سولتۇستىك وڭىردەن كەيىن مەملەكەت باسشىسىنىڭ بورتى قوستاناي وبلىسىنا ۇشىپ كەلدى. قاسىم-جومارت توقاەۆ ايماقتاعى قازىرگى احۋالمەن تانىسۋ ءۇشىن تىكۇشاقپەن سۋ باسقان اۋماقتاردى ارالادى.
وبلىس اكىمى قۇمار اقساقالوۆ سۋ تاسقىنىنا بايلانىستى وڭىردەگى التى اۋماقتا توتەنشە جاعداي جاريالانعانىن ايتتى. وبلىستاعى 492 اۋىلدىڭ 11-ءى سۋ تاسقىنىنان زارداپ شەكتى. قازىرگى كەزدە جاعداي تۇراقتالدى. الايدا ءالى دە 51 ءۇي سۋ استىندا قالىپ وتىر. بۇدان بولەك, 4 كوپىردى, 7 جول ۋچاسكەسىن سۋ شايىپ كەتكەن, 1414 ەلەكتر باعانىنا نۇقسان كەلدى. سونىڭ سالدارىنان قوستاناي مەن وبلىستىڭ وڭتۇستىگىندەگى اۋداندار اراسىندا كولىك قاتىناسى كۇردەلەنىپ, 13 ەلدى مەكەندى ەلەكترمەن قامتاماسىز ەتۋدە قيىندىق تۋدى.
سونىمەن قاتار پرەزيدەنتكە وبلىستىڭ نەگىزگى گيدروتەحنيكالىق نىساندارىنىڭ, اتاپ ايتقاندا قاراتومار, جوعارعى توبىل, جەلقۋار سۋ قويمالارىنىڭ جاي-كۇيى جونىندە مالىمەت بەرىلدى. قۇمار اقساقالوۆ ەلدى مەكەندەر مەن ينفراقۇرىلىمدارعا تونەتىن قاۋىپتىڭ الدىن الۋ ءۇشىن سۋ قويمالارىنان جىبەرىلەتىن سۋ مولشەرى ۇدايى باقىلاۋدا ۇستالاتىنىن ايتتى.
جالپى, وڭىردەگى دامبالاردى بەكىتۋ, ينەرتتى ماتەريالداردى توگۋ ناتيجەسىندە توبىل قالاسىن, امانگەلدى اۋدانىنىڭ ورتالىعىن, باسقا دا ەلدى مەكەندەردى سۋ باسۋ قاۋپىنەن ساقتاپ قالۋ مۇمكىن بولعان.
پرەزيدەنت توبىل قالاسىندا ورنالاسقان جەدەل شتابتا سۋ تاسقىنىنان زارداپ شەككەن قوستاناي اۋدانىنا قاراستى اۋىلداردىڭ تۇرعىندارىمەن كەزدەستى.
كەزدەسۋدە قاسىم-جومارت توقاەۆ ازاماتتىق بەلسەندىلىك تانىتقان جانە اپاتقا بەيجاي قاراماي جاناشىرلىق بىلدىرگەن بارشا جۇرتشىلىققا العىس ايتىپ, حالىقتىڭ بىرلىگى وسىنداي قيىن كەزەڭدە ايقىن كورىنەتىنىن اتاپ ءوتتى.
– مەن سىزدەرمەن جۇزدەسۋ ءۇشىن ارنايى كەلدىم. جاعدايدىڭ كۇردەلى ەكەنىن تۇسىنەمىن. مەملەكەتتىڭ بارلىق رەسۋرسى وسى ماسەلەنى شەشۋگە باعىتتالىپ جاتىر. پرەزيدەنت رەتىندەگى مەنىڭ باستى مىندەتىم – سۋ تاسقىنىنان زارداپ شەككەن تۇرعىندارعا بارىنشا كومەك كورسەتۋ, – دەدى مەملەكەت باسشىسى.
پرەزيدەنت مەملەكەتتىڭ قارجىسىن قاتاڭ ۇنەمدەۋ رەجىمى ەنگىزىلگەنىن, قاراجات زارداپ شەككەن حالىققا بولىنەتىنىن جەتكىزدى. مەملەكەت باسشىسى بارلىق زارداپ شەككەن تۇرعىنعا قاجەتتى كومەك كورسەتىلەتىنىن ايتتى.
– وتەماقى – باستى ماسەلە. شىعىن وتەلەدى. سونىمەن قاتار تۇرعىن ءۇيى جارامسىز ازاماتتارعا جاڭا باسپانا سالىنادى جانە جوندەۋگە جارامدى ۇيلەر قايتا قالپىنا كەلتىرىلەدى. وعان قاجەتتى بارلىق قاراجات بولىنەدى. كىم پاتەرگە كوشكىسى كەلسە, ءبىز پاتەر ساتىپ الىپ بەرەمىز. كىم ءوز قونىسىندا قالعىسى كەلەدى, ولارعا تيپتىك ۇلگىدەگى ۇيلەر سالامىز. دەگەنمەن قاۋىپتى جەرلەردە قالۋعا مۇلدە بولمايدى. مۇنداي ۇيلەردىڭ جوباسى بار. بۇل ۇيلەر قىسقا دەيىن تولىقتاي سالىنادى. مەن ۇكىمەتكە الداعى جاز مەزگىلىندە, سونداي-اق كۇزدە بارلىق قۇرىلىس جۇمىستارىن ءبىتىرۋ جانە اپات سالدارىن تولىق جويۋ جونىندە مىندەت جۇكتەدىم, – دەدى پرەزيدەنت.
سونىمەن قاتار مەملەكەت باسشىسى سۋ تاسقىنىنىڭ سالدارىن ەڭسەرۋ ءۇشىن ءار ايماققا ەلدىڭ ءىرى كاسىپكەرلەرى بەكىتىلەتىنىن اتاپ ءوتتى.
ءوز كەزەگىندە تۇرعىندار سۋ تاسقىنىنىڭ زارداپتارىن جويۋعا جەدەل كومەك كورسەتىلىپ, قۇتقارۋ جۇمىستارىنىڭ ۋاقىتىلى جۇرگىزىلگەنى ءۇشىن العىستارىن ءبىلدىردى. ولاردىڭ ايتۋىنشا, بۇل اپات حالىقتىڭ بىرلىگىن ايقىن كورسەتتى. تابيعات اپاتىنىڭ العاشقى كۇندەرىنەن باستاپ ەرىكتىلەر, مەملەكەتتىك قىزمەتشىلەر, قۇقىق قورعاۋ ورگاندارى مەن توتەنشە جاعدايلار مينيسترلىگىنىڭ قىزمەتكەرلەرى, جالپى جاناشىر ادامداردىڭ بارلىعى جان-جاقتى كومەك كورسەتۋگە ۇمتىلعان.
پرەزيدەنت قازاق دالاسىنىڭ ءرامىزى سانالاتىن اقبوكەندەردىڭ كوبەيۋىنە توسقاۋىل قوياتىن شەشىمنىڭ كۇشىن جويىپ, وعان تىيىم سالىناتىنىن مالىمدەدى.
كەزدەسۋ سوڭىندا مەملەكەت باسشىسى كەلەسى جىلى الاش ارداقتىسى مىرجاقىپ دۋلاتوۆتىڭ 140 جىلدىعىنا ارنالعان ءىس-شاراعا قاتىسۋ ءۇشىن ارقالىق قالاسىنا بارۋدى جوسپارلاپ وتىرعانىن جەتكىزدى.
مەملەكەت باسشىسى قوستاناي وبلىسىنا جۇمىس ساپارى بارىسىندا سۋ تاسقىنى سالدارىن ەڭسەرۋگە جاردەمدەسكەن بيزنەس وكىلدەرى جانە ەرىكتىلەرمەن دە جۇزدەستى.
كەزدەسۋگە وڭىردەگى ماشينا جاساۋ, تاۋ-كەن, تاماق جانە اۋىل شارۋاشىلىعى ونەركاسىبى سالالارىنىڭ جەتەكشىلەرى, قازاقستان حالقى اسسامبلەياسىنىڭ جەرگىلىكتى وكىلدەرى, وبلىستىق جاستار رەسۋرستىق ورتالىعىنىڭ ەرىكتىلەرى جانە ستۋدەنتتەر قاتىستى.
قاسىم-جومارت توقاەۆ شاعىن جانە ورتا بيزنەسكە قولداۋ كورسەتۋ باستى مىندەت ەكەنىن اتاپ ءوتتى.
– وسى كەزدەسۋگە ءبىراز مەتسەنات قاتىسىپ وتىر. مەن سىزدەرگە ريزاشىلىعىمدى بىلدىرەمىن. بۇل – سىزدەردىڭ جۇرەك قالاۋلارىڭىز, ازاماتتىق جاۋاپكەرشىلىكتەرىڭىزدىڭ كورىنىسى. مۇنىڭ ءبارىن ماراپات ءۇشىن ەمەس, شىنايى نيەتپەن جاسالعان يگى ءىس دەپ بىلەمىن, – دەدى پرەزيدەنت.
مەملەكەت باسشىسى سۋ تاسقىنىنان زارداپ شەككەن حالىققا ناقتى كومەك كورسەتۋ ىسىندە بيزنەسمەندەردىڭ ءرولى زور ەكەنىنە ايرىقشا نازار اۋداردى.
– ءبىزدىڭ ەلىمىزدە «Forbes» تىزىمىنە كىرەتىن ءىرى كاسىپكەرلەر بار. ولارمەن ارنايى كەزدەسەمىز. ولار ءار وبلىسقا, اۋدانعا, ەلدى مەكەنگە بەكىتىلەدى جانە ناقتى جاۋاپكەرشىلىك جۇكتەلەدى. بۇل ءبىر جاعىنان كاسىپكەرلەردىڭ مۇددەسىنە ساي كەلەدى. ويتكەنى ولار وزدەرىنىڭ قوسقان ۇلەسىنىڭ ناقتى ناتيجەسىن كورەتىن بولادى. حالقىنا قايىرىمدىلىق جاساعان ازامات رەتىندە سىزدەردىڭ دە ەسىمدەرىڭىز مەملەكەت تاراپىنان ەلەۋسىز قالمايدى, – دەدى قاسىم-جومارت توقاەۆ.
سونىمەن قاتار پرەزيدەنت ەرىكتىلەرگە زور قۇرمەتپەن قارايتىنىن جانە جان-جاقتى قولداۋ كورسەتەتىنىن اتاپ ءوتىپ, ولارعا ريزاشىلىق ءبىلدىردى.