ناۋرىزناما ونكۇندىگى اياسىندا باتىس قازاقستان وبلىسىندا اعاش وتىرعىزۋ اكتسياسى ءوتتى.
ورال قالاسىنىڭ جاڭا بولىگى – 10-شاعىن اۋدانىندا 74 ءتۇپ شىرشا كوشەتى وتىرعىزىلدى. اكتسياعا ءوڭىر باسشىسى ناريمان تورەعاليەۆ, ارداگەرلەر, كاسىپكەرلەر, جاستار, قاراپايىم قالا تۇرعىندارى قاتىستى.
مەملەكەت باسشىسىنىڭ باستاماسىمەن بيىل ەلىمىزدە ەرەكشە تويلانىپ جاتقان ناۋرىزنامانىڭ ءار كۇنى ۇلتتىق قۇندىلىقتى ناسيحاتتاۋعا باعىتتالعان. جاڭارۋ كۇنىندە جايىق جاعاسىنداعى جاسىل قالانىڭ كوشەلەرى جاس كوشەتتەرمەن تولىقتى.
– ء«جۇز جىلدىعىن ويلاعان حالىق اعاش ەگەدى» دەيدى حالقىمىز. ءبىز بۇل كوشەتتەردى قالانىڭ تازالىعى, كوركى ءۇشىن وتىرعىزىپ جاتىرمىز, سونىمەن بىرگە بۇل جەلەك بولاشاق ۇرپاعىمىزدىڭ دا يگىلىگىنە قىزمەت ەتەدى. وبلىس ورتالىعىن تۇبەگەيلى جاڭارتۋعا قاتىستى كەشەندى جۇمىس بىلتىر باستالعان: جولدار سالىنىپ, تىنىمباقتار جوندەلىپ, جاڭا ورامدار اشىلدى. بۇل جۇمىس بيىل دا جالعاسادى, – دەدى وبلىس اكىمى ناريمان تورەعاليەۆ.
وبلىس اكىمىنىڭ ءباسپاسوز قىزمەتى حابارلاعانىنداي, وتكەن جىلى ورال قالاسىندا 4 مىڭعا جۋىق كوشەت وتىرعىزىلعان ەكەن. بيىل بۇل جۇمىس جالعاسىپ, ورال قالاسىن كورىكتەندىرۋ ماقساتىندا 3 مىڭداي اعاش وتىرعىزۋ كوزدەلگەن.
ورال ەلىمىزدەگى جاسىل جەلەگى مول قالالاردىڭ ءبىرى سانالادى. بىراق جەرگىلىكتى ەكولوگتەر, تابيعات جاناشىرلارى وزەندەر بويىنداعى ورمان قورىن مولايتۋ, بار ورماندى قورعاۋ جانە اعاش ەگۋ جۇمىسىن كوبەيتۋ جونىندە ءجيى باستاما كوتەرىپ كەلەدى. سونىمەن بىرگە جاڭادان وتىرعىزىلعان كوشەتتەردى كۇتىپ-باپتاۋ, ءوسىپ كەتۋىن قاداعالاۋ ەڭ باستى ماسەلە ەكەن.
– پرەزيدەنت باستاماسىمەن ەلىمىزدە 2 ملرد ءتۇپ اعاش ەگۋ جونىندە ۇلكەن جوبا قولعا الىنعان ەدى. بۇل تاپسىرما بويىنشا ءبىزدىڭ وبلىستا 56 ملن ءتۇپ اعاش ەگىلۋگە ءتيىس. قازىرگى تاڭدا ءبىزدىڭ وڭىردەگى ءتيىستى مەملەكەتتىك ورگاندار 22 ملن ءتۇپ اعاش ەگىلگەنى جونىندە ەسەپ بەرىپ جاتىر. ءبىزدىڭ قوعامدىق بىرلەستىكتىڭ ۇسىنىسىمەن قۇرامىندا قوعام بەلسەندىلەرى, جەرگىلىكتى ەكولوگيا دەپارتامەنتى ماماندارى بار ارنايى كوميسسيا قۇرىلىپ, ەگىلگەن اعاشتارعا ساناق جۇرگىزۋدى قولعا الاتىن بولدىق. ءبىزدىڭ بۇل ىسىمىزگە ماحامبەت وتەمىس ۇلى اتىنداعى ۋنيۆەرسيتەتتىڭ ستۋدەنتتەرى كومەكتەسۋگە دايىن, – دەيدى «تەلەگەي» ەكولوگيالىق قوعامدىق بىرلەستىگىنىڭ جەتەكشىسى داۋرەنبەك ساحىم.
قوعام بەلسەندىسىنىڭ ايتۋىنشا, قازىر وبلىس ورتالىعىنداعى تەرەكتەردى ينۆەنتاريزاتسيالاۋ ءىسىن ماحامبەت وتەمىس ۇلى اتىنداعى باتىس قازاقستان ۋنيۆەرسيتەتى جاساپ جاتىر. ياعني ءار تەرەك ەسەپكە الىنىپ, جەكە قۇجاتى جاسالماق.
باتىس قازاقستان وبلىسى