جۇك ىشىنە ازىق-ت ۇلىك, كيىم, گيگيەنالىق قۇرالدار, تۇرمىستىق تاۋارلار, موتورلى قايىقتار جانە باسقا دا قاجەتتى زاتتار كىرەدى. جىبەرۋشىلەر اراسىندا قايىرىمدىلىق قورلارى مەن قاۋىمداستىقتار, سونداي-اق كوممەرتسيالىق ۇيىمدار بار. گۋمانيتارلىق كومەك Air Astana جانە FlyArystan ۇشاعىمەن الماتى مەن استانادان اتىراۋ, اقتاۋ جانە ورالعا جەتكىزىلدى.
«اۆيابيلەتتەرگە سۇرانىستىڭ ۇلعايۋىنا جاۋاپ رەتىندە Air Astana جانە FlyArystan بىرلەسىپ 8 ءساۋىر مەن 21 ءساۋىر ارالىعىندا اتىراۋدان 41 قوسىمشا رەيس اشتى. تۇراقتى رەيستەرمەن بىرگە وسى كەزەڭدەگى رەيستەر سانى 30%-عا ارتىپ, شامامەن 23 مىڭ وتانداسىمىزعا اتىراۋدان الماتى, استانا, اقتاۋ جانە شىمكەنتكە كەشەۋىلدەمەي ۇشۋعا مۇمكىندىك بەردى.
بۇل رەتتە Air Astana جانە FlyArystan تىكەلەي رەيستەرىنىڭ تاريفتەرى كوتەرىلمەي عانا قويماي, 13 ءساۋىر مەن 24 ءساۋىر ارالىعىندا اتىراۋدان ەكونوم-كلاسس بيلەتتەرىنىڭ قۇنى ءبىر جاققا 40 مىڭ تەڭگەگە دەيىن تومەندەتىلدى. جولاۋشىلارعا ىڭعايلى بولۋ ءۇشىن ەكى اۋەكومپانيا دا جولاۋشىلارعا 30 ساۋىرگە دەيىنگى رەيستەرگە ايىپپۇلسىز بيلەتتەردى قايتارۋعا نەمەسە 21 مامىرعا دەيىنگى بالامالى رەيستەرگە قايتا برونداۋعا رۇقسات ەتتى», دەلىنگەن كومپانيا حابارلاماسىندا.
بۇعان دەيىن Air Astana توبى سۋ تاسقىنىنان زارداپ شەككەندەرگە كومەك كورسەتۋ ءۇشىن Samruk Kazyna Trust قورىنا 1 ميلليارد تەڭگە اۋدارعان ەدى. ودان بولەك اۋەكومپانيالاردىڭ قىزمەتكەرلەرى قاراجات پەن ەڭ قاجەتتى زاتتاردى جيناپ, سۋ باسقان ايماقتارداعى مۇقتاج جاندارعا تاراتۋ ءۇشىن Qamqor Charity قوعامدىق قورىنا تاپسىردى. سونىمەن قاتار Air Astana ەرىكتىلەرى اتىراۋ مەن اقتاۋدا اپاتتىق-قۇتقارۋ جۇمىستارىنا اتسالىسىپ جاتىر.