اتىراۋ وبلىسىنىڭ اۋماعىندا بەس وزەن بار. ونىڭ ۇشەۋى باستاۋىن اقتوبە وبلىسىنان, ەكەۋى رەسەيدەن الادى. سۋ تاسقىنىنا بايلانىستى جاعداي وتە كۇردەلى كۇيىندە قالىپ وتىر.
30 مىڭعا جۋىق ادام ەۆاكۋاتسيالاندى
جىلىوي اۋدانىندا 86 939 تۇرعىن تۇرادى. ولاردىڭ اراسىندا زەينەت جاسىنداعى 7 400, مۇگەدەكتەر ساناتىنداعى 2 465, كامەلەتكە تولماعان 37 069 بالا, ءسابي كۇتىپ جۇرگەن 1 004 جۇكتى ايەل بار. تۇرعىنداردىڭ 60 مىڭنان استامى قۇلسارى قالاسىندا تىركەلگەن.
جىلىوي اۋدانى اكىمدىگىنىڭ مالىمەتىنشە, 4 ساۋىردە تاسقىن سۋدىڭ قاۋپىنە بايلانىستى توتەنشە جاعداي جاريالاندى. ال 5 ساۋىردە جەم وزەنىندەگى سۋ كوتەرىلىپ, سونىڭ سالدارىنان قۇلسارى قالاسىنىڭ ورتاسىمەن اعاتىن قۇرساي وزەگى ارناسىنان استى. تاسقىن سۋ الدىمەن مونوقالاداعى «جادىراسىن» شاعىن اۋدانىنا, 2 جانە 3-اۋىلعا كىردى.
ءبىر كۇندە قۇلسارى قالاسىنداعى 500-دەن اسا نىساندى تاسقىن سۋ باستى. ونىڭ ىشىندە تۇرعىن ۇيلەر, الەۋمەتتىك نىساندار, اكىمدىك عيماراتى مەن ساۋدا ورتالىعى بار. ورتالىق ستاديون دا تاسقىن سۋدىڭ ورتاسىندا قالدى. كەشە سۋ باسقان نىساندار 2 800-دەن استى. 6 بيزنەس نىسانىنىڭ اۋلاسىنا سۋ كىرگەن.
وبلىستىق جەدەل شتابتىڭ مالىمەتىنشە, تاسقىن سۋ قاۋپىنە بايلانىستى 31 ناۋرىزدان بەرى اۋدان ورتالىعىنان تۇرعىندار قاۋىپسىز جەرگە كوشىرىلىپ جاتىر. 7 ساۋىردە ساعات 08.00-گە دەيىن قۇلسارى قالاسىنداعى «اتىراۋ», «دوستىق», «ميراس», «جادىراسىن», «مەرەي», «شۇعىلا», مەشىت ماڭى اۋىلىنان قاۋىپسىز جەرگە ەۆاكۋاتسيالانعاندار سانى 29 545 ادامعا جەتتى. ونىڭ ىشىندە 7 396 بالا بار. ەۆاكۋاتسيالىق پۋنكتتەرگە 8 011 ادام ورنالاستىرىلدى. ولاردىڭ 4 578-ءى – بالالار.
وبلىس اكىمىنىڭ ورىنباسارى جاسۇلان بيسەمبيەۆتىڭ مالىمەتىنشە, جىلىوي اۋدانىنىڭ تۇرعىندارىن ءۇش باعىتقا – ماڭعىستاۋ وبلىسىنا, اتىراۋ قالاسى مەن «تەڭىز» كەن ورنىنداعى ۆاحتالىق كەنتىنە كوشىرۋ ءجۇرىپ جاتىر. ماسەلەن, ۆاحتالىق قالاشىقتا 10 مىڭ ورىن دايىندالعان. قازىر وعان 6 577 تۇرعىن ەۆاكۋاتسيالاندى.
جىلىوي اۋداندىق ورتالىق اۋرۋحاناسىنىڭ باس دارىگەرى اسۇلان ابدراحمانوۆتىڭ ايتۋىنشا, 70 ناۋقاس كورشىلەس وڭىرگە جەتكىزىلگەن. ناۋقاستاردى ماڭعىستاۋداعى بەينەۋ اۋداندىق اۋرۋحاناسىنا تاسىمالداۋ ءۇشىن 14 جەدەل جاردەم كولىگى, 2 اۆتوبۋس بولىنگەن.
«جاعدايى اۋىر ناۋقاستاردى تاسىمالداۋعا رەانيماتولوگ, انەستەزيولوگ دارىگەرلەرى مەن تولىق جابدىقتالعان يۆل اپپاراتىن قوسا جىبەردىك. جاتىپ باراتىن ناۋقاستار جەدەل جاردەم كولىگىمەن, وزگەلەرى اۆتوبۋسپەن قاتىنادى», دەدى ا.ابدراحمانوۆ.
سونىمەن قاتار قۇلسارى قالاسىندا ەكى ادامنىڭ مۇردەسى تابىلدى. اتىراۋ وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبى ءمالىم ەتكەندەي, ەكى ەر ادام 6 ساۋىردە تراكتورمەن اۋدارىلىپ كەتكەن. «جىلىوي اۋدانىنىڭ قۇلسارى قالاسىندا 1974 جىلعى ەر ادام دوسىمەن بىرگە رۇقسات ەتۋ قۇجاتىنسىز سۋ باسقان تۇرعىن ءۇيدى تەكسەرۋ ءۇشىن تراكتورمەن بارماق بولعان. الايدا تراكتور جولدان شىعىپ كەتىپ, اۋدارىلىپ قالدى. ولاردىڭ مۇردەسى 7 ءساۋىر كۇنى ساعات 11:00 شاماسىندا تابىلدى», دەپ حابارلادى دەپارتامەنتتىڭ قوعاممەن بايلانىس توبى. ىزدەۋ جۇمىستارىنا جەكە قۇرامنان 3 ادام جانە 1 ءجۇزۋ قۇرالى جۇمىلدىرىلدى.
جايىقتان قاۋىپ تونە مە؟
اتىراۋ وبلىسى اكىمىنىڭ ورىنباسارى ج.بيسەمبيەۆتىڭ ايتۋىنشا, جىلىوي اۋدانىندا تاسقىن سۋمەن كۇرەسۋگە دايىندىق ەكى اپتا جۇرگىزىلگەن. بىراق تاسقىن سۋ بوي بەرمەدى. ەندى يندەر, ماحامبەت اۋداندارى مەن اتىراۋ قالاسى ورنالاسقان جايىق وزەنىنەن قاۋىپ ءتونۋ مۇمكىن بە؟ بۇل ساۋال اتىراۋلىقتاردى الاڭداتىپ وتىر.
«سۋ باسۋ قاۋپى رەسەيدەگى ورىنبور, كورشىلەس ورال قالالارىنداعى تاسقىننان كەم بولمايدى دەگەن بولجام بار. البەتتە دايىندىق ءجۇرىپ جاتىر. وڭىردەگى قۇرىلىس يندۋسترياسى, مۇناي سالاسىنداعى 26 كومپانيا جايىق وزەنىنىڭ جاعالاۋىن بەكىتۋگە كىرىستى. قاجەتتى قاپ, كۇرەك جانە ينەرتتى زاتتار ماتەريالداردىڭ رەزەرۆى دايىندالدى», دەيدى ج.بيسەمبيەۆ.
ونىڭ دەرەگىنە سۇيەنسەك, يندەر اۋدانىندا جايىق وزەنىنىڭ جاعالاۋىنداعى قاۋىپتى اۋماقتارعا 10 كم بوگەت سوعىلىپ, 37 مىڭ 950 قاپ پايدالانىلدى. ال ماحامبەت اۋدانىنداعى ەلدى مەكەندەردى سۋدان قورعاۋ بوگەتىنىڭ جالپى ۇزىندىعى – 80 كم.
«جايىق جاعاسىنداعى 17 ەلدى مەكەندەگى 9 قورعانىس بوگەتى وسال. ولار تالدىكول, بەيبارىس, العا, ماحامبەت, سارىتوعاي, ەسكى سارايشىق, ەڭبەكشىل, ەسبول جانە ورتاقشىل اۋىلدارى تۇسىندا ورنالاسقان. ال اتىراۋ قالاسىندا جاعالاۋداعى 12 اۋماقتى بەكىتۋگە 172 تەحنيكا تارتىلدى. بيىكتىگى 2 مەتر, جالپى ۇزىندىعى 7 كم بوگەت سالىندى», دەدى ج.بيسەمبيەۆ.
اكىم ورىنباسارىنىڭ ايتۋىنشا, اتىراۋ قالاسىندا جايىق جاعالاۋىنداعى جۇمىستاردى اتقارۋعا 5 مىڭنان اسا ادام كىرىسكەن. بۇل ىسكە 4 مىڭعا جۋىق ەرىكتىلەر توبى ۇلەس قوسىپ ءجۇر. الايدا بۇل ءالى دە جەتكىلىكسىز بولىپ وتىر. سەبەبى ورىنبور وبلىسىنداعى يريكلا سۋ قويماسىنان جىبەرىلگەن سۋ مولشەرى كۇن سايىن ءوسىپ وتىر. مۇنداي سۋ كولەمى وسى كەزگە دەيىن بولماعان. سوندىقتان جايىق جاعالاۋىنداعى بوگەتتى بيىكتەتىپ, بەكىتۋ قاجەت. «كوپ تۇكىرسە – كول» دەگەندەي, ءار ادام ءبىر قاپ قۇمدى جاعاعا اكەلسە, ۇلكەن بەكەت بولارى ءسوزسىز.
اتىراۋ وبلىسى