بۇگىن قازاقستان ازاماتتارى العاش رەت ۇلتتىق سپورت كۇنىن اتاپ ءوتىپ جاتىر. وسىعان وراي ەلورداداعى «ارعىماق» ات-سپورتتىق ساۋىقتىرۋ كەشەنىندە ناۋرىز مەيرامى اياسىندا ۇلتتىق سپورت كۇنىنە ارنالعان «ناۋرىزناما: ۇلتتىق سپورت كۇنى» اتتى مەرەكەلىك ءىس-شارا ءوتتى, دەپ حابارلايدى Egemen.kz.
ءىس-شاراعا تۋريزم جانە سپورت ءمينيسترى ەرمەك مارجىقپاەۆ, استانا قالاسى اكىمىنىڭ ورىنباسارى ەسەت بايكەن, ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ, ۇلتتىق سپورت ارداگەرلەرى, ۇلتتىق سپورت فەدەراتسيالارىنىڭ پرەزيدەنتتەرى, سپورتشىلار, ديپلوماتيالىق ميسسيالاردىڭ باسشىلارى مەن وكىلدەرى, سونداي-اق ەلوردا تۇرعىندارى مەن قوناقتارى قاتىستى.تۋريزم جانە سپورت ءمينيسترى ەرمەك مارجىقپاەۆ ءوزىنىڭ قۇتتىقتاۋ سوزىندە بۇگىنگى تاڭدا ەلىمىزدە ۇلتتىق سپورت تۇرلەرىنە دەگەن قىزىعۋشىلىق ارتىپ كەلە جاتقانىن اتاپ ءوتتى.
«قازاقتىڭ ۇلتتىق ويىندارى – مادەني-پاتريوتتىققا جەتەلەيتىن تاربيە قۇرالى. دەنساۋلىقتى نىعايتۋعا, سالاماتتى ءومىر سالتىن ناسيحاتتاۋعا ەلەۋلى سەپتىگىن تيگىزەدى. بۇگىن ەل ىشىندە وتكىزىلىپ جاتقان ات جارىستار, قۇسبەگىلىك جانە اسىق اتۋ, توعىزقۇمالاق, ساداق اتۋ سياقتى تۋرنيرلەر ازاماتتارعا شىنايى مەرەكەنى سەزىنۋگە مۇمكىندىك بەرىپ جاتىر», دەدى مينيستر.
ءوز كەزەگىندە ۇلتتىق سپورت تۇرلەرى قاۋىمداستىعىنىڭ پرەزيدەنتى يسلامبەك سالجانوۆ ەلىمىزدە ناۋرىز مەيرامىن تويلاۋدىڭ جاڭا تۇجىرىمداماسى اياسىندا 20 ناۋرىزدىڭ ۇلتتىق سپورتقا ارنالۋى بۇكىل ۇلتتىق سپورت ءۇشىن قۋانىشتى جاڭالىق ەكەنىن جەتكىزدى.
«كەيىنگى جىلدارى مەملەكەت باسشىسى قاسىم-جومارت توقاەۆتىڭ قولداۋىمەن ەلىمىزدە ۇلتتىق سپورت قارقىندى دامىپ كەلەدى. بيىل قىركۇيەك ايىندا ەلوردادا پرەزيدەنتتىڭ باستاماسىمەن 5-ءشى دۇنيەجۇزىلىك كوشپەندىلەر ويىندارى وتەدى. بۇل اۋقىمدى حالىقارالىق ءىس-شارا ۇلتتىق سپورتتى ودان ءارى دامىتۋعا تىڭ سەرپىن بەرەدى», دەدى يسلامبەك سالجانوۆ.
استانا قالاسى اكىمىنىڭ ورىنباسارى ەسەت بايكەن «ارعىماق» ات-سپورتتىق ساۋىقتىرۋ كەشەنىنە جينالعان قاۋىمدى مەيراممەن قۇتتىقتاپ, مەرەكە كۇندەرى ەلوردانىڭ بارلىق اۋدانىندا ۇلتتىق سپورت تۇرلەرى بويىنشا جارىستار وتەتىنىن حابارلادى.مەرەكەلىك ءىس-شارا اياسىندا كوكپار, اۋدارىسپاق, تەڭگە ءىلۋ, قىز قۋدان كورسەتىلىمدەر جانە توعىزقۇمالاق پەن اسىق اتۋدان شەبەرلىك سىنىپتارى ۇيىمداستىرىلدى. قوناقتارعا قازاقى تازى جانە بۇركىت كورسەتىلىپ, قۇسبەگىلىك ونەرى تۋرالى قىزىقتى اقپارات بەرىلدى.
سونىمەن قاتار كوكپاردان استانا مەن اقش قۇرامالارى اراسىنداعى جولداستىق كەزدەسۋ كورەرمەندەر ءۇشىن كەرەمەت توسىنسىي بولدى.
مەيرامعا وراي ءوزىنىڭ جەتىستىكتەرىمەن ۇلتتىق سپورتتى دارىپتەپ جۇرگەن ۇلتتىق سپورت ارداگەرلەرى مەن قايراتكەرلەر ماراپاتتالدى. ولاردىڭ قاتارىندا كوكپاردان كسرو-نىڭ توعىز دۇركىن چەمپيونى ءابىلحان داۋىلباەۆ, توعىزقۇمالاقتان ەكى دۇركىن ەل چەمپيونى مەيرامقۇل نوعايباەۆ, قازاق كسر ەڭبەك سىڭىرگەن جاتتىقتىرۋشىسى جۇمابەك مەيرامعاليەۆ, بەلگىلى سپورت ءجۋرناليسى, جازۋشى نەسىپ ءجۇنىسباي ۇلى, ەڭبەك سىڭىرگەن جاتتىقتىرۋشى قۇلامحان جاقىپوۆ, اسىق اتۋدان ۇلتتىق قۇرامانىڭ باس باپكەرى جومارت سابىرجانوۆ, اتبەگى مەيرامبەك چاكەنوۆ بار.
«ۇلتتىق سپورت ارداگەرى رەتىندە ەڭبەگىمىزدى ەلەپ, ماراپاتتاپ جاتقانىنا قۋانىشتىمىز. قازىر ەلىمىزدەگى جاس سپورتشىلارعا مۇمكىندىك كوپ. الداعى 5-ءشى دۇنيەجۇزىلىك كوشپەندىلەر ويىندارىندا ۇلتتىق قۇرامامىزعا جەڭىس تىلەيمىن», دەدى ءابىلحان داۋىلباەۆ.
ايتا كەتەيىك, ۇلتتىق سپورت قاۋىمداستىعىنىڭ قۇرامىنا بۇگىندە 10 فەدەراتسيا كىرەدى. ولار: بايگە, كوكپار, اۋدارىسپاق, ساداق اتۋ, جامبى اتۋ, تەڭگە ءىلۋ, قۇسبەگىلىك, اسىق اتۋ, «JORYQ» جانە ت.ب. وتكەن جىلى فەدەراتسيا سپورتشىلارى 12 حالىقارالىق جارىسقا قاتىسىپ, 95 مەدال جەڭىپ الدى, ونىڭ 35-ءى – التىن.