سۋ باسقان ەلدى مەكەندەردەن ەۆاكۋاتسيالانعان تۇرعىنداردىڭ ءبىرازى قوستانايداعى «Agromash» زاۋىتىنىڭ جاتاقحاناسىن پانا ەتىپ ءجۇر. كومپانيا وكىلدەرىنىڭ ايتۋىنشا, جاتاقحانادا ءالى ەكى بولمە بوس تۇر.
سۋ تاسقىنىنا قارسى تولاسسىز اتقارىلىپ جاتقان ءىس-شارالارعا كوپپەن بىرگە جەرگىلىكتى ماشينا جاساۋ كاسىپورىندارى دا اتسالىسىپ جاتىر. تۇرعىنداردى ەۆاكۋاتسيالاۋ, وزگە دە تولىپ جاتقان شارۋالاردىڭ ىشىندە 250-گە جۋىق ماشينا جاساۋشى مامان ءجۇر.
مۇنىڭ سىرتىندا, تەحنيكا كۇشىن قاجەت ەتەتىن جەرلەردە «Allur» زاۋىتىنىڭ 11 اۆتوبۋسى, 15 جۇك كولىگى, 3 ارنايى تەحنيكاسى جۇمىس ىستەپ جاتىر. كاسىپورىندار جۇمىس باسىنداعىلاردى قاجەتتى دۇنيەلەرمەن, اۋىز سۋ, ىستىق تاماقپەن قامتاماسىز ەتىپ جاتىر.
«مۇنداي قيىن كەزەڭدە جۇمىلىپ جۇدىرىق بولىپ, اۋىرتپالىقتى كوپپەن بىرگە كوتەرە ءبىلۋ ماڭىزدى. وسىنداي قيىن-قىستاۋ ساتتە وزگە دە بيزنەس وكىلدەرىن كوپتىڭ كولەڭكەسىندە قالماي, سۋ تاسقىنىنان زارداپ شەگىپ جاتقان تۇرعىندارعا كومەك قولىن سوزۋعا شاقىرامىز», دەيدى ماشينا جاساۋ كاسىپورىندارىنىڭ وكىلدەرى.
قوستاناي وبلىسى