ماسكەۋدە تمد-عا مۇشە ەلدەر قارۋلى كۇشتەرى شتابتار باستىقتارى كوميتەتىنىڭ وتىرىسى ءوتتى. جيىنعا ەلىمىزدىڭ قورعانىس ءمينيسترىنىڭ ءبىرىنشى ورىنباسارى – باس شتاب باسشىسى, گەنەرال-لەيتەنانت سۇلتان كامالەتدينوۆتىڭ باسشىلىعىمەن قازاقستان قورعانىس مينيسترلىگىنىڭ دەلەگاتسياسى دا قاتىستى.
وتىرىس بارىسىندا الەمدەگى اسكەري-ساياسي احۋالدىڭ بەلەڭ الۋ تەندەنتسيالارى, قاۋىپسىزدىككە قاتىستى سىن-تەگەۋرىندەر مەن قاۋىپ-قاتەرلەر ماسەلەلەرى قارالدى.
كەزدەسۋگە قاتىسۋشىلار تمد-عا مۇشە مەملەكەتتەر قارۋلى كۇشتەرىنىڭ ۇيىمدىق-تەحنيكالىق قۇرىلىمىن قالىپتاستىرۋ, بىرلەسكەن بايلانىس جۇيەسىن قۇرۋ جانە ونىڭ جۇمىس ىستەۋ قاعيداتتارى تۋرالى ەرەجەنىڭ جوباسىن تالقىلادى.
ۇشقىشسىز باسقارىلاتىن قۇرىلعىلاردى قولدانۋعا قارسى ءىس-قيمىلدى ۇيىمداستىرۋدىڭ زاماناۋي تاسىلدەرى ايتىلدى. ودان بولەك تاۋەلسىز مەملەكەتتەر دوستاستىعىنا مۇشە مەملەكەتتەر قارۋلى كۇشتەرىنىڭ قازىرگى زامانعى تالاپتاردى ەسكەرە وتىرىپ, جاۋىنگەرلىك دايارلىق پەن دالالىق وقىتۋ سالاسىنداعى ءوزارا ءىس-قيمىل باعىتتارى قارالدى.
«تاۋەلسىز مەملەكەتتەر دوستاستىعى: ءححى عاسىرداعى اسكەري ىنتىماقتاستىق جانە قاۋىپسىزدىك» اتتى بىرلەسكەن عىلىمي ەڭبەك تانىستىرىلدى.