سولتۇستىك قازاقستان وبلىسىنان كەيىن پرەزيدەنت ۇشاعى قوستاناي وبلىسىنا قوندى. قاسىم-جومارت توقاەۆ وڭىردەگى قازىرگى احۋالمەن تانىسۋ ءۇشىن تىكۇشاقپەن سۋ باسقان اۋماقتاردى ارالاپ كوردى, دەپ جازادى Egemen.kz.
وبلىس اكىمى قۇمار اقساقالوۆ سۋ تاسقىنىنا بايلانىستى وڭىردەگى التى ايماقتا توتەنشە جاعداي جاريالانعانىن ايتتى.
وبلىستاعى 492 اۋىلدىڭ 11-ءى سۋ تاسقىنىنان زارداپ شەكتى. قازىر جاعداي تۇراقى. الايدا ءالى دە 51 ءۇي سۋ استىندا قالىپ وتىر. بۇدان بولەك 4 كوپىردى, 7 جول ۋچاسكەسىن سۋ شايىپ كەتكەن, 1414 ەلەكتر باعانىنا نۇقسان كەلدى. ناتيجەسىندە قوستاناي مەن وبلىستىڭ وڭتۇستىگىندەگى اۋداندار اراسىندا كولىك قاتىناسى قيىنداپ, 13 ەلدى مەكەندى ەلەكتر ەنەرگياسىمەن قامتاماسىز ەتۋ ماسەلەسىندە تۇيتكىلدەر پايدا بولدى.
سونىمەن قاتار پرەزيدەنتكە وبلىستىڭ نەگىزگى گيدروتەحنيكالىق نىساندارىنىڭ, اتاپ ايتقاندا قاراتومار, جوعارعى توبىل جانە جەلقۋار سۋ قويمالارىنىڭ جاي-كۇيى جونىندە مالىمەت بەرىلدى. قۇمار اقساقالوۆ ەلدى مەكەندەر مەن ينفراقۇرىلىمدارعا تونەتىن قاۋىپتىڭ الدىن الۋ ءۇشىن سۋ قويمالارىنان جىبەرىلەتىن سۋ مولشەرى ۇدايى باقىلاۋدا ۇستالاتىنىن ايتتى.
جالپى, وڭىردەگى دامبالاردى بەكىتۋ, ينەرتتى ماتەريالداردى توگۋ ناتيجەسىندە توبىل قالاسىن, امانگەلدى اۋدانىنىڭ ورتالىعىن جانە باسقا دا ەلدى مەكەندەردى سۋ باسۋ قاۋپىنەن ساقتاپ قالۋ مۇمكىن بولعان.