ۆيتسە-پرەمەر نۇرلان بايبازاروۆ باتىس قازاقستان وبلىسىنداعى سۋ باسقان جانە سۋ باسۋ قاۋپى بار اۋماقتارعا, سونداي-اق ورال قالاسى ماڭىنداعى ساياجايلارعا باردى. ۆيتسە-پرەمەر وڭىردەگى نەگىزگى سۋ ارناسى – جايىق وزەنىندە سۋ تاسقىنىنىڭ الدىن الۋ جۇمىستارىنىڭ بارىسىمەن تانىستى. سۋ دەڭگەيىنىڭ كوتەرىلۋىنە بايلانىستى وزەن جاعاسى قۇم سالىنعان قاپتارمەن نىعايتىلىپ, اۋىر تەحنيكالار جۇمىس ىستەپ جاتىر, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ەسكە سالايىق, رەسەيدىڭ باتىس قازاقستان وبلىسىنا جاقىن ورنالاسقان ساراتوۆ جانە ورىنبور وبلىستارى سۋ قويمالارىنان ۇلكەن سۋ كەلىپ جاتىر. اتاپ ايتقاندا, ساراتوۆ وبلىسىنداعى پريۋزەن سۋ قويماسىنان قاراوزەنگە سەكۋندىنا 300 تەكشە مەتر سۋ كەلىپ جاتىر. سونداي-اق ورىنبورداعى يريكلا سۋ قويماسىنان سەكۋندىنا 2 مىڭ تەكشە مەترگە جۋىق سۋ جىبەرىلىپ جاتىر. بۇل سۋ جاقىن ارادا جايىق وزەنى ارقىلى ءوتىپ, ءارى قاراي كاسپي تەڭىزىنە قۇيىلادى. وسىعان بايلانىستى جايىق وزەنىندەگى سۋ دەڭگەيى قالاعا قاۋىپ توندىرەتىن دەڭگەيگە جەتۋى مۇمكىن.
سونىمەن قاتار تەرەكتى اۋدانىنداعى ۇزىنكول سۋ قويماسى تەكسەرىلدى. مۇنداعى جاعداي قالىپتى, سۋ دەڭگەيى تومەندەپ كەلەدى.
«ماماندار جاعدايدى ۇنەمى باقىلاۋدا ۇستاۋى كەرەك. ۇكىمەت تاراپىنان بارلىق قاجەتتى كومەك كورسەتىلەدى», دەدى پرەمەر-ءمينيستردىڭ ورىنباسارى.
بقو-داعى 5 اۋداندا جانە ورال قالاسىندا سۋ تاسقىنى سالدارىنان تۇرعىن ۇيلەر مەن ساياجايلاردى سۋ باستى. وبلىس بويىنشا 7 مىڭعا جۋىق ادام قۇتقارىلدى.
ەۆاكۋاتسيالىق پۋنكتتەردە بارلىق قاجەتتى جاعداي قامتاماسىز ەتىلگەن, سۋ تاسقىنىنان زارداپ شەككەندەرگە مىڭداعان ەرىكتى كومەك كورسەتىپ ءجۇر. حالىققا ازىق-ت ۇلىك پەن ءدارى-دارمەك, كيىم-كەشەك تاسىمالى, سونداي-اق كەزەكشىلىك ۇيىمداستىرىلعان. وقۋشىلار ونلاين-فورماتتا وقۋىن جالعاستىرىپ جاتىر.