20 ناۋرىز كۇنى وڭىردە ناۋرىز مەرەكەسىنە ارنالعان «كۇي كۇمبىرى» رەسپۋبليكالىق دومبىراشىلار چەللەندجى ءوتتى, دەپ حابارلايدى Egemen.kz.
استانا ۋاقىتى بويىنشا ساعات 12.00-دە پاۆلودار قالاسىنداعى قۇرمانعازى اتىنداعى بالالار مۋزىكا مەكتەبىنىڭ وقۋشىلارى, مۋزىكالىق كوللەدج كەشەنى-دارىندى بالالارعا ارنالعان مۋزىكالىق مەكتەپ-ينتەرناتىنىڭ وقۋشىلارى مەن ستۋدەنتتەرى جانە پاۆلودار قالاسى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ وقۋشىلارى «Batyr mall» ساۋدا ورتالىعىندا كۇيلەرىن ورتاعا سالدى.
ولار «بالبىراۋىن», «اداي», «سارىارقا» ق. ساعىرباي ۇلى; «تەپەڭ كوك» حالىق كۇيى; «القيسسا» ن. تلەنديەۆ; «ەركە سىلقىم» ءا. جەلدىباەۆ; «كوروعلى» د. شىعاي ۇلى; «كوكسەركە» بايجىگىتتىڭ كۇيلەرىن ورىندادى.
ايتا كەتسەك 12-20 ناۋرىز ارالىعىندا ءوڭىرىمىزدىڭ بارلىق مەكتەپتەرى, مەكتەپتەن تىس ۇيىمدارىنىڭ وقۋشىلارى جانە كوللەدج ستۋدەنتتەرى دومبىراشىلار چەللەندجىنە بەلسەنە قاتىستى.
«دومبىرا – ەجەلگى داۋىردەن كەلە جاتقان قازاق حالقىنىڭ كەڭ تاراعان قاسيەتتى ۇلتتىق مۋزىكالىق اسپابى. سوندىقتان وسكەلەڭ ۇرپاق دومبىرادا ورىنداۋ ونەرىنىڭ قاسيەتتى ءداستۇرىن جالعاستىرۋى كەرەك», دەيدى مۋزىكالىق كوللەدج كەشەنى-دارىندى بالالارعا ارنالعان مۋزىكالىق مەكتەپ-ينتەرناتىنىڭ باسشىسى سەرىك سىزدىقوۆ.