مەملەكەت باسشىسى قاسىم-جومارت توقاەۆتىڭ «تازا قازاقستان» ەكولوگيالىق اكتسياسى باستاماسىن تۇركىستان وبلىسىنىڭ تابيعات جاناشىرلارى قۋانىشپەن قابىلداپ, جۇمىستى باستاپ كەتتى.
«بەلسەندى دەمالىس» ساياباعىنا اعاش وتىرعىزىپ, اكتسياعا قولداۋ بىلدىرگەن وبلىس اكىمى دارحان ساتىبالدى جاستارمەن جۇزدەسىپ, پىكىر الماستى. وتانشىلدىق – تازالىقتان باستالاتىنىن ايتىپ, اعاش ەگىپ, تۋعان جەردىڭ تازالىعىن ساقتاۋ, تابيعاتىن قورعاۋ ءاربىر ادامنىڭ مىندەتى ەكەنىن جەتكىزدى. مەملەكەت باسشىسىنىڭ تاپسىرماسى اياسىندا 2021-2025 جىلدار ارالىعىندا وڭىردەگى 800-دەن استام ەلدى مەكەندى كوگالداندىرۋ ءۇشىن 4 ميلليوننان استام كوشەت ەگۋ كوزدەلگەن. بيىلدىڭ وزىندە ميلليوننان استام كوشەت ەگىلەدى.
«كوشەسىنىڭ تازالىعىنا قاراپ, ازاماتىن, حالقىن تانيسىڭ. «تازا ولكە – تۇركىستان» اكتسياسى شەڭبەرىندە وتكەن اپتادان بەرى اۋدان, قالالاردا تازالىق, كوگالداندىرۋ جۇمىستارى باستالىپ كەتتى. بۇل – ءبىر ايلىق ناۋقان ەمەس. ماقساتىمىز – تازالىق ساقتاۋ, اعاش, گۇل ەگۋدى ومىرلىك داعدىعا اينالدىرۋ. وسى سالاعا جاۋاپتى باسقارمالارعا, اۋدان, قالا اكىمدەرىنە, كوممۋنالدىق مەكەمەلەرگە ناقتى تاپسىرمالار بەرىلدى. ارنايى تەحنيكالار, رەسۋرستار ءبولىندى. تاۋلار دا, ورماندار دا, وزەن-كولدەر دە, بايتاق دالا دا, اۋىلدار دا, قالالار دا – بىزدىكى. وسى بايلىعىمىزعا جاناشىرلىقپەن قارايىق! بارشا تۇركىستان ءوڭىرىنىڭ تۇرعىندارىن وسى اكتسيانى قولداۋعا شاقىرامىن! بىرلىك پەن ەڭبەكتىڭ ارقاسىندا تۇركىستانىمىزدى جاسىل ايماققا اينالدىرايىق!», دەدى وبلىس اكىمى دارحان ساتىبالدى.
«تازا ولكە» اكتسياسى باستالعالى بەرى وبلىستا 1500 كوشە جانە 33 مىڭنان استام اياقجول تازالانىپ, 850 توننا قوقىس شىعارىلدى. سونداي-اق 140 مىڭنان استام اعاش اكتەلىپ, 138 مىڭعا جۋىق كوشەت وتىرعىزىلدى. بۇدان بولەك 275 ساياباق جانە سكۆەر, 192 دانا بالالار جانە سپورت الاڭشالارى تازالاندى. بۇل ءىس-شارالارعا 279 تەحنيكا جانە 15 مىڭنان استام ادام قاتىستى. وسىلايشا كۇنى كەشە 10 ءساۋىر مەن 11 مامىر ارالىعىندا وتەتىن «تازا ولكە – تۇركىستان» ناۋقانى باستالدى. ءار اپتاعا ارنايى ات بەرىلىپ, ءتۇرلى باعىتتا ەكولوگيالىق ءىس-شارالار ۇيىمداستىرىلاتىن بولادى.
تۇركىستان