەرى دە يە بولدى.