جەتىسۋلىق قۇتقارۋشىلاردىڭ جاردەمى

جەتىسۋلىق قۇتقارۋشىلار ابايلىق ارىپتەستەرىمەن بىرلەسىپ, اياگوز اۋدانىنداعى شارۋا قوجالىعى اۋماعىنان ءتورت ادامدى ەۆاكۋاتسيالاعان, ونىڭ ەكەۋى – بالا. قۇتقارىلعان جاندارعا ەشقانداي مەديتسينالىق كومەك قاجەت ەمەس. قازىر جەرلەستەرىمىز اباي وڭىرىندە ءبىر اپتادان بەرى ءىز-ءتۇزسىز كەتكەن تۇرعىنداردى ىزدەستىرۋ جۇمىستارىمەن بەلسەنە اينالىسىپ جاتىر.

«جەتىسۋ وبلىسىندا سۋ تاسقىنى جاعدايى قالىپتى. بۇگىندە 3,7 كم سۋ بۇرۋ ارنالارىن سالۋ جانە سۋ تاسقىنى قاۋپى بار وزەن ارنالارىنىڭ 4,6 كم مەحانيكالىق تازالاۋ مەن 1,9 كم جاعا­لاۋلارىن بەكىتۋ جۇمىستارى جۇرگىزىلىپ جاتىر. تۇرعىنداردىڭ الاڭداۋىنا ەشقانداي سەبەپ جوق. جالعان اقپاراتتارعا ەرمەۋگە شاقىرامىز», دەيدى وبلىستىق توتەنشە جاعدايلار دەپارتمەنتتىنىڭ باسشىسى, پولكوۆنيك نۇرلان بەكبوسىنوۆ.

جالعان اقپارات دەگەننەن شىعادى, جاقىندا الەۋمەتتىك جەلىدە قىزىلاعاش سۋ قويماسىنىڭ قورشاۋى جارىلعالى تۇرعانىن ايتىپ, ەل ءىشى دۇرلىككەن ەدى. اقسۋلىق اعايىن ازار دا بەزەر كۇيگە تۇسكەن. دەگەنمەن جاۋاپتى ماماندار سۋ ارناسىنان اسپاعانىن جەتكىزدى. قازىرگى ۋاقىتتا سۋ قويماسىنىڭ كولەمى 41,9 ملن تەكشە مەتردى قۇرايدى. وقيعا ورنىنا «قازۆودحوز» رمك جەتىسۋ فيليالىنىڭ ماماندارى تاۋلىك بويى كەزەكشىلىك ۇيىمداستىرعان. تاۋداعى قاردىڭ كوبى ەرىگەنىن ەسكەرسەك, ەندى جۇرتتىڭ الاڭداۋىنا ەش سەبەپ جوق. جالپى, ۋاقتىلى قابىلدانعان شارالار ارقىلى وبلىستاعى 22 ەلدى مەكەندە سۋ باسۋ قاۋپى بارىنشا تومەندەتىلگەن.

كەيىنگى مالىمەتتەرگە سۇيەنسەك, اباي وبلىسىنا قاراستى اياگوز اۋدانىندا جەتىسۋ قۇتقارۋشىلارى بورلى وزەنىندە ەكى تراكتورشىنى ىزدەۋ جۇمىستارىن جۇرگىزىپ جاتىر. بۇل باعىتتاعى جۇمىس ءالى دە جالعاسادى.

تاعى ءبىر ايتا كەتەتىن جايت, وبلىس جانە اۋدان اكىمدىگى مەن جاۋاپتى دەپارتامەنت وكىلدەرى وڭىردەگى جاعدايدى كۇن سايىن باقىلاپ وتىر. سۋ باسۋ قاۋپى بار 30-عا جۋىق ەلدى مەكەن سەلدەن ساقتاندىرىلدى. بۇل قاتاردا الاكول اۋدانىنا قاراستى بەسكول جانە قابانباي اۋىلدىق وكرۋگتەرى دە بار. قوس اۋىلدى كىشىگىرىم سۋ باسىپ, اۋىل تۇرعىندارى ابىگەرگە تۇسكەن ەدى. دەگەنمەن دەر كەزىندە جەرگىلىكتى اكىمدىك پەن توتەنشە جاعدايلار ءبولىمى ءتيىستى شارالار قولداندى. ارنايى سۋ سوراتىن تەحنيكالارمەن سۋدى سورىپ, قۇم قاپتاردان بوگەتتەر ورناتقان. زارداپ شەككەندەر بولمادى.

«ەسىك الدىنا سۋ جينالا باستاعاندا زارە-قۇتىمىز قاشتى. ەلدەگى جاعدايدى ەستىپ, كوڭىلىمىز الابۇرتىپ وتىرعانى راس. اكىمدىككە بىردەن ەسكەرتىپ, كيىم-كەشەگىمىزدى دە جيناپ ۇلگەردىك. ايتكەنمەن, قۇتقارۋشىلار مەن جەرگىلىكتى بيلىك كومەككە كەلىپ, سىرتتان اققان سۋعا توسقاۋىل بولدى. قازىر كوڭىلىمىز ورنىندا. مال-جان دا امان-ەسەن. بالالار مەكتەپكە دايىندالىپ جاتىر», دەيدى قابانباي اۋىلىنىڭ تۇرعىنى انار ىزتىلەۋ.

بىلتىرعى سەلدەن جەتىسۋلىقتار ساباق العان سەكىلدى. قازىر قۇتقارۋشىلار اۋىل-اۋىلدى ارالاپ, سۋ كولەمىن باقىلاۋدا ۇستاپ وتىر.

جەتىسۋ وبلىسى