قوستاناي وبلىسىندا سۋ باسقان ەلدى مەكەندەردىڭ تۇرعىندارىن ەۆاكۋاتسيالاۋعا پوليتسيا قىزمەتكەرلەرى دە بەلسەنە اتسالىسىپ جاتىر. پوليتسيانىڭ قۇتقارۋ جاساقتارىنىڭ ءىس-قيمىلى وبلىستىق پد باستىعى ەرلان ءفايزۋلليننىڭ تىكەلەي باسشىلىعىمەن ىسكە اسىرىلىپ جاتىر, دەپ حابارلايدى Egemen.kz.
وڭىردە سۋ تاسقىنى باستالعان ساتتەن باستاپ پوليتسيا قىزمەتكەرلەرى تجد قۇتقارۋشىلارىمەن بىرلەسە وتىرىپ 530-دان استام ادامدى ەۆاكۋاتسيالادى.
سونىمەن قاتار پوليتسيا ەۆاكۋاتسيالانعان تۇرعىنداردىڭ ءۇي-مۇلكىنىڭ اماندىعىن قامتاماسىز ەتۋ جۇمىستارىن جۇرگىزىپ جاتىر.
«كۇشەيتىلگەن رەجىمدە جۇمىس ىستەپ جاتىرمىز. وبلىس اۋماعىنداعى اۆتوكولىك جولدارىن 21 جەردەن سۋ شايىپ كەتتى. ونىڭ ىشىندە 1 رەسپۋبليكالىق, 5 وبلىستىق, 13 جەرگىلىكتى ماڭىزعا يە جول بار. باستى مىندەت – قوعام مەن جولدىڭ قاۋىپسىزدىگىن قامتاماسىز ەتۋ. ءالى سۋ تاسقىنى قاۋپى تۇبەگەيلى سەيىلمەي تۇر. سوندىقتان تۇرعىنداردىڭ اماندىعىن قامتاماسىز ەتۋ ماقساتىندا ءبىز قاۋىپتى جولداردى انىقتاپ, كولىكتەردىڭ سول باعىتقا شىعۋىنا تىيىم سالىپ وتىرمىز», دەدى پد باستىعى ەرلان فايزۋللين.
وبلىس بويىنشا قوعامدىق ءتارتىپتى ساقتاۋ جانە سۋ تاسقىنىنا قارسى ءىس-شارالارعا 150 پوليتسيا قىزمەتكەرى, قر ءىىم ۇلتتىق ۇلانىنىڭ 100 اسكەري قىزمەتشىسى, 49 تەحنيكا جۇمىلدىرىلعان.
پوليتسيا دەپارتامەنتىنىڭ جانىنان قۇرىلعان جەدەل شتاب تاۋلىك بويى جۇمىس ىستەپ تۇر. پد باستىعى قاجەت بولعان جاعدايدا شۇعىل ارەكەت ەتۋگە دايىن تۇرعان قوسىمشا كۇشتەردىڭ جاساقتالعانىن ايتتى.