مەملەكەت باسشىسىنىڭ قۇقىق قورعاۋ ورگاندارىنا قوياتىن باستى تالابىنىڭ ءبىرى – وتاندىق بيزنەستى قورعاۋ. وسىعان وراي باس پروكۋراتۋرانىڭ باستاماسىمەن كاسىپكەرلەردىڭ قۇقىقتارىن قورعاۋ سالاسىنا تالداۋ جۇرگىزىلىپ, قىلمىستىق-قۇقىقتىق تاجىريبەنىڭ جۇيەلى پروبلەمالارى انىقتالدى.
2022 جىلى باس پروكۋرور جەرگىلىكتى دەڭگەيدەگى بارلىق پروكۋرورعا, سونداي-اق ەلدىڭ قۇقىق قورعاۋ ورگاندارى باسشىلارىنا كاسىپكەرلەردى زاڭسىز قۋدالاۋعا جول بەرمەۋ جونىندە نۇسقاۋ بەرگەنى بەلگىلى. نۇسقاۋعا سايكەس كاسىپكەرلەرگە وزىنە قاتىستى ۇكىم شىققاننان كەيىن دە ودان ءارى شاعىمدانۋ قۇقىعى, سونىمەن بىرگە ءتيىستى تەكسەرۋ ناتيجەلەرى تۋرالى اكتىمەن تانىسۋ مۇمكىندىگى بەرىلدى. مۇنداي ءتارتىپ 2023 جىلى قىزىلوردا وبلىسى كاسىپكەرلەرىنە قاتىستى قىلمىستىق ىستەردى تىركەۋ فاكتىلەرىنىڭ سانىن ەكى ەسەگە ازايتۋعا سەپتىگىن تيگىزدى.
بۇل وزگەرىستەردىڭ ناقتى مىسالدارىنا توقتالساق, وبلىستىق پروكۋراتۋرا ورگاندارىنىڭ قىزمەتكەرلەرى كاسىپكەرلىك سۋبەكتىلەرىنە قاتىستى قوزعالىپ, بىرنەشە جىل كولەمىندە شەشىمىن تاپپاعان 45 قىلمىستىق ءىستى انىقتاپ, بارلىعىن اقتاۋ نەگىزدەرىمەن توقتاتتى. قىلمىستىق قۋدالاۋ ورگانىنىڭ 2 كاسىپكەردىڭ شەتەلگە شىعۋىن شەكتەيتىن زاڭسىز شەشىمى انىقتالىپ, جويىلدى. 3 كاسىپكەردىڭ مۇلكى تىيىم سالۋدان بوساتىلىپ, شەكتەۋلەر الىنىپ تاستالدى.
كاسىپكەرلىك قىزمەتكە كەدەرگى جاساۋ فاكتىسى بويىنشا 1 قىلمىستىق ءىس قوزعالىپ (قىلمىستىق كودەكستىڭ 365-بابى), تەرگەۋ ناتيجەسىندە سوتقا جولداندى. كىنالى ادامعا قاتىستى سوت ۇكىمىمەن 3 جىل باس بوستاندىعىن شەكتەۋ جازاسى بەكىتىلدى.
جۋىردا قىزىلوردا وبلىسىندا بيزنەستى زاڭسىز قۋدالاۋدان قورعاۋ بويىنشا دوڭگەلەك ۇستەل ءوتىپ, وندا پروكۋرورلاردىڭ وسى باعىتتا اتقارعان جۇمىستارى, كاسىپكەرلىك سۋبەكتىلەرىن باقىلاۋشى جانە قۇقىق قورعاۋ ورگاندارى تاراپىنان نەگىزسىز قىسىم جاساۋدان ودان ءارى اراشالاۋ جونىندەگى پروبلەمالىق ماسەلەلەر تالقىلاندى. كۇن تارتىبىندەگى ماسەلەلەردى تالقىلاۋعا سوتتار, كۇش قۇرىلىمدارى جانە بىرقاتار مەملەكەتتىك ورگان باسشىلارى, سونداي-اق كاسىپكەرلەر پالاتاسىنىڭ ديرەكتورى اتىنان وبلىستىڭ بيزنەس قوعامداستىعىنىڭ وكىلى قاتىستى.
وبلىس پروكۋرورى ر.وجاروۆ قۇقىق قورعاۋ جانە وزگە دە ۋاكىلەتتى مەملەكەتتىك ورگاندار باسشىلارىنىڭ نازارىن كاسىپكەرلەردىڭ قۇقىقتارىنا كەدەرگى كەلتىرەتىن, شەكتەيتىن شەشىمدەر مەن ارەكەتتەرگە اۋداردى. سونىمەن قاتار ول مەملەكەتتىك ورگاندار تاراپىنان وسى باعىتتاعى بىرلەسكەن كۇش-جىگەردىڭ ايقىن بولۋى جانە كاسىپكەرلەر ءوز تاراپىنان قولداۋدى تۇراقتى نەگىزدە سەزىنۋگە ءتيىس ەكەنىن اتاپ ءوتتى.