«اناعا تاعزىم» ورتالىعىنا قاراستى «بويتۇمار» ديزاين جانە قولونەر ۇيىرمەسىنىڭ قىزدارى قولدان توقىلعان مونشاقتى سومكەلەر جارمەڭكەسىن ۇيىمداستىردى. ورتالىق باسشىسى ەلميرا مىرزاعاليدىڭ ايتۋىنشا, ۇيىرمەگە قاتىسۋشى جاسوسپىرىمدەر از عانا ۋاقىتتىڭ ىشىندە كوپتەگەن بۇيىمدى توقۋدى ۇيرەنىپ العان.
ۇيىمداستىرۋشىلار كەلتىرگەن دەرەككە سەنسەك, جارمەڭكەگە جۇزگە جۋىق قولدان توقىلعان سومكەلەر قويىلىپتى. ءىس-شاراعا ارنايى كەلگەن قوناقتاردىڭ ايتۋىنشا, ەستەتيكالىق تالعاممەن توقىلعان بۇيىمداردىڭ ساپاسى جوعارى ەكەن.
«از عانا ۋاقىتتىڭ ىشىندە جاس-وسپىرىمدەردىڭ تاماشا بۇيىمدار توقىپ ۇيرەنگەنى كوڭىل كونشىتەدى. مونشاقپەن جۇمىس ىستەۋگە ابدەن داعدىلانعانىن, ولاردىڭ قولعا العان جۇمىستارىنىڭ ساپاسىنان ايقىن اڭعارۋعا بولادى. جارمەڭكەگە كەلگەندەرمەن بىرگە ءبىز دە وقۋشىلاردىڭ ونەرىنە قىزىعىپ, جۇمىستارىنا ريزا بولىپ تۇرمىز», دەيدى كەلۋشىلەردىڭ ءبىرى عاليا دۇيسەنبەكوۆا.
قىرىقتان استام ۇيىرمە قاتىسۋشىسى ءوز بۇيىمدارىن ۇسىنعان جارمەڭكە جۇمىسىن ءوڭىر باسشىسى ەربول قاراشوكەەۆ جوعارى باعالاپ, ءبىلىم الۋشىلاردىڭ تالابى مەن تالانتىنا ريزا بولدى.
ء«بىزدىڭ ورتالىقتا از جۇمىس اتقارىلىپ جاتقان جوق. ال «اناما سىي» جارمەڭكەسىن ۇيىمداستىرۋداعى باستى ماقسات – جاسوسپىرىمدەردىڭ اناعا دەگەن پەرزەنتتىك بورىشى مەن ماحابباتىن سەزىندىرۋ. سول ماقساتتىڭ ۇدەسىنەن شىعۋ ءۇشىن قاتىسۋشىلارىمىز ايانىپ قالعان جوق. ءتۇرلى ۇلگىدە توقىلعان تۋىندىسىن جارمەڭكەگە شىعاردى. كەلۋشىلەر تاراپىنان جوعارى باعالانىپ جاتقانىن دا كوردىك. قىزداردىڭ ەڭبەگىنە قىزىعىپ, سومكەلەردى ساتىپ العاندار دا بولدى», دەيدى «اناعا تاعزىم» ورتالىعىنىڭ باسشىسى ە.مىرزاعالي.
تاراز