ۇكىمەت وتىرىسىندا توتەنشە جاعدايلار ۆيتسە-ءمينيسترى باۋىرجان سىزدىقوۆ ەلىمىزدىڭ باتىسىندا رەسەيدىڭ يريكلينسك سۋ قويماسىنان جايىق وزەنىنە سۋدىڭ اعۋىنا بايلانىستى جاعداي كۇردەلەنە تۇسكەنىن, سولتۇستىكتە سۋ كوتەرىلىپ جاتقانىن ايتتى, دەپ حابارلايدى Egemen.kz.
«بۇگىندە 5 مىڭنان استام تۇرعىن ءۇي, 16 مىڭنان استام ساياجاي مەن 1 مىڭ اۋلا اۋماعى, 91 عيمارات سۋ استىندا قالىپ وتىر. 10 وبلىستا جەرگىلىكتى اۋقىمداعى 41 توتەنشە جاعداي جاريالاندى. قازىر اباي جانە پاۆلودار وبلىستارىنىڭ 3 اۋدانىندا تج رەجيمى الىندى», دەدى ول.
سۋ تاسقىنىن جويۋ جۇمىستارى باستالعاننان بەرى شامامەن 11,6 ميلليون تەكشە مەتر ەرىگەن سۋ سورىلىپ, 5 ميلليوننان استام قاپ توسەلدى.
«قۇتقارۋ جانە شۇعىل جۇمىستار كەزىندە جاڭا ادىستەر مەن تاسىلدەر العاش رەت ەنگىزىلدى. مىسالى, اقتوبە جانە سولتۇستىك قازاقستان وبلىستارىندا پونتون كوپىرلەرىن ورناتۋ, قىسقا مەرزىمدە سۋ بۇرۋ ارنالارىن سالۋ. بۇل كولىك بايلانىسىن قامتاماسىز ەتۋگە جانە سۋ باسۋ قاۋپىن ازايتۋعا مۇمكىندىك بەردى. زارداپ شەككەندەردى ەۆاكۋاتسيالاۋ جانە ورنالاستىرۋ بويىنشا بارلىق ماسەلەلەر سول جەردە جەدەل شەشىلەدى. قۇتقارۋشىلار بوسانعان ايەلدەردى قۇتقارعان جاعدايلار بولدى, ولاردىڭ بارلىعى اۋرۋحانالارعا امان-ەسەن جەتكىزىلدى», دەدى باۋىرجان سىزدىقوۆ.
يەلەرى تاستاپ كەتكەن جانۋارلار دا قيىندىقتا قالعان جوق.
«كەيبىر ازاماتتار ۇيلەرىنەن كەتكىسى كەلمەدى, كەلىسسوز جۇرگىزىپ, ولاردى كوندىرۋ ءۇشىن كوپ ۋاقىت قاجەت بولدى, بىراق ەۆاكۋاتسيالاۋ كەزىندە مۇگەدەكتەر, قارت ادامدار مەن ايەلدەرگە باسىمدىق بەرىلدى. جالپى, سۋ تاسقىنى ايماقتارىنان بارلىعى 119 مىڭنان استام ادام ەۆاكۋاتسيالاندى, ولاردىڭ 44 مىڭنان استامى بالالار بولدى, بۇگىندە سۋدى جويۋعا 32 مىڭنان استام ادام, 5 مىڭعا جۋىق تەحنيكا, 310 سۋ كولىگى جانە 13 تىكۇشاق جۇمىلدىرىلدى», دەپ اتاپ ءوتتى سىزدىقوۆ.
ونىڭ ايتۋىنشا, بۇگىندە اكىمدىكتەر ماتەريالدىق شىعىندى ساناپ, تۇرعىندارعا وتەماقى تولەپ جاتىر. سۋ قويمالارىنا تاۋلىك بويى مونيتورينگ جۇرگىزىلىپ جاتىر.