دەنساۋلىق ساقتاۋ سالاسىنداعى وزەكتى ماسەلەلەردى رەتتەۋگە كەلگەندە دارىگەرلەرمەن قاتار تۇرعىنداردىڭ دا ۇسىنىس-پىكىرىن ەسكەرگەن ءجون. دەنساۋلىق ساقتاۋ ءمينيسترى اقمارال ءالنازاروۆا استاناداعى №10 قالالىق ەمحاناعا بارعاندا دا دارىگەر مەن پاتسيەنتتەرىنىڭ ءوتىنىشىن باسشىلىققا الدى.
كەزدەسۋدە اقمارال ءالنازاروۆا №10 قالالىق ەمحانانىڭ جۇمىسىمەن تانىسىپ, ىزىنشە مەديتسينالىق كومەكتىڭ ساپاسىنا قاتىستى وزەكتى ماسەلەلەرگە قۇلاق ءتۇردى. تۇرعىندار ساۋالى بويىنشا كەيبىر ماسەلەلەردىڭ شەشىمىن سول مەزەتتە ۇسىنسا, باسقاسىن رەتتەۋدى كۇن تارتىبىنە قويدى. كەزدەسۋدە ەلوردا عانا ەمەس, ەلدەگى مەديتسيانالىق كومەكتىڭ ساپاسىنا قاتىستى وزگەرىستەر ەنگىزىلەتىنىن بىلدىك. ەمحانالاردىڭ جۇمىسىن ىلگەرىلەتۋگە قاتىستى وزەكتى ماسەلەلەردىڭ جاي-جاپسارىنا توقتالعان مينيستر كوپشىلىكتىڭ ۇسىنىسىن نازارعا الىپ, سارالاپ, دەنساۋلىق ساقتاۋدىڭ نورماتيۆتىك قۇجاتتارىنا وزگەرىستەر ەنگىزىلەتىنىن ەسكە سالدى. كوپ كىدىرمەي الەۋمەتتىك مەديتسينالىق ساقتاندىرۋ جۇيەسىنىڭ باستى قاعيداتى تۋرالى باياندادى.
– ءمامس جۇيەسى جيناقتاۋشى ەمەس جانە دەربەس شوتتاردى كوزدەمەيدى. ىنتىماقتاستىق قاعيداتى بويىنشا جۇمىس ىستەيدى. مۇندا مەديتسينالىق كومەككە جۇگىنبەيتىن ازاماتتاردىڭ جارنالارى وزدىگىنەن جوعالىپ كەتپەيدى ءارى قايتارىلمايدى. ەسەسىنە, ول قارجات ەمدەلۋگە مۇقتاج باسقا پاتسيەنتتەردىڭ ەمىنە جۇمسالادى دەگەن ءسوز. قۇنى 1 ملن تەڭگەدەن 40 ملن تەڭگەگە دەيىن جەتەتىن مەديتسينالىق كومەكتى قازىر ناۋقاستار تەگىن الىپ وتىر, – دەيدى مينيستر.
كەزدەسۋدەن كەيىن ەمحانادا ءباسپاسوز ءماسليحاتى ءوتىپ, وندا ءبىز مەديتسيناداعى وزگەرىستەر تۋرالى سۇراقتارعا جاۋاپ الۋعا تىرىستىق. ا.ءالنازاروۆا ءوڭىر-وڭىردە مەديتسيناعا قاتىستى ماسەلەلەردى انىقتاپ, رەتتەۋگە قاتىستى شارۋانى حالىق سانى كۇننەن-كۇنگە ءوسىپ بارا جاتقان استانادان باستاعاندى دۇرىس كورگەنىن ايتتى. ول اپتا ىشىندە بىرنەشە مەكەمەنى ارالاپ, جۇمىسىمەن تانىسىپ ۇلگەرىپتى. مەديتسينا ماماندارىمەن, پاتسيەنتتەرمەن كەزدەسكەن.
– استانا حالقىنىڭ سانى 1,5 ميلليونعا جۋىقتادى. ول ازداي قالاعا جاقىن اۋدانداردان كەلىپ ەمدەلەتىن ناۋقاستار كوپ. مۇنىڭ ءوزى قوسىمشا جۇكتەمە دەگەن ءسوز. نەگىزى, استانانىڭ مەديتسينا سالاسىندا بىرنەشە ماڭىزدى ماسەلە بار. ءبىرىنشىسى, ءوزىمىز ايتىپ وتىرعانداي, ەمدەۋ مەكەمەلەرىنىڭ تاپشىلىعى. ونىڭ ىشىندە ەمحانالار از. ەلوردا حالقىنىڭ سانى 2030 جىلدارعا قاراي 2 ميلليوننان اسادى دەگەن بولجام بار. وسىعان بايلانىستى قالادا قوسىمشا 7 ەمحانا سالۋ ماسەلەسىن جۋىردا قالا اكىمىمەن كەزدەسكەندە پىسىقتادىق. سونىمەن قاتار ەمحانالاردا كادر تاپشىلىعى بايقالادى. قالادا 200-گە جۋىق دارىگەر جەتپەيدى دەگەن اقپارات الدىق. الايدا مۇندا تەك دارىگەر ەمەس, ورتا بۋىندى مەديتسينا قىزمەتكەرلەرىنىڭ دە تاپشىلىعى بار. استانا قالاسى بويىنشا باس-اياعى 160-تان اسا ەمدەۋ مەكەمەلەرى بولسا, سونىڭ 35-ءى قالالىق اكىمدىككە قارايدى. 10-ى – رەسپۋبليكالىق مەكەمە. باسقاسى – جەكەمەنشىك ۇيىمدار. سول سەكىلدى 5 ۆەدومستۆولىق مەكەمە بار. قالالىق اكىمدىكتىڭ جوسپارلارىن كوردىك, تىڭدادىق. بىرلەسىپ اتقاراتىن جۇمىستار بار. استانا حالقىن مازالاپ جۇرگەن ەمحانا, كەزەك, تەگىن ءدارى-دارمەكپەن قامتۋ, ەمحاناعا تىركەلۋگە قاتىستى ماسەلەلەردەن كەيىن تەمىرجول اۋرۋحاناسىنىڭ جايى الاڭداتادى. توزىعى جەتكەن اۋرۋحانانىڭ جوندەۋ جۇمىستارىنا جەرگىلىكتى بيۋدجەتتەن 3 ملرد تەڭگە بولىنەدى, – دەيدى ا.ءالنازاروۆا.
بيىل جالپى تاجىريبەلىك دارىگەردىڭ جولداماسىنسىز تىكەلەي ارنايى مامانعا بارۋعا بولاتىن پاتسيەنتتەردىڭ ءتىزىمى ناقتىلانىپ, ءتيىستى بۇيرىقتار ازىرلەنىپتى. كەزدەسۋدە Baq.kz اقپارات پورتالىنىڭ ءتىلشىسى ايدا باقىتحان مينيستردەن تەراپەۆتىڭ نۇسقاۋىنسىز ارنايى مامانعا ناقتى كىمدەردىڭ توتە جۇگىنە الاتىنىن سۇرادى.
– قازىر ءتيىستى بۇيرىقتارعا وزگەرىستەر ەنگىزىلىپ جاتىر. ءبىز قولدان كەلگەنشە وسى ۇدەرىستى جىلدام ۇيلەستىرۋگە تىرىسامىز. مەديتسينالىق ساقتاندىرۋ قورىمەن قارجىلاندىرۋدى پىسىقتاپ الدىق. مۇندا پاتسيەنتتەر 8 نەگىزگى قىزمەت بويىنشا دارىگەردىڭ جولداماسىنسىز ەمحاناعا بارىپ, مەدينالىق كومەك الا الادى. بۇل وزگەرىس سالاداعى بارلىق ماسەلەنى شەشەدى دەپ ايتا المايمىز. بىراق قوردالانعان شارۋالاردى رەتتەۋدىڭ العاشقى قادامى دەپ ەسەپتەسەك, بولادى. تاعى ايتا كەتەتىن ماسەلە بار, جالپى تاجىريبەلىك دارىگەردىڭ دارىگەر ەكەنىن ۇمىتپاۋىمىز كەرەك. ول دا 6 جىل وقىعان, رەزيدەنتۋرادان وتكەن. ءبىز جالپى تاجىريبەلىك دارىگەردىڭ قىزمەت اياسىن كەڭەيتۋدى قاراستىرىپ جاتىرمىز, – دەيدى ا.ءالنازاروۆا.
قازىر ارنايى ماماندارعا جازىلۋ ەداۋىر جەڭىلدەگەن. شۇعىل جاعدايلار مەن جاراقاتتار, ونىڭ ىشىندە وفتالمولوگيالىق, وتورينولارينگولوگيالىق, شۇعىل جانە جوسپارلى ستوماتولوگيالىق كومەك كورسەتۋ, دەرموتوۆەنەرولوگيالىق اۋرۋلار كەزىندە جانە تىركەلگەن ەمحانا بويىنشا اكۋشەر-گينەكولوگ پەن پسيحولوگتىڭ قابىلداۋىنا تىكەلەي بارا بەرۋگە بولادى. سول سەكىلدى ونكولوگيالىق جانە گەماتولوگيالىق بەيىندەگى اۋرۋلارعا كۇدىك بولعان جاعدايدا بىردەن ارنايى مامانعا جۇگىنۋگە بولادى.
ءباسپاسوز ءماسليحاتىندا ا.ءالنازاروۆا مەديتسينالىق قىزمەتتىڭ ساپاسىنا قاتىستى ولقىلىقتارعا تەك ءمامس جاۋاپ بەرمەۋى كەرەك ەكەنىن ءتۇسىندىردى. بۇگىندە ەمدەۋ مەكەمەلەرىندە قىزمەت ساپاسىن ارتتىرۋعا سەپتەسەتىن پاتسيەنتتەردى قولداۋ قىزمەتتەرى بار. وكىنىشكە قاراي, ءالى كۇنگە دەيىن ەمدەۋ مەكەمەلەرىنىڭ 30 پايىزى بۇل قىزمەتتى جەتىلدىرمەگەن. مينيسترلىك سالاداعى كوپتەگەن ماسەلەنى ەمحانالارعا مەملەكەتتىك باقىلاۋ جۇرگىزۋ ارقىلى شەشۋگە دايىن. جاقىندا مينيسترلىك قۇرامىنداعى مەديتسينالىق جانە فارماتسەۆتيكالىق قىزمەتتەردى باقىلاۋ كوميتەتىن ءبولۋدى ۇسىنعان. وسىلايشا, مەملەكەتتىك, مەيلى جەكەمەنشىك ۇيىمداردا مەديتسينالىق باقىلاۋدى كۇشەيتۋگە نيەتتى. بۇعان قوسا مەديتسينالىق ساراپتامالاردىڭ دا سانىن قىسقارتىپ, جارامدىلىق مەرزىمىن ۇزارتۋعا باسىمدىق بەرىلىپتى. مەديتسينالىق انىقتامالاردى ەلەكتروندى ۇكىمەت پورتالىندا جىلعا دەيىن ساقتاۋ ماسەلەسى پىسىقتالادى ەكەن. بۇل دا بولسا, ءمامس جۇيەسىندە ساقتاندىرىلعان پاتسيەنتتەرگە ءتاۋىر كومەك.
مينيسترلىك بۇگىندە سالاداعى 10 جاڭا نورماتيۆتىك-قۇقىقتىق اكتىگە وزگەرىستەر ەنگىزىلۋگە كىرىسكەن. وندا پاتسيەنتتەردىڭ, مەديتسينا ماماندارىنىڭ كوتەرگەن ماسەلەلەرىنەن تۋىنداعان تۇيتكىلدەر قامتىلعان.