قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ «ارمەنپرەسس» اقپارات اگەنتتىگىنە سۇحبات بەردى. اڭگىمە بارىسىندا مەملەكەت باسشىسىنا «الەمنىڭ ءار بولىگىندە جوعارى, كەيدە قايعىلى, تۋربۋلەنتتىك بايقالاتىن قازىرگى جاعدايدا حالىقارالىق قاتىناستاردا اۋماقتىق تۇتاستىق, شەكارالار مەن ەگەمەندىكتىڭ مىزعىماستىعى قاعيداتتارىن ۇستانۋ, سونداي-اق الىنعان مىندەتتەمەلەر مەن قول جەتكىزىلگەن ۋاعدالاستىقتاردىڭ ساقتالۋىن قامتاماسىز ەتۋ قانشالىقتى ماڭىزدى؟» دەگەن سۇراق قويىلدى, دەپ حابارلايدى Egemen.kz.
پرەزيدەنت قازىرگى زامانعى حالىقارالىق قۇقىق بەتپە-بەت كەلەتىن پروبلەمالار تۋرالى ءوز ۇستانىمىن بىرنەشە رەت ايتقانىن تىلگە تيەك ەتە كەلە, قازاقستان بۇۇ جارعىسىندا كورىنىس تاپقان حالىقارالىق قۇقىق نورمالارى مەن قاعيداتتارىنا ءوزىنىڭ ءپرينتسيپتى ادالدىعىن ۇنەمى ساقتايتىنىن, بۇل تۇرعىدا بۇۇ-نىڭ حالىقارالىق ىستەردەگى جانە بەيبىتشىلىك پەن تۇراقتىلىقتى ساقتاۋداعى ورتالىق ءرولى قازاقستان ءۇشىن بالاماسىز كۇيىندە قالىپ وتىرعانىن اتاپ ءوتتى.
«جاھاندىق قاۋىپسىزدىكتىڭ قازىرگى زامانعى ارحيتەكتۋراسى تەڭدەسسىز سىن-قاتەرلەرگە تاپ بولىپ وتىر. ءوسىپ كەلە جاتقان بۇعاتتىلىق, گەوساياسي فراگمەنتتەۋ جانە حالىقارالىق قۇقىق قاعيداتتارىنىڭ بۇزىلۋى حالىقارالىق ينستيتۋتتاردىڭ ءرولى مەن بەدەلىنە نۇقسان كەلتىرە وتىرىپ, سەنىمسىزدىك داعدارىسىن كۇشەيتەدى. نەگىزگى كوپجاقتى كەلىسىمدەردى ساقتاماۋ, توقتاتا تۇرۋ جانە ودان شىعۋ پراكتيكاسى اسا الاڭداۋشىلىق تۋعىزادى, ويتكەنى ول قايتىمسىز سالدارلارعا اكەپ سوعۋى مۇمكىن. ءار ادام بەيبىتشىلىككە قول جەتكىزۋ جولىن ءوز بەتىنشە قابىلداعاندا جانە باسقالاردىڭ مۇددەسىنە قاراماي, ءوز بەيبىتشىلىك ۇلگىسىن العا جىلجىتقاندا, بۇل شيەلەنىس كوزىنە اينالادى», دەدى ق.توقاەۆ.
مەملەكەت باسشىسى قاسىم-جومارت توقاەۆتىڭ ايتۋىنشا, وسىعان بايلانىستى كەز كەلگەن قايشىلىقتاردى, ونىڭ ىشىندە مەملەكەتتەردىڭ اۋماقتىق تۇتاستىعىنا قاتىستى قايشىلىقتاردى بۇۇ جارعىسىنىڭ نورمالارى مەن قاعيداتتارىنا سايكەس ساياسي-ديپلوماتيالىق ديالوگ ارقىلى عانا شەشۋ قاجەت. بۇۇ شەڭبەرىندە بەكىتىلگەن قۇندىلىقتار جۇيەسى الەمدەگى قاۋىپسىزدىك پەن تۇراقتىلىقتى قامتاماسىز ەتۋ ءۇشىن باعدار بولىپ قالۋعا ءتيىس.
«قازاقستان حالىقارالىق ىستەردە ادىلەتتىلىككە, بەيبىتشىلىككە, ىنتىماقتاستىققا جانە مەملەكەتتەردىڭ تەڭ قۇقىقتىلىعىنا نەگىزدەلگەن شەشىمدەرگە دەگەن ورتاق ۇمتىلىسىن بولىسەدى. وسى تۇرعىدا ءبىز ء«ادىل بەيبىتشىلىك پەن كەلىسىم ءۇشىن الەمدىك بىرلىك تۋرالى» باستامانى ىلگەرىلەتىپ كەلەمىز جانە بارلىق سەرىكتەستەرىمىزدىڭ قولداۋىنا سەنەمىز.قازىرگى كەزەڭدە تەك قانا مەملەكەتتەردىڭ ۇجىمدىق كۇش-جىگەرى, دانا, جوعارى كاسىبي ديپلوماتيا الەمدەگى ۇزاق مەرزىمدى تۇراقتىلىققا جانە جالپىعا ورتاق پروگرەسكە, بۇۇ جارعىسى نەگىزىندە حالىقارالىق قاتىناستاردىڭ ءادىل جۇيەسىن قۇرۋعا الىپ كەلەتىنىنە سەنىمدىمىن», دەدى قر پرەزيدەنتى.