ەرتىس-بايان وڭىرىندە سۋ تاسقىنىنا قارسى ءىس-شارالاردى باقىلاۋسىز قالدىرعان ءۇش اكىمگە سوگىس جاريالاندى. تەرەڭكول, پاۆلودار اۋداندارى مەن اقسۋ قالاسىنىڭ باسشىلارى قاردى ۋاقتىلى شىعارۋ, تۇرعىن ۇيلەردى سۋ باسۋعا جول بەرمەۋ جونىندەگى مىندەتتەردى ءتيىستى دەڭگەيدە جۇرگىزبەگەن. قازىر ايماقتاعى قاۋىپتى ۋچاسكەلەر باقىلاۋعا الىندى.
«بۇگىنگى تاڭدا وبلىس بويىنشا 14 قاۋىپتى ۋچاسكە باقىلاۋعا الىنىپ, وندا 133 ادام, 51 بىرلىك ارنايى تەحنيكا, 35 موتوپومپا جۇمىلدىرىلدى. پاۆلودار مەن تەرەڭكول اۋداندارىنىڭ, سونداي-اق اقسۋ قالاسى اكىمدەرىنىڭ جۇمىسىن قاناعاتتانارلىقسىز دەپ سانايمىن. سۋ تاسقىنىنا قارسى ءىس-شارالاردى جۇرگىزۋدەگى باقىلاۋدىڭ السىزدىگى ءۇشىن ولارعا قاتاڭ سوگىس جاريالاندى. مەنىڭ تاپسىرمام بويىنشا بارلىق سۋ تاسقىنىنا قارسى ءىس-شارا اعىمداعى جاعداي تۋرالى ساعات سايىن بەرىلەتىن ەسەپپەن تاۋلىكتىك رەجىمگە اۋىستىرىلدى جانە مەنىڭ جەكە باقىلاۋىمدا», دەدى وبلىس اكىمى اسايىن بايحانوۆ.
وڭىرلىك توتەنشە جاعدايلار دەپارتامەنتى ءباسپاسوز قىزمەتىنىڭ حابارلاۋىنشا, قازىرگى ۋاقىتتا پاۆلودار, ماي, ۋسپەن, پاۆلودار, شارباقتى, اقتوعاي, ەرتىس اۋداندارى مەن اقسۋ قالاسىنىڭ جەكەلەگەن ەلدى مەكەندەرى بويىنشا 21 ۋچاسكە ايرىقشا باقىلاۋعا الىنعان. بىرقاتار ەلدى مەكەندە ءۇي اۋلالارىن, شارۋاشىلىق عيماراتتارىن سۋ باسقانى تۋرالى اقپاراتتار تۇسكەن ەدى. جەرگىلىكتى اتقارۋشى ورگاندار مەن توتەنشە جاعدايلار قىزمەتكەرلەرى سۋ جىرۋ, سورۋ جۇمىستارىن جالعاستىرىپ جاتىر.
بۇعان قوسا اۆتوموبيل جولدارىنىڭ 6 ۋچاسكەسى باقىلاۋدا تۇر. وتكەن تاۋلىكتە ەلدى مەكەندەردەن 420 توننا قار شىعارىلسا, قاۋىپتى ۋچاسكەلەردەن 30 مىڭ تەكشە مەتر سۋ سورىلىپ الىنعان. تجد قىزمەتكەرلەرى مەن جەرگىلىكتى اتقارۋشى ورگاندار ەلدى مەكەندەرگە تاۋلىك بويى مونيتورينگ جۇرگىزىپ وتىر. وعان دروندار دا قوسىلعان.
اپتا باسىندا پاۆلودار قالاسى مەن اتامەكەن كەنتىن, اقسۋ قالاسى مەن پاۆلودار اۋدانىنداعى كوشەلەردى سۋ باسۋ جايتتارى تىركەلگەن.
پاۆلودار وبلىسى