پاۆلودار قالاسىنداعى جاڭا شاعىن اۋداندا تۇرعىنداردىڭ يگىلىگىنە 198 پاتەر تاپسىرىلدى. جاڭا پاتەرلەر باسپانا كەزەگىندە 15 جىلدان اسا تۇرعان ازاماتتارعا بۇيىردى. ولار – جەتىم بالالار, كوپبالالى, مۇمكىندىگى شەكتەۋلى بالالاردى تاربيەلەپ وتىرعان وتباسىلار.
وبلىس ورتالىعىندا جاڭادان پايدا بولعان «دوستىق» شاعىن اۋدانىندا تاعى ءبىر تۇرعىن ءۇي ىسكە قوسىلدى. جالپى سانى 198 وتباسى قونىس تويىن تويلادى.
پاۆلودار وبلىسىنىڭ اكىمى اسايىن بايحانوۆ پاتەر يەلەرىنە كىلتتەرىن سالتاناتتى تۇردە تابىستاپ تۇرىپ:
«بۇل پاتەرلەر سوناۋ 2000-جىلداردان بەرى تۇرعىن ءۇي كەزەگىندە تۇرعاندارعا بەرىلىپ وتىر. حالىقتىڭ الەۋمەتتىك جاعىنان وسال توپتارى, جەتىم بالالار باسپانالارمەن قامتىلىپ جاتىر. سابىرلىق تانىتىپ, وسى ۋاقىت ىشىندە تۇسىنىستىكپەن قاراعاندارىڭىز ءۇشىن العىس ايتقىم كەلەدى. وبلىس ورتالىعىندا قۇرىلىس قارقىنىنىڭ ايتارلىقتاي ءوسۋى بايقالادى, تەك وتكەن جىلى ءبىز كەزەكتە تۇرعانداردىڭ سانىن 1 مىڭنان اسا ادامعا ازايتا الدىق. بيىل «دوستىق» شاعىن اۋدانىندا 1 280 پاتەرلى تاعى ءتورت ءۇي سالۋ جوسپارلانعان. شاڭىراقتارىڭىز شاتتىققا, باق-بەرەكە مەن قۋانىشقا تولى بولسىن!» دەدى.
اتالعان پاتەرلەر جالعا بەرىلىپ وتىر. تۇرعىندار ولاردى شەكتەۋسىز مەرزىمگە جالداپ تۇرا بەرەدى. وڭىردە جالعا بەرىلەتىن تۇرعىن ءۇي سالۋ تاجىريبەسى جالعاسىن تاباتىنى دا اتاپ ءوتىلدى.
باسپانا قۋانىشىنا يە بولعان كوپبالالى انا وكسانا مارساليكوۆا وتباسىنىڭ بۇل ۇزاق ۋاقىتتان بەرى كۇتكەن قۋانىش ەكەنىن جەتكىزدى. ول مەملەكەتتىڭ قامقورلىعىن الەۋمەتتىك جاعىنان از قامتىلعان شاڭىراقتار كوبىرەك سەزىپ وتىرعانىن اتاپ ءوتتى.
«دوستىق» شاعىن اۋدانى الداعى ۋاقىتتا كەڭەيە تۇسەدى. مۇندا قازىرگى ۋاقىتتا «جايلى مەكتەپ» ۇلتتىق جوباسى اياسىندا مەكتەپ سالىنىپ جاتىر. 2 مىڭ وقۋشىعا لايىقتالاتىن ءبىلىم ۇياسى قاناتىن كەڭگە جايىپ كەلە جاتقان اۋماقتاعى كورىكتى عيماراتتاردىڭ ءبىرى بولماق.
پاۆلودار