قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى 27 ناۋرىز – حالىقارالىق تەاتر كۇنى مەرەكەسىنە وراي, ناۋرىز ايىنىڭ 16–26-سى كۇندەرى ارالىعىندا «قاللەكي تىنىسى» اتتى سپەكتاكلدەر شەرۋىن ۇسىنادى.
ەلوردا كورەرمەندەرىن قاللەكي تەاتر ونەرىنىڭ ۇزدىك ۇلگىلەرىمەن تانىستىرۋ ماقساتىندا وتەتىن ساحنا مەرەكەسىندە تەاتر ساراپشىلارى مەن كورەرمەن نازارىنا 2022 جىلدىڭ ناۋرىز ايى مەن 2024 جىلدىڭ ناۋرىزى ارالىعىندا جارىق كورگەن پرەمەرالار ۇسىنىلادى. اتاپ ايتقاندا, ع.مۇسىرەپوۆتىڭ «بايان سۇلۋ – قوزى كورپەش», ە.ءشميدتىڭ «حات», ق.جەتپىسباەۆتىڭ «بالا مەرگەن», ە.جۋاسبەكتىڭ «ۇيلەنۋ», س.بالعاباەۆتىڭ «قىز جيىرماعا تولعاندا», د.رامازاننىڭ «جوشى حان», ج.شايحيسلام ۇلى مەن ع.مۇسىرەپوۆتىڭ «قىز جىبەك», ق.جيەنبايدىڭ «پاتشا كوڭىلىم, نە دەيسىڭ؟» جانە تەاتردىڭ شىعارماشىلىق زەرتحاناسى دايىنداعان «كەشكى...7» قويىلىمدارى كورەرمەنىن قۋانتادى.
شارا بارىسىندا تەاتر ساراپشىلارى سپەكتاكلدەردىڭ تولىق تالداۋىن جۇزەگە اسىرىپ, ۇزدىكتەردى انىقتايدى. سونىمەن قاتار بيىل كورەرمەندەر دە جاۋاپتى ساتكە اتسالىسۋ مۇمكىندىگىنە يە بولىپ وتىر. تەاتر فويەسىندەگى ارنايى ساۋالنامانى تولتىرىپ داۋىس بەرۋ ارقىلى ولار دا ۇزدىكتەرگە قولداۋ بىلدىرە الادى. ال قاتىسۋشىلار cاراپشىلار شەشىمىمەن «ۇزدىك ەر ادام ءرولى», «ۇزدىك ايەل ءرولى», «ەكىنشى پلانداعى ۇزدىك ەر ادام ءرولى», «ەكىنشى پلانداعى ۇزدىك ايەل ءرولى», «ۇزدىك سپەكتاكل», «ۇزدىك رەجيسسەر», كورەرمەن تاڭداۋى بويىنشا «ۇزدىك اكتەر», «ۇزدىك اكتريسا» «ۇزدىك سپەكتاكل» سىندى اتالىمداردا ارنايى سىيلىق جانە ديپلومدارمەن ماراپاتتالادى.
كەيىنگى جىلدارى جارىق كورگەن پرەمەرالاردى كەڭىنەن ناسيحاتتاپ, ساحنا مارتەبەسىن جوعارى دەڭگەيگە كوتەرۋ, تەاتردىڭ قوعامداعى ورنى مەن ادامزاتتىڭ رۋحاني ءوسىپ-وركەندەۋىنە تيگىزەر ىقپالىن ۇجىم الدىندا زەرتتەۋ, سونىمەن قاتار اكتەرلىك ونەردىڭ كاسىبي شەبەرلىك تۇرعىسىنان شىڭدالۋى, تەاتر ونەرىنىڭ تۇرلەرى مەن جانرلارىنداعى ۇزدىك جۇمىستاردى انىقتاۋ جانە قولداۋ, زاماناۋي تەاتر ءۇردىسىنىڭ نەگىزگى تەندەنتسيالارىن انىقتاۋ ءھام تەاتر ونەرىنىڭ كلاسسيكالىق جانە زاماناۋي مۇرالارى اراسىنداعى شىعارماشىلىق بايلانىستى نىعايتۋ; ەلوردا كورەرمەندەرىن قاللەكي تەاتر ونەرىنىڭ ۇزدىك ۇلگىلەرىمەن تانىستىرۋدى مۇرات ەتكەن ايتۋلى ونەر دۋمانى تەاترسۇيەر قاۋىمدى 10 كۇن بويى قۋانىشقا بولەيدى. سپەكتاكلدەر شەرۋىنىڭ سالتاناتتى جابىلۋى 27 ناۋرىز كۇنى ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىنىڭ ساحناسىندا وتەدى.