ۇلىستىڭ ۇلى كۇنى ناۋرىز مەيرامىن تويلاۋدى ەلوردالىق تەاترلار دا باستاپ كەتتى. سونىڭ ءبىرى – «استانا وپەرا». تاماشا ءداستۇر-جورالعىلاردى جارقىراتا كورسەتكەن ۇيىمشىل ۇجىم بۇكىل ەلمەن بىرگە ۇلىق مەيرامدى كوتەرىڭكى كوڭىل كۇيدە اتاپ ءوتتى.
«كورىسۋ كۇنى شۋاقتى كوكتەمنىڭ العاشقى كۇندەرىمەن سايكەس كەلەدى. مۇنى قازاق حالقىنىڭ دانالىعىمەن كەلگەن مەيرام دەپ ەسەپتەيمىن, ونىڭ تاريحى تەرەڭدە جاتىر. ەرتەدە كۇزەۋدەن قىستاۋعا كوشىپ جۇرگەن اتا-بابالارىمىز كۇن جىلىپ, قار ەرىگەن شاقتا الىستاعى اعايىنمەن ساعىنىسا قاۋىشىپ, اماندىق سۇراسقان. سوندىقتان دا ايتۋلى مەرەكە ادامنىڭ بويىنداعى ەڭ ىزگى قاسيەتتەردى وياتادى, قوعامدا, ۇجىمدا ءبىر-بىرىمىزگە دەگەن سىيلاستىعىمىزدى ارتتىرادى», دەگەن تەاتردىڭ وپەرا ترۋپپاسىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى مەيىر باينەش كورىسۋ كۇنىنىڭ حالقىمىزدىڭ ەڭ كونە داستۇرلەرىنىڭ ءبىرى سانالاتىنىن ايتا كەلىپ, ونىڭ ءمان-ماڭىزىنا دا توقتالدى.
ءيا, كورىسۋ كۇنىنىڭ قازاق ومىرىنەن, دۇنيەتانىمىنان الار ماڭىزى زور. قىتىمىر قىستى وتكەرگەن اعايىن بۇل كۇنى ءبىر-ءبىرىنىڭ ۇيىنە قوناققا بارىپ, ءتورت قۇبىلاسىن تۇگەندەپ, اماندىق سۇراسادى. ۇلكەندەر جاستارعا باتا بەرىپ, «جاسىڭ قۇتتى بولسىن!», ء«بىر جاسىڭمەن!» دەگەن تىلەكتەر ايتىلادى. ايتۋلى مەرەكە, اسىرەسە, ەلىمىزدىڭ باتىس وڭىرىندە كەڭىنەن تارالعان. بۇل جاقتا ونى «كورىسۋ ايت», «كورىسۋ امالى» دەپ تە ايتىپ جاتادى. وسى رەتتە ورالدا تۋىپ-وسكەن, قازىرگى تاڭدا «استانا وپەرا» تەاترى بالەت ترۋپپاسىنىڭ ءسوليسى بولىپ ەڭبەك ەتەتىن سۇلتانبەك عۇمار كورىسۋ كۇنىن باتىس ايماقتاردا قالاي قارسى الاتىنىن ايتىپ بەردى.
«بۇل مەرەكە ماعان بالا كۇنىمنەن تانىس. وقۋشى كەزىمدە 14 ناۋرىز كەلگەندە مەكتەپتەر ءوزارا ارالاسىپ, ءتۇرلى ءىس-شارا وتكىزەتىن ەدىك. جالپى, باتىستا كورىسۋ ايت جاقسى تويلانادى. ءدال وسى كۇنى بارلىق تۋعان-تۋىس: اعا-جەڭگەلەر, كەلىندەر, نەمەرە-شوبەرەلەر اۋلەتتىڭ ۇلكەنى سانالاتىن اتا-اجەمىزدىڭ شاڭىراعىنا جينالىپ, حال-جاعداي سۇراسادى, اق داستارقان باسىندا تىلەكتەرىن ايتادى. مۇنداعى ماقسات – تۋىستى بىرىكتىرۋ, ءبىر اتادان تاراعان ۇرپاقتاردى ءبىر-بىرىمەن تانىستىرۋ, ارالارىنداعى دوستىق پەن تاتۋلىقتى ارتتىرۋ. دانا حالقىمىز نە ىستەسە دە, ءبارىن ءبىلىپ ىستەگەن عوي. قازىر شەتتە جۇرسەك تە, مۇمكىندىگىمىز كەلگەنشە جاقىندارىمىزعا حابارلاسىپ تۇرۋعا تىرىسامىز», دەدى سۇلتانبەك عۇمار.
تەاتر ارتىستەرى اتاپ وتكەندەي, كورىسۋ كۇنى سەكىلدى ىزگى مەيرامدار ادامداردى جاقىنداستىرا تۇسەدى. ال ەڭ باستىسى وسىنداي مەرەكەلەر ارقىلى ءبىز ءوزىمىزدىڭ ۇلتتىق سالت-داستۇرلەرىمىز بەن قۇندىلىقتارىمىزدى ساقتاپ قالامىز جانە ونىڭ ۇرپاقتان-ۇرپاققا جەتۋىنە ىقپال ەتەمىز.
«بارلىعىڭىزدى كەلىپ جەتكەن كورىسۋ كۇنىمەن شىن جۇرەكتەن قۇتتىقتايمىن. وتباسىلارىڭىزعا تەك ىنتىماق-بىرلىك, مولشىلىق, دەندەرىڭىزگە ساۋلىق, باستارىڭىزعا باق-بەرەكە تىلەيمىن. بار قيىنشىلىقتى, ۋايىم مەن وكپە-رەنىشتى ارتتا قالدىرىپ, جاڭا جىلعا جاقسىلىقپەن, قۋانىشپەن قادام باسىڭىزدار. ادىلەتتى قازاقستانىمىز كوركەيىپ, حالىقتىڭ ءال-اۋقاتى جىلدان-جىلعا ارتىپ, الەمنىڭ وزىق ەلدەرىنىڭ قاتارىنان كورىنە بەرەيىك. ەلىمىز امان, جۇرتىمىز تىنىش بولسىن!», دەپ «استانا وپەرانىڭ» جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى جانات شىبىقباەۆ بارشا قازاق ەلىنە ءوزىنىڭ اقجارما تىلەگىن جەتكىزدى.
بۇل تاماشا داستۇردەن م.گوركي اتىنداعى اكادەميالىق ورىس دراما تەاترى دا قالىس قالمادى. تەاتر ديرەكتورى, قازاقستاننىڭ ەڭبەك سىڭىرگەن قايراتكەرى ايبولات جاۋدىردىڭ باستاماسىمەن تەاتر تورىندە «سالەم, ناۋرىز!» اتتى كورمە اشىلىپ, ۇجىم قىزمەتكەرلەرى ناۋرىز مەرەكەسىنىڭ تاريحىمەن تانىسىپ, ۇلتتىق ءان مەن بيدەن شاشۋ شاتى.
«ناۋرىز – قازاق ءۇشىن قاسيەتتى مەيرام. مۇنىڭ ەلىمىزدىڭ ءتورىن مەكەن ەتكەن وزگە ۇلت وكىلدەرىن ءبىر شاڭىراق استىندا ۇيىستىرىپ, بەرەكە مەن بىرلىكتە جاراسىمدى ءومىر كەشۋىنە دە ىقپالى زور. ناۋرىز – مەيىرىم مەن قامقورلىق, باۋىرمالدىق پەن ىزگىلىك, امال مەرەكەسى», دەپ اتاپ ءوتتى ايبولات جانعالي ۇلى.
وسىلايشا, ەلوردانىڭ مادەني مەكەمەلەرى كورىسۋ كۇنىن زور قۋانىشپەن قارسى الىپ, تەاترلارىنىڭ تورىندە ۇلىستىڭ ۇلى كۇنىن تويلاۋدى مەرەكەلىك كوڭىل كۇيدە باستاپ كەتتى.