ەلىمىزدە «تازا قازاقستان» ەكولوگيالىق اكتسياسى باستالدى. يگى باستاما بەس اپتاعا سوزىلماقشى. جەتى كۇننىڭ وزىندىك تاقىرىبى مەن ماقساتى بەلگىلەنگەن. ناۋقانعا مەملەكەت باسشىسى قاسىم-جومارت توقاەۆتىڭ تاپسىرماسى اياسىندا مادەنيەت جانە اقپارات مينيسترلىگى ۇيىتقى بولعان.
مەملەكەت باسشىسى قاسىم-جومارت توقاەۆ وبلىستار مەن قالالاردىڭ اكىمدەرىنە اۋماقتاردى اباتتاندىرۋ, كوگالداندىرۋ جونىندە بىرقاتار تاپسىرما بەردى. ونىڭ ىشىندە cۋ تاسقىنىنا ۇشىراماعان وبلىستار مەن قالالاردىڭ اكىمدەرىنە كوشەلەردى تازارتۋ, كوگالداندىرۋ جانە ەلدى مەكەندەردىڭ اۋماقتارىن اباتتاندىرۋ ناۋقانىن باستاۋدى تاپسىردى. سونىمەن قاتار جولداردى رەتكە كەلتىرۋ مىندەتى جۇكتەلدى. وسىعان وراي قولعا الىنعان اكتسيانىڭ العاشقى جۇماسى «تازا ولكە» دەپ اتالىپ, وڭىرلەردەگى تۇرعىندار مەن قوعام بەلسەندىلەرى, مەكەمەلەر ءوز اۋلا-جايىن تازارتۋعا كىرىستى. 20 ساۋىرگە دەيىن جالعاساتىن ناۋقاننىڭ ەكىنشى اپتاسىنا «كيەلى مەكەن» اتاۋى بەرىلگەن. بۇل كۇندەرى تاريحي-مادەني ەسكەرتكىشتەر اۋماعىن اباتتاندىرۋ جۇمىستارى جۇرگىزىلەدى. 27 ساۋىرگە دەيىنگى ءۇشىنشى جۇماعا «جاسىل ايماق» تاقىرىبى قويىلىپ, كوشەتتەر وتىرعىزىلىپ, اعاشتاردىڭ ءتۇبى اكتەلەدى. «ونەگەلى ۇرپاق» دەيتىن ءتورتىنشى اپتادا ارداگەرلەر سارايى مەن قارتتار ۇيلەرىنىڭ اۋماقتارىن تازارتۋ كوزدەلگەن. سوڭعى بەسىنشى اپتادا ء«مولدىر بۇلاق» اتاۋىمەن وزەن-بۇلاقتاردىڭ ارناسى قوقىستان تازارتىلادى.
«نەگىزگى ماقسات – حالىق اراسىندا قوعامدىق جانە ەكولوگيالىق مادەنيەتتى قالىپتاستىرۋ, وتانسۇيگىشتىك, تۋعان جەرگە جانە قورشاعان ورتاعا دەگەن جاناشىرلىق پەن قۇرمەت قۇندىلىقتارىن دارىپتەۋ. ونىڭ اياسىندا قىستان كەيىن ەلدى مەكەندەردى تازارتۋ جانە اباتتاندىرۋ جۇمىستارىنا ازاماتتاردى كەڭىنەن تارتۋ جانە وسى ءىس-شارالارعا بەلسەندى جاستاردىڭ, ەرىكتىلەردىڭ الەۋەتىن جۇمىلدىرۋ كوزدەلىپ وتىر. جالپى, ەلدى مەكەندەردى اباتتاندىرۋ جۇمىستارى ءداستۇرلى تۇردە جۇرگىزىلەدى. بىراق ءدال وسىنداي فورماتتا اكتسيا العاشقى رەت ۇيىمداستىرىلىپ وتىر. ءىس-شارالار وڭىرلەردىڭ وزىندىك جوسپارىنا سايكەس اپتا بارىسىندا وتكىزىلەدى. نەگىزگى ەكپىن – ءاربىر اپتانىڭ سەنبىسى. ياعني حالىقتىڭ ءارتۇرلى ساناتىن كەڭ قامتۋىمەن وتكىزىلەتىن نەگىزگى تاقىرىپتىق ءىس-شارالار ءدال وسى كۇنى وتكىزىلۋگە ءتيىس. سونىمەن بىرگە اكتسيا اياسىنداعى اپتانىڭ ءاربىر كۇنى جەكەلەگەن ءوڭىردىڭ باستامالارى جۇزەگە اسادى. مىسالى, 8 ءساۋىر – الماتى قالاسى, 9 ءساۋىر – قىزىلوردا وبلىسى, 10 ءساۋىر – جامبىل وبلىسى, 11 ءساۋىر – تۇركىستان وبلىسى, 12 ءساۋىر – شىمكەنت قالاسى جانە تاعى سول سياقتى», دەدى مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ توراعاسى قايرات قامباروۆ.
جوبا ەلوردادا 13 ءساۋىر مەن 11 مامىر ارالىعىندا «تازا قازاقستان. استانا – تازالىق پەن ءتارتىپتىڭ ۇلگىسى» اتاۋىمەن وتەدى. ەكولوگيالىق ايلىق اياسىندا قالانى, نوسەر جانە ارىق كارىز جەلىلەرىن سانيتارلىق تازارتۋ, كوشەلەردى, تروتۋارلار مەن اۋماقتاردى, ساياباقتار مەن سكۆەرلەردەگى جاسىل جەلەكتەردى كۇتۋ بويىنشا ماۋسىمدىق اگروتەحنيكالىق جۇمىستار جۇرگىزىلەدى. سونداي-اق 270 مىڭنان استام اعاش وتىرعىزىلماقشى.
بۇگىندە اكتسياعا وڭىرلەر دە بىرتىندەپ قوسىلىپ جاتىر. ماسەلەن, الماتى قالاسىنداعى العاشقى ءىس-شارا «الماتى – ءبىزدىڭ ورتاق ءۇيىمىز» جالپىقالالىق ناۋقانى اياسىندا ءوتتى. الىپ شاھاردىڭ 8 شاعىن اۋدانىندا كوممۋنالدىق قىزمەتتەر مەن مەردىگەرلىك ۇيىمدار ساياباقتار مەن پاركتەردە تازالىق جۇمىستارىن جۇرگىزدى. الماتى قالالىق موبيلدىلىك باسقارماسى مەن اۋدان اكىمدىكتەرى ءبىر ايدا 480 باعدارشام, 1 765 ايالداما پاۆيلونىن رەتكە كەلتىرىپ, 300 مىڭ شارشى مەتر جولدى جوندەۋگە كىرىسەدى.
ء«بىزدىڭ قالا – ءبىزدىڭ اۋلا, ءبىزدىڭ ءۇي» اپتالىعىندا 20 مىڭنان استام اعاش پەن بۇتا كوشەتى وتىرعىزىلادى. اعاش وتىرعىزامىن دەگەندەرگە كوشەت, ال جەكە ۇيلەردىڭ قورشاۋىن سىرلاعىسى كەلەتىندەرگە بوياۋ بەرىلەدى. وسى كەزەڭدە تابيعاتتى ساقتاۋعا ارنالعان ءتۇرلى شىعارماشىلىق ءارى ەكولوگيالىق ءىس-شارا وتەدى. ونىڭ قاتارىندا ءدامحانالار مەن مەيرامحانالاردان تاماق قالدىقتارىن جيناۋ, مەرزىمى وتكەن ءدارى-دارمەكتى وتكىزۋ سياقتى جوبالار بار. مۇنىڭ بارلىعى قورشاعان ورتانى ساقتاۋعا باعىتتالعان. جالپى, ناۋقان ءبىر ايعا سوزىلادى. وعان كوممۋنالدىق قىزمەتتىڭ جۇمىسشىلارى عانا ەمەس, قالا تۇرعىندارى دا, كاسىپكەرلەر دە قولىنان كەلگەنشە اتسالىسا الادى. وسىندا تۇرىپ جاتقان ءاربىر ادام – قالانىڭ ءبىر بولشەگى. ەگەر ءبارىمىز شاھاردىڭ تازالىعىنا, كوگالداندىرۋعا ۇلەس قوسساق, الماتىمىز بۇدان دا كوركەيە تۇسەدى», دەدى الماتى قالاسى اۋەزوۆ اۋداندىق كورىكتەندىرۋ ءبولىمىنىڭ باس مامانى ەرتاي قۇرمانعاليەۆ.
ال تۇركىستان وبلىسىندا جوبا اياسىندا 200 مىڭنان اسا كوشەت وتىرعىزىلدى. ءىس-شارا «سەنبىلىك – تازالىق ايناسى» اتاۋىمەن ۇيىمداستىرىلىپ, جەرگىلىكتى اكىمدىكتەر, بارلىق مەملەكەتتىك مەكەمە مەن كاسىپكەرلىك ۇيىمدار, ەرىكتىلەر, اۋدان, قالاداعى جاستار ورتالىقتارى دا اتسالىستى. اباتتاندىرۋ, كوگالداندىرۋ جانە تازالىق جۇمىستارىن ساپالى جۇرگىزبەگەن بيلىك وكىلدەرىنە سىن-ەسكەرتپە دە ايتىلدى. ماسەلە تۇركىستان وبلىسى اكىمى اپپاراتىنىڭ اپتالىق ماجىلىسىندە ارنايى قارالدى.
وبلىس اكىمىنىڭ ءبىرىنشى ورىنباسارى زۇلپىحار جولداسوۆتىڭ ايتۋىنشا, مەملەكەت باسشىسىنىڭ وسى سالاعا قاتىستى تاپسىرمالارىن ورىنداۋ ماقساتىندا 2024–2026 جىلى قالالاردى كوگالداندىرۋ جانە اباتتاندىرۋ جول كارتاسى بەكىتىلگەن.
اكتسيانى قولداعان ۇلىتاۋ وبلىسىنداعى 437 ەڭبەك ۇجىمىنان 6 مىڭنان استام اعايىن سەنبىلىككە شىعىپ, 110 ارنايى تەحنيكا جۇمىلدىرىلىپ, 470 گەكتار اۋماق قوقىستان تازارتىلىپتى. جاڭا قوقىس جاشىكتەرى ورناتىلىپ, 965 اعاشتىڭ قۋراعان بۇتاقتارى كەسىلگەن.
قورشاعان ورتانىڭ تازالىعىنا جاۋاپكەرشىلىكپەن قاراۋ – ءار ازاماتتىڭ باستى مىندەتى. مۇنى ەسكەرگەن شىمكەنتتىكتەر دە «تازا قازاقستان» اكتسياسى اياسىندا تازالىق جۇمىستارىن باستادى. جيىلعان جۇرت كوشەلەردى سىپىرىپ, ارىقتار مەن جول جيەگىندەگى قوقىستاردى جيناپ, ايالدامالاردىڭ ءارىن كەلتىردى.