باتىستا سۋ تاسقىنىنا قارسى كۇرەس جالعاسىپ جاتىر

سوڭعى اقپاراتتارعا قاراعاندا, وبلىستا سۋ تاسقىنىنا قارسى جۇمىستارعا توتەنشە جاعدايلار دەپارتامەنتى, جەرگىلىكتى اتقارۋشى ورگاندار, قورعانىس مينيسترلىگى, ۇلتتىق ۇلان جانە ىشكى ىستەر مينيسترلىگىنەن 998 ادام 300 تەحنيكامەن, 124 موتوسورعىمەن جۇمىلىپ جاتىر.

وبلىس بويىنشا 25 ناۋرىزدان بەرى 453 مىڭ تەكشە مەتر ەرىگەن قار سۋى سورىلىپ, ينەرتتى ماتەريال سالىنعان 42 950 دانا قاپ توسەلگەن.

«قاردىڭ قارقىندى ەرۋى جانە جاڭبىر تۇرىندە جاۋىن-شاشىننىڭ كوپ ءتۇسۋى ناتيجەسىندە ەرىگەن جانە جاڭبىر سۋى, سونداي-اق كارىز اعىندارىنىڭ ناتيجەسىندە, بارلىعى 455 تۇرعىن ءۇي سۋ استىندا قالدى», دەپ مالىمدەدى توتەنشەلىكتەردىڭ ءباسپاسوز قىزمەتى.

وتكەن تۇندە باتىس قازاقستان وبلىسىنا ماڭعىستاۋ وبلىسى توتەنشە جاعدايلار دەپارتامەنتىنىڭ جەكە قۇرامىنان 46 ادام 5 تەحنيكاسىمەن, 8 موتوسورعى جانە 2 قايىعىمەن كومەككە كەلدى. ولار ورال قالاسىندا جانە ءبورلى اۋدانىنداعى جۇمىستارعا تارتىلدى.

بۇعان دەيىن ولەڭتى, جاقسىباي وزەندەرى تاسىسا, ەندى شىڭعىرلاۋ وزەنى دەڭگەيى كوتەرىلىپ, وزەن اينالاسىنداعى ەلدى مەكەندەردى سۋ باسۋ قاۋپى تۋدى. قازىرگى ۋاقىتتا ءبورلى اۋدانىنىڭ اقسۋ كەنتىندە 161 ادام ەۆاكۋاتسيالانعان.

ناۋرىزدىڭ 28-ءى كۇنى قورعانىس مينيسترلىگىنىڭ ەكى تىكۇشاعىمەن قاراتوبە اۋدانىنىڭ 271 تۇرعىنى قاۋىپسىز جەرگە ەۆاكۋاتسيالاندى. اۋداندا ەۆاكۋاتسيالىق جۇمىستار ءالى جالعاسىپ جاتىر.

تەرەكتى اۋدانىندا دا قاجەتتى ينجەنەرلىك ءىس-شارالار اتقارىلسا, سىرىم اۋدانىندا ەرىگەن قار سۋى سورىلىپ جاتىر.

بۇدان بۇرىن حابارلاعانىمىزداي, ورال قالاسىندا, قاراتوبە, سىرىم, ءبورلى جانە تەرەكتى اۋداندارىندا جەرگىلىكتى اۋقىمدا تابيعي سيپاتتاعى توتەنشە جاعداي جاريالانعان ەدى.

ايماق بويىنشا جاعداي وبلىس اكىمى جانە بقو تجد باستىعىنىڭ مىندەتىن ۋاقىتشا اتقارۋشىنىڭ ەرەكشە باقىلاۋىنا الىندى.

اپات اۋماعىندا زارداپ شەككەن تۇرعىندارعا الدىمەن قول سوزعان ۇيىمنىڭ ءبىرى – «اMANAT» پارتياسى مۇشەلەرى. پارتيانىڭ باستاۋىش ۇيىم توراعالارى مەن مۇشەلەرى, پارتيانىڭ بەلسەندى ازاماتتارى وقيعا ورنىندا حالىقپەن بىرگە بولىپ, بارىنشا كومەك كورسەتىپ جاتىر. «جاستار رۋحى» بەلسەندىلەرى تاۋلىك بويى كەزەكشىلىكتە جۇرگەن توتەنشە جاعداي دەپارتامەنتى قىزمەتكەرلەرىنە اۋىزاشار ۋاقىتىندا ىستىق تاماق ۇلەستىرىپ, قولداۋ ءبىلدىردى. ال وبلىستىق, قالالىق ءماسليحات دەپۋتاتتارى وبلىستىق پارتيا جانىنا اشىلعان ەسەپشوتقا ماتەريالدىق كومەك رەتىندە قاراجات اۋدارىپ, بارلىق دەڭگەيدەگى پارتيا فيليالدارىنىڭ قىزمەتكەرلەرى بىركۇندىك جالاقىسىن اۋدارىپ كومەك كورسەتتى. گۋمانيتارلدىق كومەكتىڭ العاشقى پارتياسى – 4 توننا جۇك 28 ناۋرىز كۇنى قاراتوبە اۋدانىنا جەتكىزىلسە, 29 ناۋرىزدا ءدال وسىنداي كولەمدە كومەك سىرىم اۋدانى تۇرعىندارىنا جىبەرىلدى.

«توتەنشە جاعداي رەجيمى جاريالانعان بىرقاتار اۋداندارداعى ەلدى مەكەن تۇرعىندارىمەن كەزدەسىپ, ولاردىڭ ارىز-تىلەگىن تىڭداپ, سۋ باسقان ۇيلەردىڭ جاعدايىمەن تانىسۋ ءۇشىن وبلىستىق جانە قالالىق ءماسليحات دەپۋتاتتارى, جاستار رۋحى بەلسەندىلەرى جانە وبلىستىق پارتيا فيليالى قىزمەتكەرلەرى وقيعا ورنىندا ءجۇر», دەپ حابارلادى «AMANAT» پارتياسى بقوف ءباسپاسوز قىزمەتى.

باتىس قازاقستان وبلىسى