كۇننىڭ كۇرت جىلىنۋىنان اقتوبە وبلىسىنداعى دالالىق وزەندەر – ەمبى, جەم, ساعىز, تەمىر, ىرعىز, قاۋىلجىر وزەندەرىندەگى سۋ دەڭگەيى كوتەرىلىپ, بىرنەشە ەلدى مەكەنگە سۋ باسۋ قاۋپى ءتوندى.
26 ناۋرىزدا ويىل اۋدانىنىڭ امانگەلدى, شۇبارشي, سارالجىن اۋىلدارىنىڭ شەتىنە كىرگەن قارعىن سۋدىڭ بەتى قايتارىلدى. وسى كۇنى ىرعىز وزەنى شەڭبەرتال ەلدى مەكەنىنىڭ وتكەلىنە كەلىپ تىرەلىپ, جولدى سۋ باستى, اۋىل قاتىناسسىز قالدى. بايعانين اۋدانىنىڭ ويماۋىت, ميالى, ديار ەلدى مەكەندەرىنە باراتىن اۆتوكولىك جولىن بىرنەشە جەردەن سۋ شايىپ, اۋدان ورتالىعى – قاراۋىلكەلدىدەگى س.بايىشەۆ, باراق باتىر كوشەلەرى بويىنداعى تۇرعىن ۇيلەرگە سۋ كىردى. قاراۋىلكەلدىگە كىرگەن قارعىن سۋدىڭ بەتىن قايتارۋعا تجد, پوليتسيا دەپارتامەنتى, جەرگىلىكتى اتقارۋشى ورگان قىزمەتكەرلەرى جۇمىلدىرىلىپ, ولار سۋ باسۋ قاۋپى بار ۇيلەردىڭ جانىنا قۇم تاسىپ, جايىلعان سۋدىڭ شەتىن ينەرتتى ماتەريالدارمەن تولتىردى. مۇعالجار اۋدانى «قوجاساي – جاڭاجول» باعىتىنداعى جەرگىلىكتى ماڭىزى بار جولدىڭ 4 شاقىرىمىن سۋ شايىپ كەتىپ, قوجاساي مەن جاڭاجول اۋىلدارى قاتىناسسىز قالدى. قازىر بۇل جەردەن جەڭىل كولىكتەر وتە الماي, قاڭتارىلىپ تۇر. تەمىر اۋدانى ورتالىعى شۇبارقۇدىق كەنتىنىڭ بەس تۇرعىن ۇيىنە جانە 25 ءۇيدىڭ اۋلاسىنا سۋ كىردى. بۇل جاقتاعى جاعدايدى رەتتەۋگە تجد, پوليتسيا دەپارتامەنتى, توتەنشە جاعدايلار مينيسترلىگىنىڭ اقتوبە قالاسىنداعى №20282 اسكەري ءبولىمىنىڭ كۋرسانتتارى جۇمىلدىرىلدى. 26 ناۋرىز كۇنى «پوكروۆكا – تەمىر – كەڭقياق – ەمبى» (115-175) جانە «جاڭاجول – قوتىرتاس» وبلىستىق ماڭىزى بار اۆتوجولدار ۋچاسكەسىندە جۇك كولىكتەرىنىڭ قوزعالىسىنا شەكتەۋ قويىلدى. ويتكەنى جەم جانە قاۋىلجىر وزەندەرىنىڭ ەكپىندى سۋى جول بويىنداعى كوپىرلەردى بۇزىپ كەتۋى ابدەن ىقتيمال دەگەن قاۋىپ زور.
وبلىستىق تجد باس مامانى الىشەر سارباەۆتىڭ حابارلاۋىنشا, 26 ناۋرىزدا رەسپۋبليكالىق ماڭىزى بار «قاندىاعاش – ەمبى – شالقار – ىرعىز» تاسجولىنىڭ 288 شاقىرىمىن, وبلىستىق ماڭىزى بار «قاراۋىلكەلدى – التاي باتىر – ميالى» اۆتوكولىك جولىنىڭ 63 شاقىرىمىن جانە ايتەكە بي اۋدانى قايراقتى اۋىلدىق وكرۋگى تالدىق اۋىلىنىڭ كىرەبەرىس جولىن سۋ شايىپ كەتتى. اقتوبە وبلىسىنداعى سۋ تاسقىنىنا كومەككە ماڭعىستاۋ وبلىسىنان 52 ادامنان تۇراتىن قۇتقارۋ جاساعى بەس تەحنيكاسىمەن كەلدى. تەمىر وزەنى جاڭاجول گاز وڭدەۋشى زاۋىتىنا جاقىن ورنالاسقان. ساركول, شۇبارشي ەلدى مەكەندەرىنە دە قارعىن سۋ كىرىپ كەلۋى مۇمكىن. سەيسەنبى كۇنى اقتوبەگە تجم ۆيتسە-ءمنيسترى ەرلان نۇرپەيىسوۆ كەلىپ, بىردەن تەمىر اۋدانىنا جول تارتتى.
ەرىگەن قار سۋىمەن تولىققان دالالىق وزەندەر ارناسىنىڭ كۇرت كوتەرىلۋى اۋىل جۇرتىن ابىگەرگە سالدى. ايتا كەتۋ كەرەك, مۇعالجار قىراتتارىنان باستاۋ الاتىن بۇلاقتارمەن جالعاسقان ەلەك, ويىل, جەم, ساعىز, تەمىر, ور, ىرعىز, ەمبى وزەندەرىندەگى سۋدىڭ تاسۋى ادەتتە ءساۋىردىڭ العاشقى ونكۇندىگىندە وتەتىن. بۇل جولى كەۋىپ كەتكەن وزەن ارنالارىنىڭ كۇرت كوتەرىلۋىنە دالالىقتا جەرگە سىڭبەي ەرىگەن قاردىڭ سۋى سەبەپ بولعان. ال قازىر سۋ باسىپ جاتقان اۋىل ۇيلەرى ەرتەرەكتە كوكتەمدە سۋ جايىلاتىن جەرلەرگە سالىنعان. جاقىن كۇندەرى دالالىق وزەندەر دەڭگەيى ءالى دە كوتەرىلۋى مۇمكىن.
اقتوبە وبلىسى