بەينەۋ اۋىلىندا گازدىڭ جارىلۋى سالدارىنان جەكە تۇرعىن ءۇي قۇلاپ, ءبىر ادام قازا تاپتى. «قازترانسگاز ايماق» اق قوعاممەن بايلانىس ءبولىمى وقيعانىڭ الدىن الا سەبەپتەرىن اتادى, دەپ جازادى Egemen.kz.
قازترانسگاز ايماق» اق ءباسپاسوز قىزمەتىنىڭ حابارلاۋىنشا, قايعىلى وقيعا 3 ساۋىردە بولعان.
جارىلىستان ءۇي تولىعىمەن دەرلىك قيراعان. سالدارىنان بەينەۋ اۋىلىنىڭ تۇرعىنى اۋرۋحانادا قايتىس بولدى. بۇل تۋرالى توتەنشە جاعداي قىزمەتىنىڭ قىزمەتكەرى «قازترانسگاز ايماق» اق اپاتتىق-ديسپەتچەرلىك قىزمەتىنە حابارلاعان. وقيعا ورنىنا جەتكەن بريگادا قيراعان جەكە ۇيگە قولدان جاسالعان جىلىتۋ گاز قازاندىعى ورناتىلعانىن انىقتادى, - دەپ حابارلادى كومپانيا.
وقيعا تۋرالى بەينەۋ اۋداندىق اكىمدىگى مەن پوليتسياعا حابارلانعان.
الدىن الا مالىمەت بويىنشا, قولدان جاسالعان قازاندىقتان گاز شىققان. انىقتالعانداي, بۇعان دەيىن ءۇي يەلەرىنە قولدان جاسالعان بۇل جابدىقتى اۋىستىرۋ تۋرالى حابارلاما كەلگەن, بىراق ءۇي يەلەرى بۇل ەسكەرتۋدى ەلەمەگەن. اپاتتىڭ سەبەپتەرى ساراپتاما قورىتىندىسى بويىنشا ناقتىلانادى, - دەپ قورىتىندىلادى كومپانيا.