Maqsut Narikbayev University-ءدىڭ 30 جىلدىعىنا وراي سالتاناتتى ءىس-شارا ۇيىمداستىرىلدى. مەرەكەلىك جيىن ۋنيۆەرسيتەتتىڭ بۇرىنعى جانە قازىرگى پروفەسسورلارىن, وقىتۋشىلارىن, تۇلەكتەرىن جانە قىزمەتكەرلەرىن بىرىكتىردى, باس-اياعى ءىس-شاراعا 5 مىڭنان اسا قوناق قاتىستى.
سالتاناتتى جيىندا ءسوز العان Maqsut Narikbayev University باسقارما توراعاسى تالعات نارىكباەۆ: «بۇگىن ءبىز ۋنيۆەرسيتەتىمىزدىڭ 30 جىلدىق مەرەيتويىنا ورايلاستىرعان وتە ماڭىزدى وقيعاعا جينالدىق. 30 جىل وتە از سياقتى كورىنگەنىمەن, ءبىزدىڭ قىزمەتكەرلەر, وقىتۋشىلار جانە تۇلەكتەرىمىزدىڭ ارقاسىندا ۋنيۆەرسيتەتىمىز ەلەۋلى ناتيجەگە جەتىپ, ۇلكەن جولدان وتتىك. وزدەرىڭىز بىلەتىندەي, ءبىزدىڭ باستى ميسسيامىز – ەل مۇددەسىنە قىزمەت ەتۋ. وسى ورايدا اتالعان قاعيداتىمىزدى ورىنداۋ ءۇشىن قاجىرلى ەڭبەك ەتكەن ءاربىر Maqsut Narikbayev University مۇشەسىنە شىن جۇرەكتەن العىسىمدى بىلدىرەمىن», دەدى.
كەش باعدارلاماسى اياسىندا ۋنيۆەرسيتەت تۋىنىڭ اشىلۋ ءراسىمى ءوتتى. تۋدىڭ اۋدانى 850 شارشى مەتردى قۇرادى, اتالعان اتريبۋت ۋنيۆەرسيتەتتىڭ ءبىلىم بەرۋ جانە قوعامدىق كەڭىستىكتەگى كۇشى مەن ماڭىزدىلىعىن كورسەتتى. وسىعان قوسا مەرەيتوي اياسىندا ۋنيۆەرسيتەت مەكتەپتەرى اراسىندا جارىس وتكىزىلدى. بۇل سايىستا ۋنيۆەرسيتەتتەگى ءتورت مەكتەپ جانە اكىمشىلىك-باسقارۋ پەرسونالى «ۋنيۆەرسيتەتتى ۇزدىك قۇتتىقتاۋ» اتاعى ءۇشىن ءوزارا تالاستى. اتالعان دودانىڭ جۇلدە قورى 5 ملن تەڭگەنى قۇرادى. ۇيىمداستىرۋشىلاردىڭ ايتۋىنشا, قاتىسۋشىلار بۇل شاراعا ءۇش اي بويى دايىندالعان. ۋنيۆەرسيتەتتى ۇزدىك قۇتتىقتاۋ بايقاۋىندا «جوعارى قۇقىق» مەكتەبى جەڭىسكە جەتتى. ستۋدەنتتەر مەن وقىتۋشىلاردىڭ بىرلەسە ۇسىنعان شىعارماشىلىق ونەرلەرى قازىلار القاسىنىڭ جوعارى باعاسىنا يە بولدى.
وقىرماندارعا اقپارات رەتىندە قوسا كەتەيىك, Maqsut Narikbayev University تاريحى 1994 جىلى 14 ناۋرىزدان باستاۋ الادى. ال ۋنيۆەرسيتەتتىڭ ءباسپاسوز قىزمەتى تارتقان دەرەككە سۇيەنسەك, وسى ۋاقىت ىشىندە ۋنيۆەرسيتەت ءوز ميسسياسىنا ساي, ياعني قازاقستان حالقىنا قىزمەت ەتۋدى باستى قاعيداتى سانايتىن 40 مىڭعا جۋىق بىلىكتى ماماندى دايىنداپ شىعاردى. Maqsut Narikbayev University قازاقستاندا ءبىلىم بەرۋدىڭ حالىقارالىق دەڭگەيىن ۇسىنا وتىرىپ, ەلىمىزدىڭ ۋنيۆەرسيتەتتەرى اراسىندا كوش باستاپ تۇر. 30 جىل ىشىندە ۋنيۆەرسيتەت بىرنەشە ءىرى جەتىستىككە قول جەتكىزدى. اتاپ ايتقاندا, تمد-دا ءبىرىنشى بولىپ QAA (The Quality Assurance Agency for Higher Education) اككرەديتاتسياسىنا يە بولدى, ACCA, CFA, CIMA, TOLES سەرتيفيكاتتارىن الدى, سونداي-اق BIG4-تە جۇمىسپەن قامتۋ بويىنشا ۇزدىك توپ-5 ۋنيۆەرسيتەت قۇرامىنا ەندى. ونىمەن قوسا, ۋنيۆەرسيتەتتىڭ ءبىلىم بەرۋ باعدارلامالارىنىڭ كوپشىلىگى FIBAA حالىقارالىق اگەنتتىگىمەن اككرەديتتەلگەن.