ءىىم شەگىلمەيتىن تەمەكى ونىمدەرىن زاڭسىز ساتۋ مەن تاراتۋ ءۇشىن جاۋاپكەرشىلىك بارىن ەسكە سالدى, دەپ حابارلايدى Egemen.kz.
- قۇرمەتتى ازاماتتار! مەملەكەت باسشىسى «ادال ادام – ادال ەڭبەك – ادال تابىس» ۇلتتىق قۇرىلتايىنىڭ ءۇشىنشى وتىرىسىندا ناسىبايدى پايدالانۋ ەڭ زياندى جانە ۇياتتى ادەتتەردىڭ ءبىرى ەكەنىنە نازار اۋداردى. ناسىباي انتيسانيتاريالىق جاعدايدا قولدان جاسالادى. ونىڭ قۇرامىندا ءارتۇرلى اۋرۋلاردى, سونىڭ ىشىندە قاتەرلى ىسىك اۋرۋىن تۋدىراتىن زاتتار بار. قازىرگى ۋاقىتتا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىندە شەگىلمەيتىن تەمەكى ونىمدەرىن, ونىڭ ىشىندە ناسىبايدى اكەلۋگە, وندىرۋگە, ساتۋعا جانە تاراتۋعا تىيىم سالۋ كوزدەلگەن, - دەدى دەپارتامەنت باستىعى – ءىىم رەسمي وكىلى شىڭعىس الەكەشەۆ.
ول شەگىلمەيتىن تەمەكى ونىمدەرىن زاڭسىز ساتقانى ءۇشىن 25 اەك نەمەسە 92 مىڭ تەڭگەدەن استام مولشەردە ايىپپۇل كوزدەلگەنىن ايتتى. "زاڭ مەن ءتارتىپ” قاعيداتىن قامتاماسىز ەتۋ ماقساتىندا ىشكى ىستەر ورگاندارى قوعاممەن بىرلەسىپ, 18-31 ناۋرىز ارالىعىندا رەسپۋبليكالىق جەدەل-پروفيلاكتيكالىق ءىس-شاراسىن وتكىزبەك.
- اكتسيا بارىسىندا حالىققا ناسىبايدى تۇتىنۋدىڭ زاردابى جانە كاسىپكەرلەرگە ونى ساتۋعا جول بەرمەۋ تۋرالى قۇقىقتىق ءتۇسىندىرۋ جۇمىستارى جۇرگىزىلەتىن بولادى. ساۋدا ەرەجەلەرىن بۇزۋ فاكتىلەرى انىقتالعان جاعدايدا كىنالى تۇلعالار جاۋاپقا تارتىلاتىن بولادى.
ۆەيپتەر مەن شەگىلمەيتىن تەمەكى ونىمدەرىن اكەلۋ, ءوندىرۋ, ساتۋ جانە تاراتۋ ءۇشىن قىلمىستىق جاۋاپكەرشىلىكتى ەنگىزۋ تۋرالى زاڭ جوباسى قازاقستان رەسپۋبليكاسى پارلامەنتىنىڭ قاراۋىندا ەكەنىنە نازار اۋدارامىن. قۇرمەتتى ازاماتتار, اتالعان شارا ءبىرىنشى كەزەكتە ۇلت بولاشاعى – جاستاردىڭ دەنساۋلىعىن ساقتاۋعا باعىتتالعان, – دەدى شىڭعىس الەكەشەۆ.