قوستانايداعى وبلىستىق تاريحي-ولكەتانۋ مۋزەيىنىڭ بەينەلەۋ ونەرى زالىندا اۋىلشارۋاشىلىق عىلىمدارىنىڭ كانديداتى, اۋەسقوي سۋرەتشى نيكولاي ستەشيننىڭ شىعارماشىلىعىن ارقاۋ ەتكەن «اڭشىنىڭ اڭگىمەسى» اتتى كورمە اشىلدى.
توبىل قالاسىنىڭ تۇرعىنى نيكولاي ستەشين كوپ جىل بويى سارىكول اۋدانىنىڭ اۋىل شارۋاشىلىعى سالاسىندا كاسىبي عالىم-اگرونوم بولىپ قىزمەت ەتكەن. كەيىن وسى اۋدانعا قاراستى «ماياك» كەڭشارىن, ودان سوڭ قازىرگى بەيىمبەت مايلين اۋدانىن باسقارادى. ەڭبەك ارداگەرى قازىر قۇرمەتتى زەينەت دەمالىسىندا.
2017 جىلى نيكولاي ۆاسيلەۆيچ سال اۋرۋىنا ۇشىراپ, وڭ جاق دەنەسى تۇگەل قوزعالماي جاتىپ قالادى. اۋىر سىرقاتقا, تەرەڭ ۋايىمعا بوي الدىرعىسى كەلمەگەن قاجىرلى زەينەتكەر وسى كەزەڭنەن باستاپ قىلقالام ۇستاپ, بەينەلەۋ ونەرىن الدانىش ەتكەن. وڭ قولى قوزعالماي قالعاندىقتان سول قولىمەن سۋرەت سالىپ ۇيرەنەدى. سودان بەرى جەتى جىل بويى ۇزبەي سۋرەت سالىپ, قىلقالامنان جان تىنىشتىعىن تاپقان اۋەسقوي سۋرەتشىنىڭ ءبىرتالاي تۋىندىسى بەينەلەۋ ونەرىنە ءبىرتابان جاقىن قالىڭ كورەرمەنگە جول تارتىپ وتىر. اۆتور ءوزىنىڭ «قانسونار», «اڭشى», «قايىڭدار», «كوكجالدار», «ايۋمەن بەتپە-بەت», «قاسقىر الۋ», «جاڭعالاق اڭشى», «اۋىل», «زيرات شەتىندەگى ساكى» اتتى تۋىندىلارىنا تۋعان جەردىڭ اسەم تابيعاتىن, اڭشىلىق ونەرى تۋرالى ءوزى باسىنان كەشىرگەن, ەستىگەن, كورگەن وقيعالاردى ارقاۋ ەتكەن.
«مەن وتكەن ءومىرىمدى وي تارازىسىنان وتكىزىپ ويلانىپ جاتامىن دا, سول ساتتە ەسىمە تۇسكەن قىزىق ءبىر وقيعانى كەنەپ بەتىنە تۇسىرۋگە كىرىسەمىن. مەنىڭ تۋىندىلارىم – جۇرەگىمنەن, جانىمنان شىققان ەستەلىكتەرىم. ءومىر بويى اۋىل شارۋاشىلىعى سالاسىندا تەر توكتىم. شىنىمدى ايتسام, اۋىر دەرت مەڭدەگەنگە دەيىن ونەردەن الىستاۋ جۇرگەن اداممىن. از-كەم ەڭبەگىمدى جوعارى باعالاپ, وبلىس ورتالىعىنداعى مادەنيەت ورداسىنا ورنالاستىرىپ, كوپشىلىككە كورسەتىپ جاتقان مۋزەي قىزمەتكەرلەرىنىڭ ىستىق ءىلتيپاتىنا راحمەت ايتامىن», دەيدى ەڭبەك ارداگەرى.
كورمەنىڭ اشىلۋ راسىمىنە قاتىسقان گەورگي سوكوۆ, نيكولاي تورشين, سەرگەي لۋگوۆوي, ۆاديم بىكوۆ ءتارىزدى كاسىبي قىلقالام شەبەرلەرى اۆتور تۋىندىلارىنىڭ تاقىرىپتىق اياسى كەڭ, كوپقىرلى ەكەنىنە توقتالىپ, جوعارى باعا بەردى.
قوستاناي وبلىسى