ۇكىمەت قازاقستاننىڭ باتىس جانە سولتۇستىك وڭىرلەرىندەگى اۋقىمدى سۋ تاسقىنىن بولدىرماۋ جانە ونىڭ سالدارىن جويۋ ءۇشىن قاجەتتى كۇشتەر مەن قۇرالداردى جۇمىلدىردى.
بۇگىنگى تاڭدا اپاتتى-قۇتقارۋ جۇمىستارىنا تجم, قورعانىس مينيسترلىگى, ءىىم, ۇقك, مكق, اكىمدىكتەر مەن ۇيىمداردان تاۋلىك بويى 34 مىڭنان استام ادام, 4 مىڭنان استام تەحنيكا, 890 سورعى جانە 335 ءجۇزۋ قۇرالى, 19 اۋە كەمەسى تارتىلدى.
سۋ تاسقىنى باستالعالى بەرى باتىس قازاقستان, اتىراۋ, اقتوبە, قوستاناي جانە سولتۇستىك قازاقستان وبلىستارىنا اقمولا, الماتى, قاراعاندى, پاۆلودار, تۇركىستان جانە باسقا وبلىستاردان 1 مىڭنان استام ارنايى تەحنيكا مەن جەكە قۇرام جىبەرىلدى.
بۇگىندە زارداپ شەككەن وڭىرلەرگە قوسىمشا 500-دەن استام ارنايى تەحنيكا جولعا شىقتى. ولار 2 تاۋلىك ىشىندە جەتۋگە ءتيىس.
وسى ورايدا جەرگىلىكتى جەرلەردە وزەندەر مەن سۋ ايدىندارىنىڭ جانىندا ورنالاسقان ەلدى مەكەندەردى قىزىل سۋدان قورعاۋ بويىنشا قاجەتتى جۇمىستار جۇرگىزىلىپ جاتقانىن اتاپ وتكەن ءجون. قورعانىس قۇرىلىستارى مەن بوگەتتەر سالىنىپ, ەرىگەن قار سۋىن شىعارۋ قولعا الىنىپ, ينەرتتى ماتەريال تولتىرىلعان قاپشىقتار توسەلۋدە.
اەروۆيزۋالدى تەكسەرۋ مەن درونداردىڭ كومەگىمەن وزەندەردەگى جانە سۋ قويمالارىنداعى جاعدايعا تاۋلىك بويى مونيتورينگ جۇرگىزىلۋدە.