قازاقستان ازيا-تىنىق مۇحيتى ايماعىندا پوزيتسياسىن نىعايتىپ جاتىر

ودان بولەك «Kearney» حالىقارالىق كونسالتينگتىك فيرماسىنىڭ دەرەكتەرىنە سايكەس, الداعى 3 جىلدا وسى ايماقتىڭ مەملەكەتتەرىنە قاتىستى ساۋدا-ەكونوميكالىق باستامالار ۇلعايادى دەپ جوسپارلانىپ وتىر. ازيا-تىنىق مۇحيتى ايماعى ەلدەرىنىڭ گەوساياسي سيپاتتامالارى ءبىزدىڭ ەلىمىزگە دە قاتىستى, ونىڭ سىرتقى ساياسي كۇن ءتارتىبى سوڭعى جىلدارى شەتەلدىك ينۆەستورلاردى تارتۋعا بەلسەندى باعىتتالعان.

قاسىم-جومارت توقاەۆ قحر حاينان قالاسىندا وتكەن بواو ەكونوميكالىق فورۋمىنا قاتىسۋ بارىسىندا قازاقستاننىڭ بولاشاعى مەن ۇستانىمى تۋرالى مالىمەت ۇسىندى. اسىرەسە, ونىڭ ەىدۇ باس حاتشىسى ماتياس كورمانمەن كەزدەسۋى ەرەكشە قىزىعۋشىلىق تۋدىردى, ول قازاقستاننىڭ ەكونوميكالىق ساياساتىن ۇيىم ستاندارتتارىنا كەلتىرۋگە بەيىلدىلىگىن مالىمدەدى. وزدەرىڭىز بىلەتىندەي, ەىدۇ جۇمىسىنىڭ ەداۋىر بولىگى اقشانى جىلىستاتۋعا, سىبايلاس جەمقورلىققا, پاراقورلىققا, سالىق تولەۋدەن جالتارۋعا – قازاقستان ءۇشىن وزەكتى ماسەلەلەرگە قارسى تۇرۋعا ارنالعان. توقاەۆتىڭ ۇيىممەن ىنتىماقتاستىققا اشىقتىق تۋرالى سوزىنە سۇيەنە وتىرىپ, ەكونوميكالىق قۇقىق بۇزۋشىلىقتاردىڭ اتالعان تۇرلەرىمەن كۇرەسۋدىڭ جاڭا تەتىكتەرىن ەنگىزۋدى, سونداي-اق بيلىكتىڭ وسى ماسەلەلەرگە نازار اۋدارۋ دەڭگەيىنىڭ جوعارىلاۋىن بولجاۋعا بولادى.

فورۋمدا كولىك باعىتتارىن دامىتۋداعى ىنتىماقتاستىق قارقىنىن ارتتىرۋعا ەرەكشە نازار اۋدارىلدى. وۇعان ازيا مەن ەۋروپا اراسىنداعى تاۋارلاردى جەتكىزۋدى قامتاماسىز ەتەتىن ترانسكاسپي حالىقارالىق كولىك باعىتى جاتادى. ونىڭ ماڭىزدىلىعىن سيپاتتاي وتىرىپ, قاسىم-جومارت توقاەۆ الداعى بىرنەشە جىلدا جۇك تاسىمالى كولەمى 10 ميلليون تونناعا ۇلعاياتىنىن مالىمدەدى. بۇل كورسەتكىشتەر «سولتۇستىك-وڭتۇستىك» باعىتى بويىنشا تاسىمالداۋعا مۇددەلى شەتەلدىك ينۆەستورلار ءۇشىن وزىندىك «جارناما» بولۋى ءتيىس.

ءار ءتۇرلى گەوساياسي كەلىسپەۋشىلىكتەر جاعدايىندا مۇنداي كووپەراتسيا ءبىزدىڭ ەلىمىزگە پايدالى عانا ەمەس, سونىمەن قاتار ۇلتتىق ەكونوميكانىڭ تۇراقتىلىعىن قامتاماسىز ەتۋ ءۇشىن دە قاجەت.

ءامينا قوسباەۆا,ەۋرازيالىق ينتەگراتسيا ينستيتۋتىنىڭ ساراپشىسى