قازاقستان حالقى اسسامبلەياسى ۆولونتەرلەرى تاسقىن سۋدان زارداپ شەككەن وڭىرلەرگە گۋمانيتارلىق كومەك جولدادى. ەتنو-مادەني ورتالىقتارى اتىنان قاراعاندى مەن اقمولا وبلىسىنا جول تارتقان ءۇش كولىككە 10 مىڭ توننا جۇك تيەلگەن. ىشىندە ازىق-ت ۇلىك پەن كيىم, جەكە تازالىق بۇيىمدارى مەن توسەك-جامىلعىلارى بار.
دوستىق ءۇيىنىڭ عيماراتىندا سۋ تاسقىنىنان زارداپ شەككەن وڭىرلەرگە گۋمانيتارلىق كومەك كورسەتۋ بويىنشا قازاقستان حالقى اسسامبلەياسىنىڭ رەسپۋبليكالىق جانە وڭىرلىك شتابتارىنىڭ بىرلەسكەن ونلاين وتىرىسى ءوتتى. جيىنعا قحا توراعاسىنىڭ ورىنباسارى – پرەزيدەنت اكىمشىلىگىنىڭ قحا حاتشىلىعىنىڭ مەڭگەرۋشىسى مارات ءازىلحانوۆ, پارلامەنت سەناتىنىڭ دەپۋتاتتارى, ەتنومادەني بىرلەستىكتەردىڭ توراعالارى مەن مۇشەلەرى, «اسسامبلەيا جاستارى» ۇيىمىنىڭ وكىلدەرى قاتىستى. كۇن تارتىبىندە وڭىرلىك شتابتارىنىڭ جۇمىسىن ۇيلەستىرۋ ماسەلەلەرى قارالدى.
– قايىرىمدىلىق ءىس-شاراسى قازاقستان حالقى اسسامبلەياسىنىڭ «جۇرەكتەن –جۇرەككە» ارنايى جوباسى اياسىندا ۇيىمداستىرىلدى. ءدال وسىنداي جۇك كولىكتەرى باسقا وڭىرلەردە دە جاساقتالىپ جاتىر. وڭىرلەردەگى شتاب, قاجەت جەرلەردى انىقتاپ, ءبىر ىزبەن جىبەرەتىن بولادى. ال ءبىز بۇل جۇمىستاردى سول ەلدى مەكەندەردى قالپىنا كەلتىرگەنگە دەيىن جۇرگىزەمىز. قارعىن سۋعا قارسى بارلىق ءىس-شارالاردا جانە قالپىنا كەلتىرۋ جۇمىستارى اياقتالعانشا مۇمكىندىگىنشە بالاباقشالار مەن ۇيلەردى رەتتەۋگە كومەكتەسەمىز, – دەدى مارات ءازىلحانوۆ.
ەلدە توتەنشە جاعداي جاريالاعالى بەرى قحا تاسقىن سۋدان زارداپ شەككەن تۇرعىندارعا 30 ملن تەڭگە قارجى جينادى. ۇيىمداستىرۋشىلار جاقسىلىق جاساۋعا اسىققان جانداردى وڭىرلەردەگى 34 دوستىق ۇيىندە قابىلدايتىنىن ايتتى.