اقتوبەدەگى “دوستىق” ۇيىندە وتكەن ەسەنباي دۇيسەنباي ۇلىنىڭ شىعارماشىلىق كەشىنە ولەڭسۇيەر قاۋىم كوپ جينالدى. كەشتى اقىن مەيىرحان اقداۋلەت ۇلى جۇرگىزدى.
اقىن ەرتاي اشىقباەۆ ەسەنباي دۇيسەنباي ۇلىنىڭ شىعارماشىلىعى تۋرالى تەرەڭنەن قوزعاي كەلىپ “ەڭ باستى قازىعى – پوەزيا. ەڭ نازىك, ەڭ ادال, ەڭ مەيىرىمدى, ەڭ سۇلۋ پوەزيا. قالىڭ وقىرمانىن ەڭ العاشقى كىتابىمەن-اق مويىنداتقان اقىندار وتە سيرەك. ەسەنباي دۇيسەنباي ۇلى سول سيرەكتەردىڭ ءبىرى”, – دەپ وي تۇجىرىمدادى.
1971 جىلى جارىق كورگەن “بوزبالا تاڭ مەن بوزتورعاي” دەپ اتالاتىن ولەڭدەر جيناعىنان كەيىن اقىن قالىڭ وقىرمانىنا ءار جىلدارى “اق پەيىل”, “ۇلانعايىر”, “اشىق اسپان”, “اقجەلكەندى اعىستار”, ء“بىزدىڭ تولقىن” , “اشىق حات” جيناقتارىن ۇسىنىپ, جاۋھار جىرمەن سۋسىنداتقانى بەلگىلى.
كەشكە اقىندى قۇتتىقتاۋ ءۇشىن استانا مەن الماتىدان كەلگەن جازۋشى, جەرلەسىمىز قاجىعالي مۇقانبەتقاليەۆ پەن مىرزاعالي ىڭىرباەۆ ونىڭ شىعارماشىلىق ساتتەرىنەن سىر ساباقتادى. اقتوبە قالاسىنىڭ اكىمى ارحيمەد مۇحامبەتوۆ وبلىس اكىمى ەلەۋسىن ساعىندىقوۆتىڭ سالەمىن جەتكىزىپ, وبلىس باسشىسىنىڭ اتىنان ەسەنباي اقىننىڭ يىعىنا شاپان جاۋىپ, تەمىر تۇلپاردىڭ كىلتىن تابىس ەتتى. اقىننىڭ كىندىك قانى تامعان بايعانين اۋدانىنىڭ اكىمى بەردىحان كەمەشوۆ تە اقىنعا لايىقتى قۇرمەت كورسەتتى.
كەشتە ەسەنباي دۇيسەنباي ۇلى ءوز ولەڭدەرىن وقىدى. ولەڭ-ءومىرىن بوزالا تاڭ مەن بوزتورعاي بولىپ ورنەكتەگەن اقىن تۋعان جەرىنە, اقتوبەسىنە دەگەن ساعىنىشىن جۇرەگىنىڭ جىلى اعىسىنا وراپ ۇسىنعانداي اسەرگە بولەدى.
ساتىبالدى ءساۋىرباي.
اقتوبە وبلىسى.