شاڭىراق كۇنىندە كەرەكۋ جۇرتى وتباسىلىق قۇندىلىقتاردى ناسيحاتتادى. س.تورايعىروۆ اتىنداعى وبلىستىق كىتاپحانا ۇجىمى بۇل كۇنى التى ايلىق ءسابي ايشاعا ۇكىلى دومبىرا سىيلاپ, اق جاۋلىقتى اجەلەر باتا بەردى.
«بۇگىن – ەلىمىزدە وتباسىلىق قۇندىلىقتار دارىپتەلەتىن كۇن. ونەگەلى, ۇلاعاتتى وتباسىلارعا قۇرمەت كورسەتۋ ماقساتىندا وڭىرىمىزدە كوپتەگەن ءىس-شارا ءوتىپ جاتىر. ءبىزدىڭ ۇجىمىمىزداعى قىزمەتكەرلەردىڭ وتباسىنداعى ەڭ كىشكەنتاي ءسابي ارىپتەسىمىز الپىسباي حونجدىڭ بوبەگى بولىپ شىقتى. مىنەكەي, كىتاپحانا ۇجىمى جينالىپ, ايشا ەسىمدى سابيگە سىيلىق جاساۋعا كەلدىك», دەپ اتاپ ءوتتى س.تورايعىروۆ اتىنداعى وبلىستىق كىتاپحانانىڭ كرەاتيۆتى شىعارماشىلىق ورتالىعىنىڭ باسشىسى مارال تاجەنوۆا.
كىشكەنتاي ايشاعا قازاقتىڭ ۇلتتىق اسپابى – ۇكىلى دومبىرانى ءداستۇرلى ءانشى, رەسپۋبليكالىق بايقاۋلاردىڭ جۇلدەگەرى اسەل بوتاەۆا تابىستادى. ەرتەدە جاسى ۇلكەن, اۋزى دۋالى ادامدار مەن ونەرى ەلدەن اسقان جاندار سابيلەرگە باتا بەرىپ, بالالاردىڭ عۇمىر جاسى ۇزاق بولۋىن تىلەگەن. بالاعا ىرىمداپ سىيلىق سىيلاۋ, ءتىل-كوزدەن ساقتاسىن دەپ ۇكى, تۇمار تاعۋ بۇلجىماس داستۇرلەردىڭ ءبىرى بولعان. ءاز ناۋرىز قارساڭىندا حالقىمىزدىڭ وسىنداي يگى داستۇرلەرى قايتا ورالىپ جاتقانى قۋانتادى.
كىتاپحانا سالاسىنىڭ ارداگەرى, اق جاۋلىقتى اجە حاديشا داندىباەۆا ءىس-شاراعا جينالعاندارعا شاشۋ شاشىپ, سابيگە باتاسىن بەردى. «شاڭىراق كۇنى ەلىمىزدىڭ ءار ازاماتىنا جاقسىلىق, وتباسىنىڭ اماندىعىن تىلەيمىز. ءار شاڭىراقتىڭ بوساعاسىنىڭ بەرىكتىگىن, ۇرپاقتارىنىڭ كەرەگەسى كەڭەيە بەرگەنىن, بەرەكە-ىنتىماعى ارتىپ, ىرىس-داۋلەتىنىڭ تاۋسىلماۋىن تىلەيمىز. قۇتىمىز شايقالماسىن, قازانىمىز وتتان تۇسپەسىن!» دەپ تىلەدى اجەي.
التى ايلىق ايشانىڭ اكەسى الپىسباي حونج – س.بايازيتوۆ اتىنداعى بالالار وقۋ ورتالىعىنىڭ باسشىسى, اقىن, ساتيريك. ال اناسى گۇلمەرەي مەكتەپتە ساباق بەرەدى. جاس ءارى ونەگەلى وتباسىنداعى بالالاردىڭ ۇلكەنى – ۇل. «ناۋرىز-بازارلىققا» كەنەلگەن شاڭىراق يەلەرى كىتاپحاناشىلار ۇجىمىنا ريزاشىلىقتارىن جەتكىزدى.
س.تورايعىروۆ اتىنداعى كىتاپحانا ناۋرىز مەيرامىنا ارنالعان ءار ايشىقتى كۇنگە ەرەكشە شارالاردى ارناپ جاتىر. ۇمىتىلعان داستۇرلەر فەستيۆالى, امال مەرەكەسىن اتاپ وتسە, «اينا» گالەرەياسىندا ۇلتتىق ناقىشتاعى كەسكىندەمەلەر مەن قولدانبالى ونەردىڭ تۋىندىلارى قويىلدى. كيىز ءۇي قۇرۋ بويىنشا ەل ۇلكەندەرىنىڭ شەبەرلىك ساعاتى بولدى. الداعى ۋاقىتتا ناۋرىز مەيرامىنا وراي مۇندا ۇلتتىق ويىندار – اسىق اتۋ مەن توعىزقۇمالاقتان سايىستار, «ۇكىلى قىز» بايقاۋى ۇيىمداستىرىلادى دەپ كۇتىلىپ وتىر.
پاۆلودار