كومەكتىڭ العى شەبىندە – اسكەري ۇشقىشتار

اقتوبە قالاسىنىڭ اۋە قورعانىسى كۇشتەرى مەن ۇشقىشتار دايىندايتىن ينستيتۋتتىڭ ۇشۋ ەكيپاجدارى جەرگىلىكتى حالىقتى ەۆاكۋاتسيا­لاۋ, مامانداردى تاسىمالداۋ جانە گۋما­نيتارلىق جۇكتەردى جەتكىزۋ شارالارىن جال­عاستىرىپ جاتىر. اسكەري اۆياتسيا بورتىمەن 50 ادام تاسىمالداندى.

سۋ تاسقىنىنا قارسى ءىس-شارالارعا سول­تۇستىك قازاقستان, قوستاناي وبلىس­تا­رىنىڭ اۋماقتىق قورعانىس بريگادالارى جۇ­مىل­دىرىلدى. قىزىلجار اۋدانى تەپ­ليچ­نوە اۋلىندا اسكەري قىزمەتشىلەر بوگەتتى كۇ­شەيتۋمەن اينالىستى. قوستانايدا توبىل وزە­نىنىڭ جاعالاۋىن نىعايتۋ جۇمىستارى جۇرگىزىلدى. قوستاناي وبلىسىنىڭ ارقالىق قالاسىنان 85 شاقىرىم جەردە قىزىل جۇلدىز ەلدى مەكەنىندە اسكەريلەر اكىمدىكتىڭ جەدەل شتا­بىنا 20 ورىندىق ارميا شاتىرىن ورنالاستىردى.

قاراعاندى وبلىسىندا «استانا» وڭىرلىك قولباسشىلىعى 44803, 55524 اسكەري بولىمدەرىنىڭ جانە موتواتقىشتار بريگاداسىنىڭ اسكەري قىزمەتشىلەرى قۇم سالىنعان قاپتاردى دا­يىنداپ, توسەۋمەن, سۋ ايداۋمەن, كانالداردى تازالاۋمەن, ۇيلەردىڭ اينالاسىنداعى قاردى تازالاۋمەن جانە بوگەتتەر اينالاسىنا ۇيىندىلەر جاساۋمەن اينالىستى. جۇمىستار كوبەتەي, نۇرا, ەگىندى, مىڭباي, كەرتىندى ەلدى مەكەن­دەرىندە جۇرگىزىلدى.

ورال قالاسىندا اۋماقتىق قورعانىس بريگا­دا­سىنىڭ اسكەري قىزمەتشىلەرى بايتەرەك اۋدانىنىڭ «جىراۋ» ساياجاي الابىندا 1200 قاپ قۇم جانە «از اۋىل» شاعىن اۋدانىندا 1300 قاپ دايىندادى.

«باتىس» وڭىرلىك قولباسشىلىعى 41433 اسكەري ءبولىمىنىڭ اسكەري قىزمەتشىلەرى اتى­راۋ وبلىسىنىڭ قۇلسارى قالاسىندا قۇل­ساي وزە­نىنىڭ جاعالاۋىن كۇشەيتۋگە كو­مەك­تەستى, ال يندەر اۋدانىنىڭ قارابال اۋلىندا ويىل وزە­نى جاعالاۋىن كۇشەيتۋگە 1500 قاپ قۇم توسەل­دى.

جالپى, 27 ناۋرىز بەن 4 ءساۋىر ارالىعىندا قارۋلى كۇشتەردەن بارلىعى 1255 اسكەري قىز­مەتشى, 69 كولىك تەحنيكاسى, ارميا اۆيا­تسياسىنىڭ 10 تىكۇشاعى, اسكەري-كولىك اۆياتسياسىنىڭ 2 ۇشاعى جۇمىلدىرىلدى. ەكى مىڭنان اسا ادام ەۆاكۋاتسيالاندى, ونىڭ ىشىندە 590 بالا. 66 توننادان استام گۋمانيتارلىق جۇك تاسىمالدانىپ, 42 مىڭنان اسا قاپ قۇم توسەلدى, ءبىر جارىم شاقىرىم اعىن سۋ كارىزى تازارتىلدى.