ويىل اۋىلىنىڭ تۇرعىنى 27 ناۋرىز كۇنى تۇندە وتباسىمەن اقتوبە قالاسىنا بارا جاتىپ, قوبدا-ويىل تاسجولىنىڭ بويىندا سۋ تاسقىنىنا تاپ بولعان. كۇتپەگەن جەردەن جولدىڭ بەتىن جاپقان تاسقىننان كولىك كەرى بۇرىلا الماي, سۋ ورتاسىندا قالىپ قويعان. كولىك تىزگىندەگەن ازامات تاسجولعا جاقىن جەردەگى كەمەر اۋىلىنىڭ تۇرعىندارىنا قوڭىراۋ سوعىپ, كومەك سۇرادى, دەپ حابارلايدى Egemen.kz.
حابار تۇسكەن بويى جەتكەن سارالجىڭ اۋىلدىق وكرۋگىنىڭ ۋچاسكەلىك پوليتسيا ينسپەكتورى ەسبولات ءادىلحانوۆ كەمەر اۋىلىنىڭ تۇرعىندارىمەن بىرگە سەڭنىڭ جولىن تراكتورمەن بوگەپ, كولىك ىشىندەگىلەردى سۋ ورتاسىنان الىپ شىققان.
«كەمەر اۋىلىنىڭ ازاماتتارى پوليتسيا ينسپەكتورى ەسبولات ادىلحانوۆپەن بىرگە تەرەڭدىگى ءبىر مەتر بولاتىن مۇزدى سۋدى كەشىپ ءجۇرىپ بالا-شاعامدى قۇتقاردى. مەن وتباسىمنىڭ اتىنان اۋىل تۇرعىندارى مەن پوليتسيا ينسپەكتورى ەسبولاتقا العىس ايتامىن. وسى ازاماتتاردىڭ ارقاسىندا بالا-شاعام ويدا-جوقتا تاپ بولعان اپاتتى جاعدايدان امان شىقتى», دەيدى كوپبالالى اكە.
اقتوبە وبلىسى