اقتوبە وبلىسىندا سۋ تاسقىنىنان تونەتىن قاۋىپ سەيىلگەن جوق. ەلەك, جەم, تورعاي, ىرعىز, ويىل, قاراقوبدا, تەمىر, سازدى, جىڭىشكە, قارعالى وزەندەرىندەگى سۋ دەڭگەيى تومەندەمەدى. سوعان قاراعاندا جاعداي ءاپ-ساتتە وزگەرىپ كەتۋى مۇمكىن.
2 ءساۋىر كۇنى تۇندە جىڭىشكە, سازدى وزەندەرىنىڭ دەڭگەيى كۇرت كوتەرىلىپ, ەكى وزەننىڭ ەلەككە قۇيار تۇسىندا ورنالاسقان ۆوحر, ماحامبەت ەلدى مەكەندەرىنە ايتارلىقتاي قاۋىپ ءتوندىردى. قالا اكىمى ازامات بەكەت باستاعان توپ وزەن جاعالاۋىن توپىراقپەن بەكىتۋ جۇمىستارىن جۇرگىزدى. ەلەك وزەنى ارناسىنان اسسا, جاعالاۋداعى ۇيلەردىڭ تۇرعىندارى قايتادان ۋاقىتشا ورنالاستىرۋ ورىندارىنا كوشىرىلەدى. سۋ تاسقىنىنا بايلانىستى قۇرىلعان وڭىرلىك جەدەل شتاب تاۋلىك بويى كۇشەيتىلگەن تارتىپتە جۇمىس ىستەپ جاتىر.
30-31 ناۋرىزدا اقتوبە قالاسى مەن مۇعالجار, تەمىر, ويىل, قوبدا, ايتەكە بي اۋداندارىندا توتەنشە جاعداي جاريالانىپ, سۋ باسۋ قاۋپى تونگەن جەرلەردەن 6 931 ادام ەۆاكۋاتسيالاندى, ونىڭ 2 777-ءسى – بالالار. سۋ تاسقىنىنان 762 تۇرعىن ءۇي, 10 الەۋمەتتىك نىسان, 189 اۋلا, 99 ساياجاي ۇيلەرى زاقىمداندى. ويىل اۋدانىنىڭ قاراتال, ەكپەتال اۋىلدارىنىڭ بۇكىل ءۇيى تاسقىن استىندا قالدى. ەلدى مەكەندەردەن 7 072 جانۋار قاۋىپسىز جەرگە شىعارىلدى, 3 مىڭ باس مال سۋعا كەتتى. بۇگىندە ۋاقىتشا ورنالاستىرۋ ورىندارىندا 2 649 ادام تۇرىپ جاتسا, 1 730-ى ءوز ۇيلەرىنە ورالدى. 20 مەكتەپتە ەۆاكۋاتسيالىق پۋنكتتەر جۇمىس ىستەپ, 33 مەكتەپتىڭ 24 مىڭ 896 وقۋشىسى قاشىقتان وقۋعا كىرىستى.
اقتوبە قالاسى مەن بەس اۋداندا سۋ تاسقىنىنان كەلتىرىلگەن زالالدى انىقتاۋ جونىندەگى كوميسسيا جۇمىسقا كىرىستى. ءۇي, مال-مۇلكى ب ۇلىنگەن تۇرعىندارعا قايىرىمدىلىق كومەك كورسەتۋگە ءوتىنىش بىلدىرگەن ازاماتتاردىڭ قارجىسى «قامقور-اقتوبە 2024» قوعامدىق قورىنىڭ ەسەپشوتىنا تۇسەدى. كەشە تۇركىستان وبلىسىنان 30 توننا ازىق-ت ۇلىك, كيىم-كەشەك, جەكە گيگيەنالىق قۇرالدار تيەلگەن كەرۋەن جەتتى. قازىرگى ۋاقىتتا وبلىس پەن بەس اۋدان ورتالىعىندا سۋ تاسقىنىنا بايلانىستى قۇرىلعان كوميسسيا مۇشەلەرى سۋ باسقان جەرلەردەگى ءار ءۇيدى ارالاپ, ەسەپكە الىپ ءجۇر. ولار اراسىندا سۋ كىرمەگەن ۇيلەردى دە انىقتادى. ەندى قالاداعى ەلەك پەن قارعالى وزەندەرى جاعاسىندا كوكتەم-جازدا باقشا ەگىپ, كۇز بەن قىستا بوس تۇراتىن كىشكەنتاي ساياجاي ۇيلەرى ءۇشىن وتەماقى تولەۋ قاجەت پە دەگەن سۇراق تۋىنداپ وتىر. ونداي ساياجاي ۇيلەرىنىڭ سانىن انىقتاپ, يەلەرىمەن كەزدەسۋ ۋچاسكەلىك ينسپەكتورلارعا جۇكتەلدى. سونداي-اق تاسقىننان زارداپ شەككەندەردىڭ اراسىندا تۇرىپ جاتقان ۇيلەرىنىڭ قۇجاتى جوق ادامدار دا بار. «سوعان قاراماستان دۇنيە-مۇلكى ىستەن شىققان, كومەككە مۇقتاج جانداردىڭ ءتىزىمىن كوميسسيا مۇشەلەرى انىقتايدى», دەيدى «قامقور-اقتوبە 2024» قوعامدىق قورىنىڭ جەتەكشىسى ابدۋحات مىرزالين.
اقتوبە قالاسىنىڭ ىرگەسىندەگى اقتوبە, قارعالى, سازدى سۋ قويمالارىنىڭ جاعدايى دا – الاڭداتارلىق كۇيدە. 245 ملن تەكشە مەتر سىيىمدىلىعى بار اقتوبە سۋ قويماسى بۇگىندە 89%-عا تولعان. 27 ناۋرىزدان كۇنى بۇگىنگە دەيىن ونىڭ شليۋزدەرىنەن سەكۋندىنا 500 تەكشە مەتردەن سۋ جىبەرىلىپ جاتسا دا, جان-جاقتان توقتاۋسىز قۇيىلىپ جاتىر. سوڭعى اپتادا وسى سۋ قويماسىنان 246 ملن تەكشە مەتر سۋ جىبەرىلدى. سونداي-اق اقتوبە قالاسىنىڭ وڭتۇستىك-باتىسىنداعى 10 شاقىرىم قاشىقتىقتا ورنالاسقان, سىيىمدىلىعى 6 ملن تەكشە مەتر بولاتىن سازدى سۋ قويماسى دا ەرنەۋىنە دەيىن تولدى. قالادان 60 شاقىرىم قاشىقتىقتا, 280 ملن تەكشە مەتر سىيىمدىلىعى بار قارعالى قويماسىندا 245 ملن تەكشە مەتر سۋ جينالعان. وسى جاعدايعا بايلانىستى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ اقتوبەگە كەلدى جانە جاڭادان ءتورت سۋ قويماسى سالىناتىنى تۋرالى حاباردار ەتتى.
«27 ناۋرىزدان باستاپ اقتوبە سۋ قويماسىنا 200 ملن تەكشە مەتردەن اسا سۋ قۇيىلىپ, بارلىق ۆەگەتاتسيالىق كەزەڭدە تولىعاتىن مولشەرى ەكى-اق كۇندە جينالدى. «قازسۋشار» رمك فيليالى ماماندارى, جەرگىلىكتى مەملەكەتتىك ورگاندار, تجد قىزمەتكەرلەرى اقتوبە قويماسىنان سۋ جىبەرىپ, ەلەك وزەنىنىڭ تومەنگى جاعىنداعى ۇيلەردى تۇگەل شايىپ كەتۋدەن ساقتاپ قالدى. «قازگيدرومەت» بولجامىنا سايكەس 5 ساۋىرگە دەيىن ءالى دە اقتوبە سۋ قويماسىنا 210 ملن تەكشە مەتر, قارعالى سۋ قويماسىنا 180 ملن تەكشە مەتر سۋ كەلەدى. ەندى ەكى سۋ قويماسىنان شىققان سۋدىڭ ەلەك پەن قارعالى وزەندەرىنىڭ قوسىلعان تۇسىندا ارناسىنان شىعىپ كەتپەۋىن «قازسۋشار» فيليالى ماماندارىمەن بىرلەسە باقىلايمىز», دەيدى.
اقتوبە وبلىسى