شايبالى حوككەيدەن ايەلدەر اراسىنداعى قازاقستان چەمپيوناتى اياقتالىپ, باس جۇلدە «ايسۇلۋعا» بۇيىردى. ولار 20 كەزدەسۋدەن كەيىن 39 ۇپاي جيدى. الماتىلىق ارۋلار اتالعان دودادا وسىمەن 18 رەت التىننان القا تاعىپ وتىر. كۇمىس مەدالدى استانانىڭ ء«توميريسى» يەلەنسە, وسكەمەننىڭ «تورپەدوسى» قولاعا قول سوزدى.
باتۋتتا سەكىرۋدەن گەرمانيانىڭ كوتبۋس قالاسىندا وتكەن الەم كۋبوگىنىڭ كەزەڭدىك سايىسىندا دانيل مۇساباەۆ 47-ورىندا قالىپ قويعانىنا قاراماستان پاريج وليمپياداسىندا ونەر كورسەتەتىن ورەندەردىڭ تىزىمىنە ىلىكتى. بۇل رەتتە قانداسىمىزدىڭ 2023 جىلى پورتۋگاليا (9-ورىن) مەن اقش-تا (20-ورىن) وتكەن رەيتينگتىك جارىستاردا كورسەتكەن ناتيجەلەرى ەسەپكە الىندى.
ۇستەل تەننيسىنەن بەيرۋتتە وتكەن «WTT Feeder Beirut» تۋرنيرىندە قازاقستان قۇراماسى ءۇش جۇلدە ولجالادى. ەلىمىزدىڭ ەڭ ۇزدىك ويىنشىسى كيريلل گەراسيمەنكو قاتارىنان ءتورت باسەكەدە باسىمدىق تانىتىپ, اقتىق سىنعا دەيىن القىنباي جەتتى. فينالدا گەراسيمەنكو جۇپتىق سايىستاعى الەم چەمپيونى, ازيا بىرىنشىلىگىنىڭ ون دۇركىن جۇلدەگەرى, تايپەيلىك چۋان چي-يۋانعا ەسە جىبەرىپ, كۇمىس مەدالدى يەلەندى. ال ايدوس كەنجەعۇلوۆ پەن الان قۇرمانعاليەۆ جانە زاۋرەش اقاشەۆا مەن سارۆينوز مىرقادىروۆا جۇپتىق سايىستا قولا جۇلدەنى ەنشىلەدى.
بوكستان دۋبايدا «رامازان ويىندارى» ءوز مارەسىنە جەتتى. بۇل جارىستى ەلىمىزدىڭ بىلعارى قولعاپ شەبەرلەرى قوس قولا مەدالمەن قورىتىندىلادى. ونىڭ يەگەرلەرى – نازەركە مالەلوۆا (48 كگ) مەن قۋانىش ەرجەنوۆ (60 كگ).
حالىقارالىق فۋتبول قاۋىمداستىعى (فيفا) ۇلتتىق قۇرامالاردىڭ رەيتينگىن جاريالادى. وسىعان دەيىن 100-ورىندا تۇرعان قازاقستاننىڭ ۇلتتىق قۇراماسى گرەكياعا قارسى ويىنداعى ساتسىزدىكتەردەن كەيىن ءبىر ساتىعا تومەندەپ, قازىرگى كەزدە 101-ورىندى قاناعات تۇتىپ تۇر. ال ۇزدىكتەر تىزىمىندە ارگەنتينا كوش باستاسا, ەكىنشى جانە ءۇشىنشى ورىنداردا – فرانتسيا مەن بەلگيا قۇرامالارى.
29-31 ناۋرىز ارالىعىندا تۇركيانىڭ انتالياسىندا دزيۋدودان Grand Slam ءتۋرنيرى وتەدى. ەرلەر باسەكەسىندە نۇرقانات سەرىكباەۆ (60 كگ) عۇسمان قىرعىزباەۆ (66 كگ), دانيار شامشاەۆ (73 كگ), ابىلايحان جۇبانازار (81 كگ), ەرماحان انۋاربەكوۆ (90 كگ), نۇرلىحان شارحان مەن ادىلەت ساپارعاليەۆ (100 كگ), عالىمجان قىرىقباي مەن ەراسىل قاجىباەۆ (+100 كگ) تاتاميگە شىعادى. ايەلدەر اراسىندا ءابيبا ابۋجاقىنوۆا, ديانا بۋركەەۆا (48 كگ), تولعاناي ابەۋوۆا (52 كگ), باقىت قۇساقباەۆا (57 كگ), سامالاي ەرعاليەۆا مەن گۇلنۇر باحانوۆا (63 كگ), ەكاتەرينا توكارەۆا (70 كگ), مارگاريتا گريتسەنكو مەن ارۋنا جانگەلدينا (78 كگ), اقەركە رامازانوۆا مەن ءمادينا پاراگۋلگوۆا (+78 كگ) ونەر كورسەتەدى.