ىلە اۋدانىنىڭ اششىبۇلاق اۋىلدىق وكرۋگىندەگى 97617 اسكەري بولىمدە «اسكەر بولعىم كەلەدى» اتتى ءىس-شارا ۇيىمداستىرىلدى. باسقوسۋدىڭ ماقساتى – جاستاردىڭ بويىندا ءپاتريوتيزمدى قالىپتاستىرا وتىرىپ, جوعارى مورالدىق-پسيحولوگيالىق قاسيەتتەرگە تاربيەلەۋ, جاس ۇرپاقتى اسكەري قىزمەتكەردىڭ جۇمىسىمەن جانە ونىڭ قىر-سىرىمەن تانىستىرۋ.
تاعىلىمى مول ءىس-شاراعا اۋدانداعى «پروگرەسس» پوليتەحنيكالىق كوللەدجى مەن ەكونوميكالىق جانە قۇقىقتىق كوللەدجىنىڭ 1-2 كۋرس ستۋدەنتتەرى قاتىستى. كەزدەسۋ بارىسىندا جاستار وزدەرىن قىزىقتىرعان قارۋ-جاراقتارمەن جانە قورعانىش قۇرالدارىمەن تانىسىپ, ماكاروۆ تاپانشاسىنان باستاپ, كالاشنيكوۆ اۆتوماتى مەن پۋلەمەتىن شاشىپ, جيناپ كوردى. سونداي-اق «Qaisar» ديالوگ الاڭىندا پىكىر الماسىپ, وتان الدىنداعى ازاماتتىق بورىشتى وتەۋدىڭ جاۋاپكەرشىلىگى مەن قىزىقتارى جايلى ەركىن, جان-جاقتى وي-تولعامدارىمەن ءبولىستى. اسكەري بولىمدە تۇسكى اس ءىشىپ, ساربازداردىڭ تىنىس-تىرشىلىگىمەن تانىستى.
«ەر ازاماتتىڭ الدىندا تۇرعان ۇلكەن مىندەتتەردىڭ ءبىرى – اسكەر قاتارىندا ابىرويلى قىزمەت ەتىپ, ءومىردىڭ ىستىق-سۋىعىنا شىنىعىپ, ءوزىن شيراتۋ. بۇگىنگى كۇندە اسكەردەن جالتاراتىن جاستار جوق ەمەس. وسى كەمشىلىكتىڭ ورنىن تولتىرۋدا جاستاردى اسكەري ومىرمەن تانىستىرۋدىڭ ماڭىزى زور», دەيدى وبلىستىق «جاستار رۋحى» جاستار قاناتى توراعاسىنىڭ ورىنباسارى نۇربەك ەرگەشباي.
اسكەري بولىمگە جاسالعان ەكسكۋرسيادان ايرىقشا اسەر العان ستۋدەنت-جاستار مۇنداي ءىس-شارالاردىڭ ءجيى ۇيىمداستىرىلىپ تۇرۋىنا ۇسىنىستارىن ءبىلدىردى.
الماتى وبلىسى