اقتوبە قالاسى اكىمىنىڭ ورىنباسارى ايگۇل ارىنعازيەۆا «اقجار-2» كەنتىندە تۇراتىن 100 جاستاعى اقجارقىن تۇرعانوۆانى جاڭا جىل مەرەكەسىمەن قۇتتىقتادى. التىن اسىقتاي اجە جاستايىنان اشتىقتى دا, ۇلى وتان سوعىسىنىڭ اۋىرتپالىقتارىن دا باستان وتكەرگەن. اشتىق جىلدارى اتشوڭقاي جەپ امان قالسا, سوعىس كەزىندە سابان ايداعان, 16 سيىردى كۇنىنە ءۇش مەزگىل ساۋىپ, بوزالا تاڭ, بوزتورعاي شىرىلىنان ويانىپ, ءتۇن اۋعانشا بەل شەشپەي, «ءبارى مايدان ءۇشىن» دەپ ەڭبەك ەتكەن. كەيىن ۇجىمشار, كەڭشار جۇمىسىنا اتسالىسىپ, شالى ايجانعا كومەكشى شوپان بولعان.
ەڭبەكپەن شىڭدالعان كەيۋانا تىڭ, جادى مىقتى. بالاسى جاقسىلىق پەن كەلىنى ءامينانىڭ, نەمەرە-شوبەرەلەرىنىڭ باعىم-كۇتىمىنىڭ ارقاسىندا قولىن جىلى سۋعا مالىپ وتىرعان ءجايى بار. ۇلى جاقسىلىق ايجانوۆ ەلىمىزگە بەلگىلى اقىن. جاراستى وتباسىنىڭ ۇيىتقىسى ءامينا ەنەسى اقجارقىننىڭ بارلىق باعىم-كۇتىمىن كەلىستىرىپ وتىرعان ۇلگىلى كەلىن.
– ەنەممەن بىرگە تۇرعانىما 40 جىل بولدى. ەرتەرەكتە ءبىر اۋىرعانىندا قورىقپا, اپا, ءسىزدى جۇزگە جەتكىزبەسەم ءامينا بولماي كەتەيىن دەگەنىم بار ەدى, سوعان جەتتىم, – دەپ ءسوز اراسىندا ازىلدەپ تە قويادى.
ومىردەن ەرتەرەك وزعان شالى ايجانمەن ەكەۋى قىزى تىنىشتىق پەن ۇلى جاقسىلىقتى قاتارىنان كەم قىلماي ءوسىردى. قازىر دە سولاردىڭ, نەمەرە-شوبەرەلەرىنىڭ تىلەۋىن تىلەۋدەن جاڭىلعان ەمەس. اقجارقىن كەيۋانا – قىزى مەن ۇلىنان 15 نەمەرە, 26 شوبەرە كورىپ وتىرعان باقىتتى جان.
ايگۇل ارىنعازيەۆا عاسىر جاساعان كەيۋاناعا گۇل ۇسىنىپ, جاڭاجىلدىق سىيلىعىن تاپسىردى, زور دەنساۋلىق, باقىت تىلەدى, بالالارىنىڭ, نەمەرەلەرىنىڭ جانە ءشوبەرەلەرىنىڭ قىزىعىن كورە بەرۋىنە دەگەن ىقىلاس-نيەتىن ءبىلدىردى.
ءوز كەزەگىندە اقجارقىن اجە بىرىنشىدەن, ۇكىلەپ باعىپ وتىرعان بالا-كەلىنىنە, وسىنداي باقۋاتتى تۇرمىسقا جەتكىزگەن ەلباسىنا, مەملەكەت باسشىسىنىڭ ۇلگىسىن ىلگەرى اپارىپ كەلە جاتقان جەرگىلىكتى بيلىككە ريزاشىلىعىن ءبىلدىردى. ەلىمىزگە تابىس پەن تاتۋلىق, بەرەكە-بىرلىك تىلەدى.
ايگۇل ارىنعازيەۆانىڭ ايتۋىنشا, سوڭعى جىلدارى 100 جاساعان, ودان ۇزاق ءومىر سۇرەتىندەر قاتارى كوبەيىپ كەلەدى ەكەن. ياعني, مۇنى ادامداردىڭ وزدەرىنىڭ ءتۋابىتتى دەنساۋلىعىمەن بىرگە, ءومىرىمىزدىڭ جاقسارا تۇسكەنىنىڭ, سونداي-اق, قازاقستاندىقتاردىڭ ءومىر جاسىن ۇزارتۋعا باعىتتالعان شارالاردىڭ دا ارقاسى دەۋ ورىندى بولماق. قازىر اقتوبە قالاسىنىڭ وزىندە عانا عاسىر جاساعان 18 ادام تۇرادى, ولاردىڭ بارلىعى دا قالالىق اكىمدىك تاراپىنان وسىنداي ىلتيپاتقا بولەنىپ, سىي-سياپاتقا يە بولدى.
ساتىبالدى ءساۋىرباي,
«ەگەمەن قازاقستان».
اقتوبە.