جۋرناليست اعابەك قونارباي ۇلىنىڭ «شىنايى ومىردە بولعان وي سالار وقيعالار» كىتابى جارىق كوردى. رەسپۋبليكالىق «ايقىن», «دالا مەن قالا», «جاس قازاق» گازەتتەرىندە ماقالالارى جاريالانىپ, كوزىقاراقتى كوپشىلىككە قاۋىمعا ەسىم-سويى كەڭىنەن تانىلعان اعابەكتىڭ بۇل – ەكىنشى كىتابى. بۇعان دەيىن «ماشاقات پەن ماراپات» كىتابى دا كوپشىلىكتىڭ ىستىق ىقىلاسىنا كەنەلگەن ەدى.
«كىتاپ جازۋدىڭ ءوز جاۋاپكەرشىلىگى, سالماعى بار. وقيعالاردىڭ شىنايىلىعىنا كوز جەتكىزۋ ماقساتىندا بىرنەشە قالاعا بارۋعا تۋرا كەلدى. كەيىپكەردىڭ وزىمەن نەمەسە سەنىمدى كۋاگەرمەن كەزدەسىپ, عيبراتتى وقيعالاردى بوياماسىز جەتكىزۋگە, تاعىلىمى مول جايتتاردى بايانداۋعا تىرىستىق», – دەيدى اۆتور.
اتاۋى ايگىلەگەندەي, ەكى جىلدىق تاباندى ەڭبەگىنىڭ وتەۋىنە جارىق كورگەن كىتابىندا اۆتور ومىردە كورگەن عيبراتتى وقيعالاردان العان ونەگەسىن باياندايدى. قوعامدا سەتىنەپ بارا جاتقان باۋىرمالدىق پەن قايىرىمدىلىق قاسيەت تۋراسىندا تولعاعان ءار وقيعانىڭ اپارار ۇيىعى بىرەۋ عانا – ىزگى امال.
ابدۋللا يبن مۇباراكتىڭ «از امالدى نيەت كوبەيتەدى, كوپ امالدى نيەت ازايتادى» دەگەنى تەگىن ەمەس. كوپ ادامنىڭ اق ادال نيەتىنە بوي كوتەرگەن مەشىت تۋراسىندا, باتىر باۋىرجان مومىش ۇلىنىڭ ءوز پاتەرىن قارت اجەيگە بەرگەن مارتتىگى, ەكىنشى دۇنيەجۇزىلىك سوعىستا 300-دەن اسا اسكەري تاپسىرمانى ورىنداپ, اۋەگە ۇشقان كەڭەس وداعىنىڭ ەكى دۇركىن باتىرى اتانعان جالعىز قازاق تالعات بيگەلدينوۆتىڭ اجالدان قورعانعان امالى, قۇنانباي قاجىنىڭ قارقارالىدا بورەنەدەن قيىپ سالدىرعان مەشىتىنىڭ مۇرتى دا بۇزىلماي بۇگىنگە دەيىن قالاي ساقتالعانى جونىندە وسى كىتاپتا ايتىلادى. تۇپ-تۋرا ءبىر عاسىر بۇرىن, 1924 جىلى شولاق بەلسەندىلەر ابايدىڭ اكەسى سالدىرعان اللانىڭ ءۇيىن ورتەۋ پيعىلىمەن بىرنەشە رەت وت قويعان. وسىنداي قىساستىڭ تالايىن كورگەن مەشىتتىڭ ءبۇتىن ساقتالۋى دا قامقور جانداردىڭ ىزگى امالىنان ەكەنىن اۆتور تەرەڭدەي تولعايدى.