وتكەن 2014 جىل قازاق ەلى ءۇشىن وتە تابىستى دا جەمىستى جىل بولدى. عىلىم سالاسىندا, ەكونوميكادا, ونەر مەن مادەنيەت, سپورت سالاسىندا قازاقستان تولايىم تابىستارعا قول جەتكىزدى. مەديتسينالىق جاڭالىقتار مەن ەل ەكونوميكاسىنا يننوۆاتسيا تارتۋ ىسىندە دە اۋىز تولتىرىپ ايتارلىقتاي ەلەۋلى جەتىستىكتەرىمىز بار. سپورت سالاسىندا ساڭلاق ۇلدارىمىز قازاق ەلىن الەمنىڭ دامىعان ەلدەرىنىڭ الدىنا شىعاردى, كوك تۋىمىزدى بيىك جەلبىرەتىپ, حالقىمىزدىڭ رۋحىن اسپانداتتى. الەمدىك ەكونوميكاداعى داعدارىستار مەن قيىنشىلىقتارعا قاراماستان, بىزدە حالىقتىڭ الەۋمەتتىك جاعدايىندا تۇراقتىلىق بايقالىپ, ءبىرشاما ءوسۋ مەن دامۋ ءۇردىسى قالىپتاستى.
وتكەن جىلداعى ەڭ ماڭىزدى جاڭالىقتىڭ ءبىرى – ەلىمىز ەۋرازيالىق ەكونوميكالىق وداقتىڭ قۇرىلۋىنا مۇرىندىق بولىپ, مەملەكەتتىڭ دامۋى ءۇشىن جاڭا مۇمكىندىك اشاتىن وسى ارىپتەستىك وداققا مۇشە بولدى. ودان وزگە رەسەي سەكىلدى تاعى ءبىر الىپ ەل, قۇداي قوسقان قوڭسىمىز قىتاي بار, ول ەلمەن دە ساياسي-ەكونوميكالىق تۇرعىدان تەڭ بولۋ ءۇشىن شانحاي ىنتىماقتاستىق ۇيىمى دەيتىن ۇيىمدا بىرلەسىپ وتىرمىز. ەندىگى ءبىر تىلەك, ءبىر ءۇمىت – كىندىك ازياداعى تۇركىتەكتەس ۇلتتارمەن وسى سەكىلدى اۋقىمدى وداق قۇرىپ, قويان-قولتىق قاتىناستا بولساق دەگەن نيەت بار. بۇل جونىندە دە ەلباسى نۇرسۇلتان نازارباەۆ حالىقارالىق جيىنداردا دا, جالپى مەملەكەتارالىق باسقوسۋلاردا دا ۇنەمى ايتىپ ءجۇر.
قازاقستان پرەزيدەنتى مەملەكەتىمىزدى كوپۆەكتورلى ساياسات ۇستاناتىن سارا جولعا سالعانى ءمالىم. ول كىسىنىڭ كەمەڭگەر ساياساتكەر ەكەندىگىن بۇگىندە بۇكىل الەم مويىنداعان. سونداي سارابدال ساياساتكەرلىگىنىڭ ارقاسىندا قازاقستاندى دۇنيەنىڭ ءتورت تارابىمەن بەيبىت ەل رەتىندە ارالاستىرىپ, ءوز وتانىمىزدىڭ تىنىشتىعى مەن تۇراقتىلىعىن ساقتاپ كەلەدى.
بيىلعى جىلدان دا كۇتەرىمىز كوپ. جالپى, عىلىم دەگەن ەل مەن ەلدى, ۇلت پەن ۇلتتى جاقىنداستىراتىن, بەيبىتشىلىكتىڭ ساقتالۋىنا قىزمەت ەتەتىن قۇرال. ءاربىر ەلدىڭ عىلىمىندا سول ەلدىڭ زيالى قاۋىمى الدىڭعى لەكتە بولادى. سوندىقتان دا عىلىمي تۇرعىدان قارىم-قاتىناس جاسالعاندىقتان, سول عالىمداردىڭ بايلانىسى ارقىلى مەملەكەتارالىق تاتۋلىق تا بەكي تۇسەدى. بىزدە تاۋەلسىزدىك العالى بەرى وتاندىق عىلىم سالاسىنا ەرەكشە كوڭىل ءبولىنىپ, مەملەكەت باسشىسى قازاقستان حالقىنا جاساعان ءاربىر جولداۋىندا حالقىمىزدى بىلىمگە, عىلىمعا, ەڭبەككە شاقىرۋدان تانباي كەلەدى.
ەلباسىنىڭ قازاقستان عىلىمىن دامىتۋعا دەگەن ىستىق ىقىلاسىنىڭ ءبىر ايعاعى, بىزدە عىلىمعا بولىنگەن قارجى 50 ميلليارد تەڭگەگە جۋىقتادى. بۇل دەگەنىڭىز قازاقستاننىڭ ىشكى جالپى ءونىمىنىڭ 0,20-0,25 پايىزىن قۇرايدى. مىنە, ەنشىسى بولەك ەل رەتىندە كىندىك ازياداعى وزگە مەملەكەتتەردىڭ جالپىسىن قوسقاندا ءبىزدىڭ عىلىمعا بولىنگەن قارجىمىزدىڭ جارتىسىنا دا جەتپەيدى. ءومىردىڭ ءوزى قالىپتاستىرعان اكسيوماعا سۇيەنسەك – «عىلىمسىز مەملەكەت وسپەيدى, ءىسى ورگە باسپايدى».
وسى ايتىلعان ويعا وراي, الداعى جىلدا وتاندىق عىلىم سالاسىندا ادامزات يگىلىگىنە جارايتىن سونى جاڭالىقتار اشىلىپ, ەل عالىمدارى تاعى ءبىر بيىككە كوتەرىلەدى دەپ سەنەمىن. وتكەن جىلدىڭ تابىسى بيىلعى جىلعا جۇعىستى بولسىن. بەرەكەسى مەن داۋلەتى ارتقان ەل رەتىندە ەلىمىزدىڭ ەكونوميكاسى بۇدان دا جاقسارىپ, وتاندىق عىلىم جاڭا ءبىر بەلەسكە شىعادى, حالقىمىز سونىڭ يگىلىگىن, جەمىسىن كورەدى دەگەن تىلەكتەمىن.
مۇرات جۇرىنوۆ,
ۇلتتىق عىلىم اكادەمياسىنىڭ
پرەزيدەنتى, اكادەميك.
الماتى.