استاناداعى بالالاردى وڭالتۋ ورتالىعى ورتەنىپ, ناۋقاس جەتكىنشەكتەر شۇعىل كوشىرىلدى

ەلوردالىق تجد مالىمەتىنشە, 3 ءساۋىر ساعات 19:58-دە ۇلتتىق بالالاردى وڭالتۋ ورتالىعىنىڭ ترانسفورماتورلىق قوسالقى ستانساسىنىڭ جەرتولەسىندە ەلەكتر كابەلى جانعان.

ودان شىققان وتتىڭ بەتىن قايتارۋعا ۇنتاقتى ءورت سوندىرگىش قولدانىلدى.

ءورت سوندىرۋشىلەردىڭ ۇيلەسىمدى ارەكەتىنىڭ ارقاسىندا ساعات 21:13-تە جالىن وقشاۋلانىپ, 21:20-دا ءسوندىرىلدى.

ەشكىم زارداپ شەككەن جوق.

ءورتتىڭ الدىن الا سەبەبى — ەلەكتر سىمىنىڭ قىسقا تۇيىقتالۋى.

مەديتسينا مەكەمەسى دەنساۋلىق ساقتاۋ مينيسترلىگىنە قارايدى.

«استانا اكىمدىگى پاتسيەنتتەردى ورنالاستىرۋعا كومەكتەستى. جانىندا اناسى بار بالالار قالانىڭ قوناق ۇيلەرىنە جانە ۇلتتىق عىلىمي كارديوحيرۋرگيا ورتالىعىنا كوشىرىلگەن. استانادا تۇراتىن ناۋقاستار ۇيىنە جىبەرىلدى. قاجەت بولعان جاعدايدا قالا ستاتسيونارلارىنا اۋىستىرىلادى. بۇكىل پاتسيەنتتەر مەديتسينالىق قولداۋمەن قامتاماسىز ەتىلەدى» دەپ جازدى جەرگىلىكتى اكىمدىكتەن.

ۇلتتىق بالالاردى وڭالتۋ ورتالىعى شامامەن 4-5 ساۋىردە جۇمىسىن قايتا باستايدى.