قورعانىس مينيسترلىگىنىڭ ۇشقىشتارى اقتوبە وبلىسىندا سۋ باسقان عيماراتتىڭ توبەسىندەگى ادامداردى قۇتقاردى. اۋە قورعانىسى كۇشتەرى اسكەري ينستيتۋتىنىڭ مي-8 تىكۇشاق ەكيپاجىنىڭ شەبەر قيمىلى ناتيجەسىندە ويىل اۋدانىنا قاراستى بەرسيەۆ اۋىلىنىڭ 15 تۇرعىنى قۇتقارىلدى, دەپ حابارلايدى Egemen.kz.
قورعانىس ۆەدومستۆوسىنىڭ ءباسپاسوز قىزمەتى ءمالىم ەتكەندەي, 29 ناۋرىزداعى ەۆاكۋاتسيالىق ءىس-شارالار كەزىندە مايور جانىبەك بەكباۋليەۆتىڭ باسقارۋىنداعى مي-8 تىكۇشاعىنىڭ ەكيپاجى بەرسيەۆ اۋىلىنىڭ شەتىندەگى قيىن جاعداي تۋرالى راتسيا بويىنشا حابارلاما العان.
تاسقىن كەسىرىنەن ەلدى مەكەننەن كەتۋ مۇمكىندىگىنەن ايىرىلعان ادامدار سول ۋاقىتتا – سۋعا باتقان شارۋاشىلىق قۇرىلىسىنىڭ توبەسىندە ەدى, ولارعا شۇعىل ەۆاكۋاتسيا قاجەت بولعان.
ەكيپاج زارداپ شەككەندەر تۇرعان جەرگە جەدەل جەتكەن. تىكۇشاق شارۋاشىلىق قۇرىلىسىنىڭ توبەسىنەن ءبىر مەتر قاشىقتىقتا كومەك كۇتكەن ادامداردى قابىلداپ, اقتوبە قالاسىنىڭ اۋەجايىنا ەۆاكۋاتسيالادى.
جانارماي قۇيعان سوڭ تىكۇشاقتار تجم قىزمەتكەرلەرىمەن جانە ءجۇزۋ قۇرالدارىمەن بەرسيەۆ اۋىلىنداعى مەكتەپتەگى تۇرعىندارعا كومەككە ۇشىپ كەتتى. ەۆاكۋاتسيالىق جۇمىستار تۇنگى ۋاقىتتا دا ءجۇرىپ جاتىر.
مينيسترلىك حابارلاماسىندا: «اسكەري ۇشقىشتار قۇتقارۋشىلارمەن جانە جەرگىلىكتى اتقارۋشى ورگانداردىڭ وكىلدەرىمەن بىرلەسىپ, اپات ايماعىندا قالعان ادامداردى قۇتقارىپ جاتقانىنا ءۇش كۇن بولدى», دەلىنگەن.