ۇلتتىق ۇلاننىڭ اسكەري قىزمەتشىلەرى اقتوبە, باتىس قازاقستان, قاراعاندى, قوستاناي, پاۆلودار جانە سولتۇستىك قازاقستان وبلىستارىنداعى سۋ تاسقىنىنا قارسى ءىس-شارالارعا بەلسەندى قاتىسىپ جاتىر.
«باتىس» وڭىرلىك قولباسشىلىعى 5517 اسكەري ءبولىمىنىڭ 60-تان استام اسكەري قىزمەتشىسى مەن 2 ارنايى تەحنيكاسى اسكەري اسان ەلدى مەكەنىندە سۋ تاسقىنىن بوگەۋ جۇمىستارىنا قاتىستى. ال 6655 اسكەري ءبولىمىنىڭ قىزمەتكەرلەرى ءتورت اۋىسىم بويىنشا 17 تەحنيكانىڭ كومەگىمەن اقتوبە وبلىسىنداعى كيرپيچنىي كەنتىنە كومەك بەرىپ جاتىر.
پاۆلودار وبلىسىنا قاراستى اقتوعاي اۋدانىنىڭ شولاقسور كەنتىندە سىلەتى وزەنى ارناسىنان اسۋىنا بايلانىستى 5512 اسكەري ءبولىمىنىڭ اسكەري قىزمەتشىلەرى حالىققا كومەكتەسۋ جانە سۋ تاسقىنىنىڭ الدىن الۋ ءۇشىن شۇعىل تۇردە اۋدانعا بەت الدى. سونداي-اق ولار جالاۋلى ەلدى مەكەنىندەگى سۋ تاسقىنىنا قارسى ءىس-شارالاردى اتقارۋعا جۇمىلدىرىلدى. ۇلاندىقتار ەرىگەن قار سۋىنا قارسى بوگەتتەر تۇرعىزىپ, سۋ تاسقىنىنىڭ الدىن الۋ ءۇشىن ءتۇرلى امال جاساپ جاتىر.
بۇعان قوسا, تەمىرتاۋ قالاسىنىڭ 5516 اسكەري ءبولىمىنىڭ 125 اسكەري قىزمەتشىسى مەن 6 تەحنيكاسى, قوستاناي قالاسىنداعى ۇلتتىق ۇلان پولكىنىڭ 100 اسكەري قىزمەتشىسى جانە 8 تەحنيكاسى, پەتروپاۆل قالاسىنداعى 6637 اسكەري ءبولىمىنىڭ 50 اسكەري قىزمەتشىسى مەن 7 تەحنيكاسى ەلىمىزدىڭ ءار وڭىرىندەگى جاعدايدى رەتتەۋگە اتسالىسىپ جاتىر.
قاراعاندى وبلىسىنىڭ ءىرى سۋ قويمالارىندا (سامارقاند, ىنتىماق, شەرۋباي-نۇرا) سۋ كولەمىنىڭ ۇلعايۋىنا بايلانىستى اباي, بۇقار جىراۋ جانە نۇرا اۋداندارىنىڭ 28 ەلدى مەكەنىندە قۇم تولتىرىلعان قاپتاردان بوگەت تۇرعىزۋ جۇمىستارى قولعا الىنعان. بۇعان قاراعاندى قالاسىنىڭ 5451 اسكەري ءبولىمىنىڭ 50-گە جۋىق اسكەري قىزمەتشىسى مەن 4 ارنايى تەحنيكاسى قوسىلدى.
– ۇلتتىق ۇلاننىڭ اسكەري قىزمەتشىلەرىنە تەحنوگەندىك, تابيعي, الەۋمەتتىك سيپاتتاعى توتەنشە جاعدايلاردىڭ سالدارلارىن جويۋعا قاتىسۋ مىندەتى جۇكتەلگەن. سوندىقتان كۋرسانتتار كەز كەلگەن ۋاقىتتا حالقىمىزعا كومەك كورسەتۋگە دايىن, – دەپ اتاپ ءوتتى 2 وقۋ باتالونى كومانديرىنىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارى, پودپولكوۆنيك ءالىمجان تاسماعامبەتوۆ.