بۇقار جىراۋ اتىنداعى ادەبيەت جانە ونەر مۋزەيىنىڭ ۇجىمى ۇلتتىق كيىم كۇنىنە وراي وتكىزگەن بايقاۋدا جەرگىلىكتى مەكتەپتەردە وقيتىن 9 ىسمەر قىز ءوز تۋىندىلارىن تانىستىردى.
سايىستىڭ «تاقيالى قىز – ترەندتە» دەگەن اتاۋىنىڭ ءوزى ۇلتتىق باس كيىمدى جاس ۇرپاق اراسىندا ناسيحاتتاۋدى مەڭزەيدى.
ء«بىزدىڭ مۋزەيىمىز ءاردايىم مەكتەپ وقۋشىلارىنىڭ ۇلتتىق كيىمگە قىزىعۋشىلىعىن ارتتىرۋعا دەن قويىپ كەلەدى. بيىلعى ناۋرىز مەيرامىنا وراي قىز بالالار اراسىندا تاقيا تىگۋدەن اۋقىمدى سايىس وتكىزىلىپ جاتىر. تاقيا تىگۋ ونەرىن ناسيحاتتاۋ ارقىلى قىز بالالاردى ۇلتتىق قولونەردى كۇندەلىكتى ومىردە قولدانا بىلۋگە ۇيرەتۋ, شىعارماشىلىققا جەتەلەۋ, ىزدەنىسىن دامىتۋ, قازاقتىڭ ۇلتتىق كيىمىنە دەگەن جاستاردىڭ زەيىن قويۋشىلىعىن ارتتىرۋ كوزدەلدى», – دەيدى بۇقار جىراۋ مۋزەيى بۇقارالىق ۇيىمداستىرۋ ءبولىمىنىڭ باسشىسى جانار وسپانوۆا.
سايىسقا قاتىسقان توعىز ۇمىتكەر وزدەرىنىڭ تىگىپ اكەلگەن تاقيالارىن قازىلار القاسىنىڭ نازارىنا ۇسىنىپ, جۇمىستارىن قورعاپ شىقتى. جاسالۋ جولدارى مەن تىگىس ادىستەرىن, تاقيانىڭ قازىرگى زامانداعى ماڭىزدىلىعىن باياندادى.
جاس دارىن مەكتەبىنىڭ 6-سىنىپ وقۋشىسى نۇراي ءومىرالى بايقاۋعا تىگىپ اكەلگەن ۇكىلى تاقياسىن كۇمىس اشەكەيلەرمەن, ءتۇرلى-ءتۇستى مونشاقتارمەن بەزەندىرگەنىن جەتكىزدى. ء«ارتۇرلى تاسپالارمەن ورنەكتەپ, ۇكىنىڭ قاۋىرسىنىن تاقتىم. باس كيىمنىڭ ديزاينىن ۇستازىممەن اقىلداسىپ, ال قاجەت ماتەريالدار مەن اشەكەي زاتتاردى انام الىپ بەردى. ۇيدە بىرنەشە تاقيام بار, مەرەكەلىك ءىس-شارالاردا ۇنەمى كيىپ شىعامىن. ماعان ۇلتتىق باس كيىم ۇنايدى. انامنىڭ ايتۋىنشا, ەرتەدە قىز بالالار باسىنان تاقياسىن تاستاماعان», دەپ ءوز ويىمەن ءبولىستى ءجاسوسپىرىم قىز.
قازىلار القاسىنىڭ قۇرامىندا وقۋشىلاردىڭ ونەرىن باعالاعان عاليا سۇڭعاتوۆا جاس ىسمەرلەردىڭ تالابى كوڭىلدەن شىعاتىنىن جەتكىزدى. عاليا بالتابايقىزىنىڭ ءوزى جاستاردى قولونەرگە باۋلىپ, قازاقتىڭ ۇلتتىق كيىمدەرىن ناسيحاتتاپ ءجۇر. ىسمەر جاننىڭ قولىنان شىققان ەرەكشە بۇيىمدارى گيننەستىڭ رەكوردتار كىتابىنا ەنگەن. بۇگىندە ول – «كاۋسار بۇلاق» اتا-اجەلەر مەكتەبىنىڭ توراعاسى.
«تاقيا – قىز بالانىڭ تالعامىن وياتىپ, سەنىمىن قالىپتاستىرىپ, بويىنىڭ سۇڭعاق بولىپ وسۋىنە اسەر ەتەدى. ەرتەدە حالقىمىز قىزدارىنا 3 جاسىنان باستاپ تاقيا كيگىزگەن, باس جاسقا تولعاندا شاشىن ءورىپ, شولپى تاققان. بويجەتە باستاعاندا كامشات بورىك كيگىزگەن. تاقيا قىزىل, القىزىل, كۇلگىن, جاسىل ءتۇستى بارقىت ماتادان تىگىلىپ, مونشاق-مارجاندارمەن اشەكەيلەنگەن. سوعان وراي ونىڭ زەرلى, ۇكىلى, وقالى, سىرما, شوشاق توبە جانە ت.ب. تۇرلەرى بار», – دەيدى اجەي.
بايقاۋدىڭ ەكىنشى كەزەڭىنە ىرىكتەلگەن 5 قاتىسۋشى تاقيانى دايىن سۇلبالارىمەن اشەكەيلەدى.
قازىلار القاسىنىڭ شەشىمىمەن ءۇشىنشى ورىندى ق.بەكقوجين مەكتەبىنىڭ 9-سىنىپ وقۋشىسى دايانا قايرۋلا يەلەنسە, ەكىنشى ورىندى ايارۋ باكەن (ق.بەكقوجين مەكتەبىنىڭ 7-سىنىپ وقۋشىسى), ءبىرىنشى ورىندى جاس دارىن مەكتەبىنىڭ وكىلى ءجانيا اۋەزوۆا جەڭىپ الدى. ال باس جۇلدەگە نۇراي ءومىرالى يە بولدى. جەڭىمپازدار مەن جۇلدەگەرلەر ديپلومدارمەن جانە باعالى سىيلىقتارمەن ماراپاتتالدى.
پاۆلودار