مۇمكىندىگى شەكتەۋلى ادامدارعا ارنالعان رەسپۋبليكالىق الەۋمەتتىك بايقاۋعا اقمولا وبلىسىنان قاتىسقان يۋليا گورياچەۆسكايا ەكىنشى ورىندى يەمدەندى. «دارىندى باستاۋ» اتالىمى بويىنشا كوزگە تۇسكەن ستەپنوگورلىق قىز ەندى ەكسپو-2017 حالىقارالىق كورمەسىنە قاتىساتىن بولادى.
يۋليا مۇگەدەكتىگىنە قاراماستان, شىنىدان شىرايلى بۇيىمدار دايىنداۋىمەن ەل اۋزىنا ەرتە ىلىكتى. ول جوعارىدا اتالعان بەدەلدى بايقاۋدا ماتا جانە توقىما بۇيىمدارىن اشەكەيلەۋىمەن, شىنىدان جاسالعان نازىك كارتينالارىمەن, ءتىپتى, شاحمات فيگۋرالارىمەن تالعامپاز كورەرمەندەردى ءتانتى ەتتى.
قازىر يۋ.گورياچەۆسكايا ءمادەنيەت جانە سپورت مينيسترلىگىنىڭ تاپسىرىسى بويىنشا «مەملەكەتتىك ساياساتتى دامىتۋ قورى» قق قولعا العان مۇمكىندىگى شەكتەۋلى ادامدار ءۇشىن حالىقتىق جانە ءساندى قولونەر تۋىندىلارىن جاساۋ ارقىلى ەكسپو-2017 حالىقارالىق مامانداندىرىلعان كورمەسىنە قىزۋ دايىندالۋ ۇستىندە. اقمولالىقتار ونەرلى قىزدىڭ ابىرويلى ساپتان كورىنەتىنىنە سەنىمدى.
باقبەرگەن امالبەك,
«ەگەمەن قازاقستان».
اقمولا وبلىسى.