قوستاناي وبلىسىنىڭ 12 اۋدانىنا سۋ تاسقىنىنان قاۋىپ ءتونىپ تۇر, دەپ حابارلايدى Egemen.kz.
«قازگيدرومەتتىڭ» 31 ناۋرىزداعى مالىمەتى بويىنشا, قوستاناي وبلىسىندا سىناپ باعاناسى +20 گرادۋسقا دەيىن كوتەرىلىپ, جاڭبىر جاۋى مۇمكىن. وسىعان وراي, توتەنشە جاعداي دەپارتامەنتى وبلىستىڭ وڭتۇستىك وڭىرىندە جاعداي قايتا ۋشىعىپ, ورتالىق, سولتۇستىك وڭىرلەرىندە سۋ تاسۋى مۇمكىن ەكەنىن حابارلادى. قاۋىپ ايماعىنا قاراسۋ, اۋليەكول, ناۋىرزىم, قامىستى, سارىكول, التىنسارين, مەڭدىقارا, ۇزىنكول اۋداندارى كىرەدى. سونىمەن قاتار رەسەيدەن كىرەتىن ءىرى وزەندەردىڭ بويىندا جاتقان جىتىقارا, دەنيسوۆ, قوستاناي, قارابالىق, بەيىمبەت مايلين اۋداندارىنا دا سۋ تاسقىنىنان قاۋىپ ءتونىپ تۇر. وسىعان وراي, وبلىستىق توتەنشە جاعداي دەپارتامەنتى جەرگىلىكتى ءوزىن-ءوزى باسقارۋ ورگاندارىنا قاۋىپتىڭ الدىن الۋدى, ەۆاكۋاتسيالاۋ جولدارىن انىقتاۋدى ەسكەرتتى.