الماتى وبلىسىندا 10 كۇن بۇرىن جوعالىپ كەتكەن قىزدى ىزدەۋ ءۇشىن كولدەن سۋ اعىزىلادى, دەپ حابارلايدى Egemen.kz كتك ارناسىنا سىلتەمە جاساپ.
ءۇش جاسار ايا-سوفيا 17 ناۋرىز كۇنى تۇستەن كەيىن كۇش اۋىلىندا جوعالىپ كەتتى. ول ۇيدەن ءوزى جالعىز شىعىپ كەتىپ, قايتىپ ورالماعان. بالانىڭ اناسى ونىڭ جوعالعانىن سول كۇنى حابارلادى.
پوليتسەيلەر, قۇتقارۋشىلار, ەرىكتىلەر, اۋىل تۇرعىندارى, ءتىپتى اسكەريلەر بىردەن قىزدى ىزدەۋگە شىقتى. وسى ۋاقىت ىشىندە ىزدەۋ ايماعى ايتارلىقتاي كەڭەيدى. وعان قازىر اۋىلدىڭ بارلىق ىرگەلەس اۋماعى مەن كورشىلەس اۋىلدىق وكرۋگتەردىڭ شارۋا قوجالىقتارى قوسىلدى.
ءۇش جاسار ايا-سوفيانى ىزدەۋ ءۇشىن تىكۇشاق تا تارتىلدى. سونىمەن قاتار ىزدەۋ جۇمىستارىنا 25 يت پەن 10 اتتى توپ جۇمىلدىرىلدى. ىزدەۋ شاراسىنا بارلىعى 300-دەن استام ادام جۇمىلعان.
«قىز ءالى كۇنگە دەيىن تابىلعان جوق. ەڭبەكشىقازاق وبلىسى توتەنشە جاعدايلار مينيسترلىگىنىڭ اسكەري بولىمشەسى قىزدى ىزدەۋدى جالعاستىرىپ جاتىر. ىزدەۋ جۇمىستارى قىز تابىلعانعا دەيىن جالعاسادى», دەدى بالتاباي اۋىلدىق وكرۋگىنىڭ اكىمى ساۋلە ءالىپوۆا.
ەندى اۋىلدا بىرنەشە مەتر جەردەگى كولدىڭ سۋىن اعىزباقشى. ول جوعالعان قىزدىڭ ءۇيىنىڭ جانىندا ورنالاسقان. بىراق وعان تاعى ءبىر اپتا كەتەدى. ىزدەستىرۋ جۇمىستارىنا تاجىريبەلى سۇڭگۋىرلەر دە قوسىلدى.